ރައީސް ސޯލިހުގެ ރިޔާސީ ކެމްޕެނުގައި އުތުރަށް ފެއްޓެވި ދަތުރުފުޅުގައި ފުރަތަމަ ވަޑައިގަތީ އިދިކޮޅު ޕީޕީއެމްގެ 'ސްޓްރޯންގްހޯލްޑް' އެއް ކަމަށްވާ ށ. ފުނަދޫ އަށެވެ. އެންމެ ފަހުން 2018 ގައި ބޭއްވި ރިޔާސީ އިންތިހާބުގައި ފުނަދޫއިން އެމަނިކުފާނަށް ލިބިވަޑައިތީ އެންމެ 28 ޕަސެންޓު ވޯޓެެވެ. މިއީ މުޅި ރާއްޖެއަށް ބެލިޔަސް އެ އަހަރު ރައީސް ސޯލިހަށް އެންމެ މަދުން ވޯޓު ލިބުނު އެއް ރަށެވެ.

އިންތިހާބަށްފަހު ފުނަދޫ ރައްޔިތުން ބެލީ ރައީސް ވެވަޑައިގެންފައިވާ ވައުދުތަކަށެވެ. ފަސް އަހަރު ފަހުން ރައީސް ފުނަދޫއަށް ވަޑައިގެންނެވިއިރު ރައްޔިތުން އަދިވެސް އެ ވައުދުތަކުގެ މަތިން ހަނދާން އެބަހުއްޓެވެ. އަދި އަންނަ ރިޔާސީ އިންތިހާބުގައި ރައީސް މިނާނީ ވައުދުތައް ފުއްދާފައިވާ މިންވަރަށް ބަލާފައި ކަމަށް ރަށު މީހުން ބުނެ އެވެ.

"މިތާ ނުޖެހޭނެ ކެމްޕެއިނެއް ވެސް ކުރާކަށް. ރައީސާ އިދިކޮޅަށް 80 އިންސައްތަ ވޯޓު މިރަށުން ޔަގީންވާނެ. ޕީޕީއެމްގެ ކެންޑިޑޭޓަކު ނެތަސް، ކެންޑިޑޭޓަކު ހުންނާނެ، އެކަމަކު މިސާލަކަށް ކެންޑިޑޭޓަކު ނެތަސް މި ރަށުން އިބްރާހިމް މުހައްމަދު ސޯލިހަށް 20 އިންސައްތައިން މަތި ނުލިބޭނެ،" އިދިކޮޅަށް ބޮޑު މެޖޯރިޓީއެއް އޮތް މި ރަށު ކައުންސިލްގެ ރައީސަކަށް ހުންނެވި ޕީޕީއެމްގެ އަހުމަދު އިބްރާހިމްފުޅު ވިދާޅުވި އެވެ.

އެކަން މި ރަށުގެ އެމްޑީޕީ މެމްބަރުން ވެސް ދަނެ އެވެ. ރަށުގެ ހާލަތާއި އެ ހާލަތު ބަދަލުވަމުންދާ ގޮތް އެމީހުން ތިބީ ބަލާށެވެ. ވެރިކަން ކުރާ ޕާޓީގެ އަމާޒަކީ ސެޕްޓެމްބަރު 9، ގައި ބާއްވާ ރިޔާސީ އިންތިހާބުގެ ކުރިން ފުނަދޫ ރައްޔިތުންގެ ތާއީދު ރައީސް ސޯލިހަށް އަނބުރާލުމެވެ.

titledesc

ވައުދުތައް ފުއްދައިނުދެވުމުގެ ޝަކުވާތަކެއް

"އާބަން ސެންޓާ" އެއްގެ ގޮތުގައި ތަރައްގީކުރުމަށް ވައުދުވި، މީގެ 50 އަހަރު ކުރިން މީހުން ވަޒަންވެރިވި ފުނަދޫއަށް ރައީސް ސޯލިހު ގިނަ ވައުދުތަކެއް ވެވަޑައިގަތެވެ. އޭގެ ތެރޭގައި އިސްލާމިކް ސެންޓަރެއް އެޅުމާއި ބިން ހިއްކުމާއި ފެނުގެ ޕްރޮޖެކްޓުގެ އިތުރުން ކުރީގެ ރައީސް އަބްދުﷲ ޔާމީންގެ ވެރިކަމުގައި އެޅި އެއާޕޯޓު ތަރައްގީކުރުން ހިމެނޭކަމަށް ކައުންސިލްގެ ރައީސް ވިދާޅުވި އެވެ.

"އޭގެ ތެރެއިން ފެނުގެ ޕްރޮޖެކްޓު އެބަ ހިނގާ، ހަތަރު އަހަރު ވެއްޖެ އެކަމެއް ނިންމަން އުޅޭތާ، ދެން ބޯޅަ ދަނޑުގެ އެއްބައި ނިންމައިފި، ލައިޓުތައް ނުޖެހޭ، އިތުރު ކަމެއް ނުކުރެވޭ،" އިބްރާހިމްފުޅު ވިދާޅުވި އެވެ.

ކައުންސިލްގެ ރައީސް އެހެން ވިދާޅުވި ނަމަވެސް އެ ރަށުގެ ބޯޅަ ދަނޑު މި ދަތުރުގައި ރައީސް ސޯލިހު ހުޅުއްވައިދެއްވައިފަ އެވެ.

ށ. ފުނަދޫ ކައުންސިލްގެ ރައީސް އަހުމަދު އިބްރާހިމްފުޅު ، ވިދާޅުވީ ރައީސް ސޯލިހަށް އެ ރަށް އަނބުރާ ނުލެވޭނެ ކަމަށް - ފޮޓޯ: މުހައްމަދު ޝާބިން / އަދަދު

ދެން އެ ރަށުން، ކައުންސިލް ރައީސާއި އެއް މޭޒަކުން ބައްދަލުވީ ޕީޕީއެމްގެ އިސް އެކްޓިވިސްޓެކެވެ. އޭނާގެ ވާހަކަތައް ވެސް ހުރީ ހަމަ އެ ރާގުގަ އެވެ. ފުނަދޫ ބަދަލުނުވާނެ ކަމަށް ތަކުރާރުކޮށް ބުނަމުން މުހައްމަދު އަބްދުލްރަހުމާން، 57، ފާހަގަކުރީ ސަރުކާރުގެ 'ދޯދިޔާ' ސިޔާސަތުތަކެވެ.

"މި ސަރުކާރު އައިސްގެން [މަޝްރޫއުތަކުގެ] މަސައްކަތްވެސް ކުރަން ފެށިއޭ ހަމަ، އެކަމަކު އަޅުގަނޑު ގަބޫލެއް ނުކުރަން ފަސް އަހަރުގެ ދައުރެއް ނިމޭއިރު 200 ނުވަތަ 300 ގެ އާބާދީތަކުގައި ނަރުދަމާ ނޭޅި އޮންނަންޖެހޭނެ ކަމަކަށް، ފުޓުބޯޅަ ދަނޑެއް ފަށާފަ އެގޮތަށް ނުނިމި އޮންނަން ޖެހޭނެ ކަމަކަށް،" އޭނާ ވިދާޅުވި އެވެ.

ދެން ފާޑުކީ ހިޔާާލު ފާޅުކުރުމުގެ މިނިވަންކަމާއި ޒީރޯ ޓޮލެރެންސް ފަދަ، އޭނާގެ ވިސްނުމުން ނަމަ މި ސަރުކާރުގެ 'ފެއިލް' ވެފައިވާ ވައުދުތަކަށެވެ.

ފުނަދޫގެ އެމްޑީޕީ އޮތީ ރަށް އެ ޕާޓީއަށް އަނބުރާލުމުގެ ވިސްނުމުގައި

ކުރިން ވާހަކަދެއްކި އިދިކޮޅު ފަރާތްތަކާ އެމްޑީޕީގެ މެމްބަރުންގެ ހިޔާލު ވަރަށް ވެސް ތަފާތެވެ. ރައީސް ވަޑައިގެން އެ ރަށުގައި ބޭއްވި ކުރު ޖަލްސާގައި ވާހަކަ ދައްކަވަމުން، ފުނަދޫއަށް ނިސްބަތްވެލައްވާ އެ ދާއިރާގެ މަޖިލިސް މެމްބަރު މުހައްމަދު ޝާހިދު ވިދާޅުވީ، ސިޔާސީ މަންފާއަށް ފުނަދޫގެ ރައްޔިތުން އެތައް ގުރުބާނީއެއް ވެފައިވާ ކަމަށެވެ. ނަމަވެސް ކުރީގެ ސަރުކާރު ތަކުން އެ ރަށް ބޭއްވީ ތަރައްގީގެ މަސައްކަތުގައި އެންމެ ފަހަތުގަ ކަމަށް ވެސް ވިދާޅުވި އެވެ.

"ޑިމޮކްރަސީގެ މި މަސައްކަތް ފެށުނު ހިސާބުން ފުނަދޫއަށް މިއަށްވުރެ ބޮޑަށް އަޅާލެވުނު ސަރުކާރެއް އައިސްފައެއް ނުވޭ، މި ރަށުގެ އެއޮތް ބޮޑު ބަނދަރު އަޅާ ނިންމީ އެމްޑީޕީ ސަރުކާރުން، މި ރަށުގެ ނަރުދަމާ އެޅީ އެމްޑީޕީ ސަރުކާރުން، އެ ނަރުދަމާއަށް އެކްސްޓެންޝަން ލައިދިނީ އެމްޑީޕީ ސަރުކާރުން،" ޝާހިދު ވިދާޅުވި އެވެ.

ރައީސް ސޯލިހަށް މަރުހަބާ ދެންނެވުމުގައި އިސްކޮށް އުޅުނު އެމްޑީޕީގެ އެކްޓިވިސްޓުންގެ ބަހެއްވެސް ހޯދާލީމެވެ.

އެގޮތުން، އެމްޑީޕީގެ ކަންކަމުގައި މި ރަށުގައި އެންމެ އިސްކޮށް އުޅުއްވާ އަހުމަދު ޒަރީރު، 52، ހުރީ ފުނަދޫ އެމްޑީޕީއަށް އަނބުރާލުމުގެ ވިސްނުމުގަ އެވެ. ނަމަވެސް، އިދިކޮޅުގެ ބާރުގަދަ މިފަދަ ރަށެއް އަނބުރާލުމަށް ވަގުތު ނަގާނެކަން އޭނާވެސް ގަބޫލުކުރެ އެވެ.

އަހުމަދު ޒަރީރު، 52، ވިދާޅުވީ ކުރިއަށް އޮތްތާ ފުނަދޫ އެމްޑީޕީއަށް އެނބުރޭނެ ކަމަށް - ފޮޓޯ: މުހައްމަދު ޝާބިން / އަދަދު

"ގާތްގަނޑަކަށް ކުރީގަ ރަށުން ލިބެނީ ގާތްގަނޑަކަށް 300 އެއްހާ ވޯޓު ދެއްތޯ، އަޅުގަނޑުމެން މި ބަލަނީ އެ އަދަދު 500 އިން މަތިކުރަން، އެއީ މި އިންތިހާބުގައި" އޭނާ ބުންޏެވެ.

ޒަރީރުގެ ވާހަކައިން ނަމަ، މި ސަރުކާރުން ކުރިއަށް ގެންދާ ތަރައްގީގެ މަޝްރޫއުތައް ދަނީ ބާރަށް ކުރިއަށެވެ. އަދި، އަބަދުވެސް ތަރައްގީއަށް އެދޭ ރައްޔިތެއް އޮންނަ ފުނަދޫއިން ރައީސް ސޯލިހަށް ދެވަނަ ދައުރެއް ނުދޭން ޖެހޭ ސަބަބެއް އޭނާއަށް ނުފެންނަ ކަމަށްވެސް ބުންޏެވެ.

"އާދެ އިރާދަކުރެއްވިއްޔާ ފުނަދޫ [އެމްޑީޕީގެ މެޖޯރިޓީއަކަށް] ބަދަލުވާނެ، އުނދަގޫ ކަމެއް.. އެކަމަކު ބަދަލުވާނެ،" އޭނާ ބުންޏެވެ.

އެންމެ ބޮޑަށް ބޭނުންވަނީ ބިން ހިއްކުމާއި ގޮނޑުދޮށް ހިމާޔަތް ކުރުން

ފުނަދޫގެ ރައްޔިތުންނާ އެކި ފަހަރު މަތިން ދެކެވުނު ވާހަކަތަކުން، ދެ ފިކުރުގެ އެކި އުމުރުގެ ފަރާތްތަކުން ވެސް އެންމެ ބޮޑަށް ބޭނުންވާ ކަމެއްގެ ގޮތުގައި ފާހަގަކުރީ ބިން ހިއްކުމާއި ގިރަމުންދާ ގޮނޑުދޮށް ހިމާޔަތް ކުރުމެވެ. އޭގެ އިތުރުން، ހަލާކުވެފައިވާ ޔޫތު ސެންޓަރު އަނބުރާ ކައުންސިލަށް ދިނުމާއި ކަރަންޓަށް ހޭދަވާ ބޮޑު ހަރަދަށް ހައްލެއް ހޯދައިދިނުމަށް ވެސް ގިނަ ބަޔަކު އެދެމުންދާކަން ފާހަގަވި އެވެ.

"ގޮނޑުދޮށް ހިމާޔަތް ކުރުމަށްވެސް 2019 ގަ ވައުދުވި، މަޖިލިސް އިންތިހާބަށް އަދި އޮތީ ހަވާލުކުރި ގޮތަށް، އަަމަލީ މަސައްކަތް ނުފެށޭ، އަސްލު ހަމަ އިހުލާސްތެރިކަމެއްނެތީ. އެންމެ ބޮޑު ކަންބޮޑުވުމަކީ ހަމަ ބިން ހިއްކުން، ކޮންމެ އިންތިހާބަކަށް ކޮށްދޭނަމޭ ބުނަނީ، އެބޭފުޅުން ބުނަނީ ވެލި ނުލިބިގެންނޭ ނުހިއްކި ލަސްވަނީ،" ކައުންސިލްގެ ރައީސް ވިދާޅުވި އެވެ.

މިކަމަށް ރައީސް ސޯލިހާއި، މެމްބަރު ޝާހިދު އިއްޔެ އެ ރަށުގައި ދެއްކެވި ވާހަކައިން ރައްދު ލިބެ އެވެ. ރައީސް އާއި ޝާހިދު ވެސް ވިދާޅުވީ މި ސަރުކާރުން ބިން ހިއްކާނީ ރައްޔިތުންނަށް ބޭނުންކުރެވޭނެ އެންމެ ރަނގަޅުގޮތް ބެލުމަށްފަހު ކަމަށެވެ.

"ދެންމެ ޝާހިދު އެ ވިދާޅުވި ގޮތަށް މި ރަށުގެ ބިން ހިއްކުން އަޅުގަނޑުމެންގެ ޕްލޭނުގައި އެބައޮތް، އަޅުގަނޑުގެ އަމާޒަކީ މި އަހަރު ނިމެންވާއިރަށް އެކަން ޕްލޭންކޮށް ކޮންޓްރެކްޓުގައި ސޮއިކޮށް ބަޔަކާ ހަވާލުކުރުން،" ރައީސް ވިދާޅުވި އެވެ.

ކުރިން މި ލިޔުމަށް މައުލޫމާތު ދިން އަބްދުލްރަހްމާން ބުނި ގޮތުގައި އޭނާއަށް އޮތް އެންމެ ބޮޑު ކަންބޮޑުވުމަކީ ކުރިން ރައްޔިތުން ހިންގަމުން އައި އިންޖީނުގެ ހުއްޓުވައި ފެނަކައާ ހަވާލުކުރުމެވެ. "އޭރު 3،000 ރުފިޔާ އަރާ ބިލަށް މިހާރު 7،000 ރުފިޔާ އަރާ" ކަމަށް އޭނާ ބުނެ އެވެ.

މެމްބަރު ޝާހިދާއި އެމްޑީޕީގެ ފަރާތްތަކުން ބުނާ ގޮތުގައި ކަރަންޓު ނެޓްވޯކު ބަދަލުކޮށް، ފޯމަރުތައް ބެހެއްޓުމަށް މިހާރު ކުރެވެމުންދާ މަސައްކަތްތައް ނިމުމުން ކަރަންޓުގެ އަގަށް މި އައި ބަދަލުތަކަށް ހައްލު ގެނެވި ރައްޔިތުންގެ އެ ޝަކުވާއަށް ވެސް ހައްލު ލިބިގެންދާނެ އެވެ.

ރަށްގިރުމުގެ މައްސަލަ ހަމަގައިމުވެސް ބޮޑެވެ. މިހާރު އިންޖީނުގޭގެ ގޮތުގައި ހިންގާ އިމާރާތުގެ އެއްބައި ހުރީ މޫދުގައި ކަމަށް ރަށުގެ ރައްޔިތުން ބުނީ ސަމާސައަކަށް ނޫނެވެ. އެއް ކަނުން ދެތިން ފޫޓު ހުރީ ހަމަ ހަގީގަތުގައި ވެސް މޫދުގަ އެވެ.

"މި ރަށް އެމްޑީޕީއަށް އަނބުރާލެވޭނީ، ވައުދުތަކުގެ ސްޕީޑް އަވަސްވެގެން. ވެފައިވާ ވައުދުތައް ރަނުން ރަނަށް ފުރިހަމަ ވެގެން."

މިއީ ރަށުގެ ހުރިހާ އުމުރެއްގެ ރައްޔިތުން ވެސް ބުނި ބުނުމެވެ. ސަބަބަކީ އެތައް ރަށެއްގެ ބަޔަކު މި ރަށަށް ވަޒަންވެރިވި ސަބަބަކީ ތަރައްގީއާ ތަހުޒީބަށް އެ މީހުން ކުރި ދަތުރެކެވެ. ފުނަދޫ ރައްޔިތުންނަކީ، "ތަރައްގީއަށް މަރުހަބާ" ކިޔާނެ ބަޔެކެވެ. ރައީސްގެ ތަފާތު ކުރުމެއް ނެތް ސިޔާސަތު ތަންފީޒުކުރައްވާ ރޭޓަކުން، 2018 ގައި ފުނަދޫގެ ތާއީދު މި ސަރުކާރަށްވެސް ހޯދޭނޭ ކަމާމެދު ޝައްކެއް ނެތެވެ.