އދ. މަންދޫގެ ފެނާއި ނަރުދަމާގެ ހިދުމަތް ދިނުން އެ ރަށު ކައުންސިލުން ސްޓެލްކޯއާ ހަވާލުކޮށްފި އެވެ.
މަންދޫގެ ފެނާއި ނަރުދަމާގެ ހިދުމަތް ދިނުމަށް ސްޓެލްކޯއާ ހަވާލުކުރި އެއްބަސްވުމުގައި ސްޓެލްކޯގެ ފަރާތުން ސޮއި ކުރެއްވީ އެ ކުންފުނީގެ މެނޭޖިން ޑިރެކްޓަރު، އަހުމަދު ޝަރީފް އެވެ. މަންދޫ ކައުންސިލުގެ ފަރާތުން ސޮއި ކުރެއްވީ އެ ކައުންސިލުގެ ނައިބު ރައީސް، އިބްރާހިމް ހުސައިން އެވެ.
ތިން ސަތޭކައެއްހައި މީހުންގެ އާބާދީއެއް އޮންނަ މަންދޫގައި ފެނާއި ނަރުދަމާގެ ހިދުމަތް ގާއިމުކޮށްފައި ވަނީ އައިކެއާ ޕްރައިވެޓު ލިމިޓެޑުގެ އާންމު އިޖުތިމާއީ ޒިންމާގެ ދަށުން، އޯގަސްޓު 17، 2016 ގައި އެ ރަށު ކައުންސިލާ ވެވުނު އެއްބަސްވުމެއްގެ ދަށުންނެވެ.
މަންދޫ ފެނާއި ނަރުދަމާގެ އެއްބަސްވުމުގައި ސޮއި ކުރެއްވުމަށްފަހު އެ ރަށު ކައުންސިލްގެ ނައިބު ރައީސް ވާހަކަދައްކަވަމުން ވިދާޅުވީ އެރަށުގައި އެ ހިދުމަތްތައް ދޭން ފެށުނީ ސްޓެލްކޯގެ މެނޭޖިން ޑިރެކްޓަރުގެ އިހުލާސްތެރި މަސައްކަތްތަކަކާއި އެކުގައި ކަމަށެވެ. އަދި އެ ރަށުގައި ފެނާއި ނަރުދަމާގެ ހިދުމަތް ދެވެން ފެށުމަކީ މިހާރުގެ ސަރުކާރުން ކުޑަރަށެއް ބޮޑުރަށެއް ނުބަލައި ރަށްތައް ތަރައްގީ ކުރުމަށް ގެންގުޅޭ ސިޔާސަތުގެ ފުރިހަމަކަން ދޭހަވާ ކަމެއް ކަމަށް އޭނާ ވިދާޅުވި އެވެ.
"މިރަށަށް. ސަރުކާރާއި، އެމްޑީ ޝަރީފް ގެންގުޅުއްވާ ގާތްކަމުގެ ސަބަބުން ލިބެމުން އަންނަ ކުރިއެރުމަށް ބަލާއިރުގައި، ކަރަންޓާއި ހަވާލުވެ، މި ރަށަށް ވެސް މިއޮތީ ވަރަށް ބޮޑު ކުރިއެރުންތަކެއް ހޯއްދަވައިދެއްވާފައި," އިބްރާހިމް ހުސައިން ވިދާޅުވި އެވެ.
އެއްކަމަކަށް މުޅި ރަށުގެ ކޭބަލް ނެޓްވޯކް ބަދަލު ކޮށްދެއްވާފައިވާ ކަމަށާއި ޕެނަލް ބޯޑު ބަދަލުކޮށްދިނުމާއި އެކަންކަމުގެ ސަބަބުން އެރަށުގައި ގިނަ އަދަދެއްގެ ވަޒީފާ އުފެދިފައިވާކަން އޭނާ ފާހަގަ ކުރެއްވި އެވެ.
"މިއީ އަޅުގަނޑުމެންގެ މިކުޑަކުޑަ އާއިލާއަށް ރަށަށް ލިބުނު ވަރަށް ބޮޑު ކުރިއެރުމެއް އެ ވަޒީފާ ތަކަކީ ވެސް" އިބްރާހިމް ހުސައިން ވިދާޅުވި އެވެ.
އެ ރަސްމިއްޔާތުގައި ސްޓެލްކޯގެ ފަރާތުން ވާހަކަދައްކަވަމުން އަހުމަދު ޝަރީފް ވަނީ، އައިކެއާ ޕްރައިވެޓް ލިމިޓެޑަށް ސަރުކާރާއި، ސްޓެލްކޯގެ ނަމުގައި ޝުކުރު އަދާކުރައްވާފަ އެވެ. އަދި މިފަދަ މަސައްކަތްތަކަކީ ރައްޔިތުންނަށް ބޭނުންވާ އަސާސީ ހިދުމަތްތަކާއި، ކުދި އާބާދީތަކަށް ތަރައްގީ ގެނެވޭނެ ނިޒާމަކީ ނުވަތަ ސިސްޓަމަކީ މިއީ ކަމަށް ޝަރީފް ވިދާޅުވި އެވެ.
"އެހެންވެގެން އަޅުގަނޑުމެން އަބަދުވެސް ޕްރައިވެޓް ސެކްޓާއަށް ދައުވަތު އަރުވަން، އަދި މިކަމުގައި ބައިވެރިވާން ބޭނުންވާ ފަރާތްތަކަށް އަބަދުވެސް އަޅުގަނޑުމެން ދޮރު ހުޅުވާލާފައި ބާއްވަން." އޭނާ ވިދާޅުވި އެވެ.
މަންދޫގައި ފެނުގެ ހިދުމަތް ދިނުމަށް ގާއިމުކޮށްފައިވާ ސިސްޓަމުގައި 10 ޓަނުގެ ދެ އާރޯ ޕުލާންޓާއި 74 ޓަނުގެ ދެ ސްޓޯރޭޖު ހުރެ އެވެ. އެ ޕުލާންޓުތަކުން ދުވާލަކު 25 ޓަނުގެ ފެން އުފައްދާނެ އެވެ.
ޝަރީފް ވިދާޅުވީ އެރަށުގެ ރައްޔިތުންނަށް ދުވާލެއްގެ މައްޗަށް އަސްލު ބޭނުންވާ މިންވަރަކީ ދުވާލަކު 35 ޓަނުގެ ފެން ކަމަށާއި އެ އަދަދަށް ފެން އުފެއްދުމަށްޓަކައި އެ ސިސްޓަމުން ދޭ ހިދުމަތް ފުޅާ ކުރުމުގެ މަސައްކަތް ސްޓެލްކޯއިން ކުރާނެ ކަމަށެވެ.
"އަޅުގަނޑުމެން ތިޔަ ބޭފުޅުންނަށް މިދޭ ހިދުމަތް ހުއްޓުނަކަ ނުދޭނަން. ޔަގީން ކުރައްވާ. މިއީ އަޅުގަނޑުމެން ސްޓެލްކޯގެ މުވައްޒަފުން މަންދޫގެ ރައްޔިތުންނަށް ވާ ވައުދެއް،" އޭނާ ވިދާޅުވި އެވެ.
ސްޓެލްކޯއިން ވަނީ އެރަށުގެ ފެނާއި ނަރުދަމާގެ ހިދުމަތް ދިނުމާ ހަވާލުވުމުގެ އުފަލުގައި އެރަށު ރައްޔިތުންގެ ތެރެއިން ކޮންމެ ކޮންޒިއުމާއަކަށް އެއް ޓަނުގެ ފެން ހިލޭ ދިނުމަށް ނިންމައިފަ އެވެ.
