މެންޗެސްޓާ (އޮގަސްޓް 3) - ޖަރުމަނުގެ އާރްބީ ލައިޕްޒިގަށް ކުޅެމުން އަންނަ ކްރޮއޭޝިއާގެ ޑިފެންޑަރު، ޖޮސްކޯ ގްވާޑިއޯލް، 97 މިލިއަން ޑޮލަރުގެ ޑީލެއްގައި ގަންނަން މެންޗެސްޓާ ސިޓީން އެއްބަސްވުމަކަށް އަތުވެއްޖެ އެވެ.
ގްވާޑިއޯލް، 21، ގަންނަން ސިޓީން އެންމެ ފުރަތަމަ ހުށަހެޅި އަގަށް ލައިޕްޒިގުން އެއްބަހެއް ނުވި އެވެ. އެހެންވެ، ސިޓީން އެ ވަގުތަށް ލައިޕްޒިގާ ގްވާޑިއޯލްގެ ޑީލާ ބެހޭގޮތުން މަޝްވަރާ ކުރުން ހުއްޓާލި އެވެ. އެކަމަކު، ސިޓީން އަލުން ވާހަކަތައް ފަށައި، 97 މިލިއަން ޑޮލަރު ދައްކައިގެން، ގްވާޑިއޯލްގެ ސޮއި ހޯދަން މި ވަނީ ތައްޔާރުވެފަ އެވެ.
ގްވާޑިއޯލް، 21، މި ވަގުތު ލައިޕްޒިގުގެ ކޮންޓްރެކްޓްގައި ހުރީ 2027 ވަނަ އަހަރުގެ ނިޔަލަށެވެ. އޭނާ ވެގެންދާނީ ސިޓީ އަށް މި ޓްރާންސްފާގައި ސޮއިކުރާ ދެ ވަނަ ކުޅުންތެރިޔާ އަށެވެ. ސިޓީން މި ފަހަރު ގެނައި ހަމައެކަނި ކުޅުންތެރިއަކީ، ޗެލްސީ އަށް ކުޅެމުން އައި ކްރޮއޭޝިއާގެ މިޑްފީލްޑަރު، މަޓެއޯ ކޮވަސިޗް އެވެ. އެއީ 26 މިިލިއަން ޑޮލަރުގެ ފީ އަކަށް ނިންމި ޓްރާންސްފާ އެކެވެ.
ކްރޮއޭޝިއާގެ މަޝްހޫރު ގިނަ ކުޅުންތެރިންތަކެކޭ އެއްގޮތަށް ގްވާޑިއޯލް އަކީ ވެސް ޑިނަމޯ ޒަގްރެބް އިން ސީނިއާ ކެރިއަރު ފެށި ކުޅުންތެރިއެކެވެ. ކްރޮއޭޝިއާ ގައުމީ ޓީމުގައި ވެސް މުހިންމު ރޯލެއް އަދާކުރާ ގްވާޑިއޯލް އަކީ ޔޫރަޕްގައި މި ފަހުން އެންމެ ބޮޑު ކުރިއެރުމެއް ހޯދަމުން އައި ޒުވާން ޑިފެންޑަރެވެ.
