ޕީޕީއެމްގެ ރިޔާސީ ކެންޑިޑޭޓް، ކުރީގެ ރައީސް އަބްދުﷲ ޔާމީނަށް ރިޔާސީ އިންތިހާބުގައި ވާދަ ނުކުރެއްވޭ ހާލަތެއްގައި ޕީޕީއެމް/ޕީއެެންސީން ދަ ޑިމޮކްރެޓްސްގެ ކެންޑިޑޭޓާ އެކު ކުރިއަށް ދާން އެދިވަޑަައިގަންނަވާ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
ދަ ޑިމޮކްރެޓްސްގެ ރިޔާސީ ކެންޑިޑޭޓް އިލްޔާސް ލަބީބަށް ތާއީދު ހޯއްދަވަން ތ.އަތޮޅުގައި ކުރިއަށް ގެންދާ ކެމްޕޭނުގެ ތެރެއިން ތ. ގުރައިދޫގައި މިއަދު ބޭއްވި ޖަލްސާގައި ނަޝީދު ވިދާޅުވީ ޕީއެންސީގެ ކެންޑިޑޭޓަކު ރިޔާސީ އިންތިހާބުގައި ޕީއެންސީގެ ކެންޑިޑޭޓަކު ވާދަކުރައްވަައިފާނެ ކަން އެނގިވަޑައިގަންނަވާ ކަމަށެވެ. އެހެން ނަމަވެސް ޕީޕީއެމުން ޑިމޮކްރެޓްސްއާ ގުޅޭނެކަމަށް އުއްމީދުކުރައްވާ ކަމަށް ވެސް އެމަނިކުފާނު ވިދާޅުވި އެވެ.
"އަޅުގަނޑަށް ވެސް އެނގޭ ޕީއެންސީގެ ކެންޑިޑޭޓަކު ވާދަކުރުން އެއީ އެކަށީގެންވާ ކަމެއް. އެހެން ނަމަވެސް މިކަން ، މިހާރު މި ހިނގަމުން އަންނަ ވެރިކަން އަޅުގަނޑުމެނަނަށް ނިންމެން އޮތީ އަޅުގަނޑުމެނާ ތިޔަ ބޭފުޅުންނާ ގުޅިގެން ކަމީ އަޅުގަނޑު ހިތުން އެއްވެސް ބޭފުޅަކަށް އޮޅޭނެ ހަގީގަތެއް ނޫން،" ނަޝީދު ވިދާޅުވި އެވެ.
ޕީޕީއެމްގެ ރިޔާސީ ކެންޑިޑޭޓް އަދި ކުރީގެ ރައީސް އަބްދުﷲ ޔާމީނަށް ކްރިމިނަލް ކޯޓުން ކޮށްފައިވާ 11 އަހަރުގެ ޖަލު ހުކުމެއް އޮތުމުން، އެމަނިކުފާނަށް މި އިންތިހާބުގައި ވާދަނުކުރެއްވިދާނެ ކަމުގެ ބިރު އެބަ އޮތެވެ. އެކަން ނިމޭނެ ގޮތެއް އެނގޭނީ ރިޔާސީ އިންތިހާބަށް ޔާމީނުގެ ޝަރުތުހަމަވާކަން ނުވަތަ ނޫންކަން ކަނޑައަޅަން ސުޕްރީމްކޯޓަށް ހުށަހަޅާފައިވާ މައްސަަލަ ނިންމުމުންނެވެ.
އެ މައްސަލަ މާދަމާއަށް ތާވަލުކޮށްފައި ވާއިރު ޕީއެންސީން ރިޔާސީ ކެންޑިޑޭޓަކު ނެރެން ނިންމައި، އެކަމަށް ކުރިމަތިލާން މިހާރު ވަނީ ހުޅުވާލައިފަ އެވެ. ނެރޭނެ ކެންޑިޑޭޓެއް ކަނޑައަޅާނީ ޕީއެންސީގެ ސެނެޓުން މިއަދު ހަވީރު ބާއްވާ ބައްދަލުވުމެއްގަ އެވެ.
އިދިކޮޅު ހުރިހާ ޕާޓީތައް ގުޅިގެން އެއް ކެންޑިޑޭޓަކު ނެރެން ބާރު އަޅުއްވައި ނަޝީދު މީގެ ކުރިން ވެސް މަސައްކަތް ކުރެއްވި އެވެ. އެހެން ނަމަވެސް އެކަމަށް ޕީޕީއެމުން އިޖާބައެއް ނުދެ އެވެ.
