އިންޑިއާގެ މަނީޕޫރް ސްޓޭޓުގައި ހަމަނުޖެހުން ހިންގަމުންދާ މައްސަލައިގައި ބޮޑު ވަޒީރު ނަރެންދްރަ މޯދީގެ ސަރުކާރުގެ އިތުބާރު ނެތްކަމުގެ ވޯޓެއް ނަގަން ޕާލަމެންޓުން ނިންމައިފި އެވެ.
ބުދަ ދުވަހު އެ މައްސަލަ ހުށަހެޅީ އިދިކޮޅު ކޮންގްރެސް ޕާޓީގެ މެމްބަރެކެވެ. އެހެން ނަމަވެސް ޕާލަމެންޓުގެ ފުރިހަމަ މެޖޯރިޓީ އޮތީ މޯދީގެ ޕާޓީއަށް ކަމަށް ވާތީ، ވޯޓުން ކުރި ލިބޭނެކަން ޔަގީނެވެ.
އެހެން ނަމަވެސް އެފަދަ ވޯޓެއް ނަގަން ނިންމުމުން މަނީޕޫރްގައި ހިނގަމުންދާ ކަންކަމާ ދެކޮޅަށް ވާހަކަ ދެއްކުމަށް މޯދީއަށް ޕްރެޝަރު ބޮޑުވާނެ ކަމަށް އިދިކޮޅު ލީޑަރުން ބުނެ އެވެ.
އެ ސްޓޭޓުގައި އުޅޭ މެއިތެއި ގްރޫޕާއި ކޫކީ ގަބީލާއާ ދެމެދު ހަމަނުޖެހުން ހިނގަން ފެށީ މިދިޔަ މޭ މަހު އެވެ. މިހާތަނަށް 130 މީހުން މަރުވެ، އެތައް ހާސް ބަޔެއްގެ ގެދޮރު ގެއްލިފައިވެ އެވެ.
މިދިޔަ ހަފުތާގައި އެ ސްޓޭޓުގައި ދެ އަންހެނަކު އޮރިޔާންކޮށް، މަގުމަތީގައި ހިންގުވާ ވީޑިއޯއެއް އާއްމުވެ، އެކި ގައުމުތަކުން ނުރުހުން ފާޅުކުރި އެވެ.
އެ ވީޑިއޯގެ ސަބަބުން މަނީޕޫރް މައްސަލައިގައި ފުރަތަމަ ފަހަރަށް މޯދީ އެއްޗެއް ވިދާޅުވި އެވެ. މޯދީ ވިދާޅުވީ ވީޑިއޯގެ ސަބަބުން "އިންޑިއާއަށް ބޮޑު ލަދަކާ ކުރިމަތިވެއްޖެ" ކަމަށެވެ.
މި ހަފުތާގެ ކުރީކޮޅު ހޯމް މިނިސްޓަރު އަމިތު ޝާހް ވިދާޅުވީ ހަމަނުޖެހުން ހުއްޓުވުމުގެ މަޝްވަރާއަށް ސަރުކާރުން ތައްޔާރުވާ އިރު، އިދިކޮޅު އެކަމަށް ހުރަސް އަޅަމުންދާ ކަމަށެވެ.
މިއީ 2014 ވަނަ އަހަރު މޯދީ ވެރިކަމަށް ވަޑައިގެންނެވި ފަހުން އިތުބާރު ނެތްކަމުގެ މައްސަލައަކާ ކުރިމަތިވި ދެ ވަނަ ފަހަރެވެ.
މީގެ ކުރިން 2018 ގައި މައްސަލަ ހުށަހެޅީ އަންދްރަ ޕްރަދޭޝް ސްޓޭޓަށް ހާއްސަ ގޮތްތަކަށް އަމަލުކުރާ ކަމަށް ބުނެ އެވެ. އެ ފަހަރު 12 ގަޑިއިރުގެ ބަހުސަކަށް ފަހު މައްސަލަ ފާހެއް ނުވި އެވެ.
