މަގާމަށް އައްޔަނުކުރިތާ ހަތް މަސް ތެރޭގައި ޗައިނާގެ ފޮރިން މިނިސްޓަރު ޗިން ގާންގް ކުއްލި ގޮތަކަކަށް ވަކިކޮށްފި އެވެ.
އުމުރުން 57 އަހަރުގެ ޗިން ޗައިނާގެ ފޮރިން މިނިސްޓަރު ކަމަށް ކަނޑައެޅީ ޑިސެމްބަރު 2022 ގަ އެވެ. ޗިންއަކީ ރައީސް ޝީ ޖިންޕިންގެ ގާތް ބޭފުޅެކެވެ.
އާއްމު އެއްވެސް ތަނަކުން ޗިން ނުފެންނަތާ ގިނަ ދުވަސްތަކެއް ވެފައި ވާތީ، އޭނާއާ މެދު ތަފާތު އެކި ގޮތްގޮތަށް ހަބަރު ފެތުރެމުން ދިޔަ އެވެ.
އާއްމު ތަނަކުން ޗިން އެންމެ ފަހުން ފެނުނީ ޖޫން 25 ގަ އެވެ. އޭނާ މަގާމުން ވަކިކުރި އިރު، އެކަމަށް ވަކި ސަބަބެއް ދައްކާފައެއް ނުވެ އެވެ.
ޗިން މީގެ ކުރިން ވަނީ ޗައިނާއިން އެމެރިކާއަށް ކަނޑައަޅާފައި ހުންނަ ސަފީރުގެ މަގާމު ފުރުއްވައިފަ އެވެ.
މީގެ މަހެއްހާ ދުވަސް ކުރިން އޭނާ ވަނީ އެމެރިކާގެ ސެކެޓްރީ އޮފް ސްޓޭޓް އެންޓޮނީ ބްލިންކެންއާ ބެއިޖިންގައި ބައްދަލުކުރައްވައިފަ އެވެ.
ޗައިނާ ދައުލަތުގެ ޝިންހުއާ ނިއުސް އެޖެންސީން ބުނީ ޗިން ގާންގް މަގާމުން ވަކިކޮށް ފޮރިން މިނިސްޓަރު ކަމަށް ވާންގް ޔީ އައްޔަނުކުރީ ޕާލަމެންޓުން ކަމަށެވެ. އެކަމަށް ރައީސް ޝީގެ ރުހުން ލިބިފައިވާ ކަމަށް ވެސް ޝިންހުއާއިން ބުންޏެވެ.
ޗައިނާގައި އޮންނަ ކޮމިއުނިސްޓް ޕާޓީ ނިޒާމުގެ ތެރެއިން ހާރިޖީ ސިޔާސަތު އެކުލަވާލަނީ މަތީ ފަންތީގެ އޮފިޝަލެކެވެ. އެ ސިޔާސަތު ތަންފީޒު ކުރުމުގެ ޒިންމާ އޮންނަނީ ފޮރިން މިނިސްޓަރަށެވެ.
އާ ފޮރިން މިނިސްޓަރު ކަމަށް އައްޔަނު ކުރި ވާންގް ޔީ ވަނީ 2013 އިން 2022 އަށް ވެސް އެ މަގާމު ފުރުއްވައިފަ އެވެ.
