ރައީސް އިބްރާހިމް މުހައްމަދު ސޯލިހު ސެޕްޓެމްބަރު 9, ގައި އޮންނަ ރިޔާސީ އިންތިހާބު ކާމިޔާބު ކުރައްވައިފިނަމަ ރައީސް މުހައްމަދު ނަޝީދުގެ ސިޔާސީ ހަޔާތް ނިމޭނެ ކަމަށް ނަޝީދު ވިދާޅުވެފައިވާ މެސެޖެއް ކަމަށް ބުނެ ފަތުރަމުންދަނީ ފޭކް ސްކްރީންޝޮޓެއް ކަމަށާއި އެއީ ކަނޑައެޅިގެން ދޮގެއް ކަމަށް އެމަނިކުފާނު ޔަގީން ކޮށްދެއްވައިފި އެވެ.
އެމްޑީޕީން ވަކިވެ ދަ ޑިމޮކްރެޓްސް އުފައްދަވައި ނަޝީދު ސިޔާސީ މަސައްކަތްތައް މިހާރު ކުރިއަށްގެންދަވަނީ އެ ޕާޓީއާ އެކު އެވެ. ރިޔާސީ އިންތިހާބުގައި އެމަނިކުފާނު ވާދަކުރައްވާނެ ކަމަށް ކުރިން ބެލެވުނު ނަމަވެސް އެ ޕާޓީން ނެރެނީ ހުޅުދޫ ދާއިރާގެ މެމްބަރު އިލްޔާސް ލަބީބެވެ.
ޕާޓީގެ މެމްބަރުން އެއްބައިވާން އެދި ޑިމޮކްރެޓްސްގެ ވަޓްސްއެޕް ގްރޫޕަކަށް ނަޝީދު ފޮނުވި މެސެޖެއް ކަމަށް ބުނެ ސްކްރީންޝޮޓެއް މިއަދު މެންދުރު ޓްވިޓާގައި ދައުރުވާން ފެށި އެވެ.
"ބައިބައިވެއްޖެ ނަމަ އަޅުގަނޑަށް ފެންނަނީ މާ ފަސޭހަކޮށް ރައީސުލްޖުމްހޫރިއްޔާ އިންތިހާބު ނަގާތަން. ރައީސުލްޖުމްހޫރިއްޔާ އިންތިހާބު ކާމިޔާބުކުރާ ދުވަސް ވެގެންދާނީ އަޅުގަނޑުގެ ސިޔާސީ މަސައްކަތުގެ އެންމެ ފަހު ދުވަހަށް. ވިސްނަންވީ ތިބޭފުޅުން," އޭގައި ލިޔެފައިވެ އެވެ.
ރައްޔިތުންގެ މަޖިލީހުގެ ރައީސްކަން ވެސް ކުރައްވާ ނަޝީދު ވިދާޅުވީ އެ ސްކްރީންޝޮޓަކީ "ކަނޑައެޅިގެން ދޮގެއް" ކަމަށެވެ.
"މި ބާވަތުގެ އެއްވެސް ވާހަކައެއް އަޅުގަނޑު ނުދައްކަން. ރައީސް އިބްރާހިމް މުހައްމަދު ސޯލިހުއަށް މި އިންތިހާބު ކާމިޔާބެއް ނުކުރެވޭނެ އަދި އަޅުގަނޑުގެ ސިޔާސީ ހަޔާތް ބިނާ ކުރާނީ ރައީސުލްޖުމްހޫރިއްޔާއާ ގުޅިގެންނެއް ނޫން. މިއީ ރައީސް އޮފީހުން ފައިސާ ހަރަދުކޮށްގެން ފޮނުވާ ދޮގު ހަބަރު," އެކަން ދޮގުކުރައްވައި ނަޝީދު މިއަދު ވިދާޅުވި އެވެ.
ރާއްޖޭގެ ބައެއް މީޑިއާތަކުން ވެސް އެ ސްކްރީންޝޮޓުގައި އޮތް ވާހަކަތައް ހަބަރުގެ ގޮތުގައި ގެނެސްދީފައިވެ އެވެ.
ޑިމޮކްރެޓްސް އުފެއްދިތާ މާ ގިނަ ދުވަސްތަކެއް އަދި ނުވެ އެވެ. އެމްޑީޕީގެ ތެރެއިން ސިޔާސީ މަސައްކަތްތައް ކުރެވެން ނެތް ކަމަށް ވިދާޅުވެ ނަޝީދު އެ ޕާޓީއާ ފެއަށް ޖެހިލީ އެމްޑީޕީގެ ތެރެއިން ބާރުތައް ގެއްލުމުންނެވެ.
ނަޝީދު ސިޔާސީ މަސައްކަތްތައް މައިގަނޑު ގޮތެއްގައި އަމާޒުކޮށްފައި ވަނީ ރާއްޖޭގެ ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލުކޮށް ބޮޑުވަޒީރަކަށް ވެވަޑައިގަތުމަށެވެ. އެކަން އެގޮތަށް ކުރުމަށް ޑިމޮކްރެޓްސްގެ ވެރިކަމެއްގައި ނިޒާމީ ވޯޓެއް ނަގާނެކަން ވެސް ވަނީ ހާމަކޮށްފަ އެވެ.
