މިހާރު ކުރިއަށްދާ ކްލަބް މޯލްޑިވްސް ކަޕް ފުޓްސަލް މުބާރާތުގައި އެސްޓީއޯ ކުޅުނު ފުރަތަމަ މެޗުން 3-0 އިން ޔުނައިޓެޑް ބީއެމްއެލް ބަލިކުރިއިރު، އެމްއޭސީއެލް އިން ޕޮލިސް ކްލަބްގެ މައްޗަށް 3-0 އިން ރަނގަޅު މޮޅެއް ހޯދައިފި އެވެ.
ގްރޫޕް އީގައި ރޭ ކުޅުނު މެޗުން ބީއެމްއެލް ކޮޅަށް އެސްޓީއޯ އިން ތިން ގޯލު ޖެހީ ވެސް ދެ ވަނަ ހާފުގަ އެވެ. އެ ޓީމަށް ލީޑުނަގައިދިން ގޯލު ދެ ވަނަ ހާފުގެ ކުރީކޮޅުގައި އިސްމާއިލް އީސާ (މެސީ) ޖެހިއިރު، އެ ޓީމުގެ އަނެއް ދެ ގޯލު މެޗުގެ ފަހުކޮޅުގައި ޖެހީ އަހުމަދު ރިޒުވާން (ރިޒޭ) އާއި މުހައްމަދު އިސާމް އެވެ.
ގްރޫޕް ޑީގައި އެމްއޭސީއެލް އިން ޕޮލިސް ކޮޅަށް ގޯލުތައް ޖެހީ، އަޒްޔާން އިބްރާހިމް، އަޖުމަލް އަހުމަދު އަދި އަލީ ޝާފިއު އެވެ.
އިއްޔެ ހަވީރު، ގްރޫޕް ސީގައި ޓީމު އެލައިޑާއި ގޭސް ކްލަބް ކުޅުނު މެޗު 4-4 އިން އެއްވަރުވިއިރު، މި ނަތީޖާއާ އެކު އެ ގްރޫޕުން ފުރަތަަމަ ދެ މެޗުން މޮޅުވި އެމްޕީއެލް ވަނީ ގަދަ 16 ބުރަށް ދަތުރުކޮށްފަ އެވެ. އިއްޔެގެ މެޗުގައި އެލައިޑްގެ ގޯލުތައް ޖެހީ އަހުމަދު ސުދައިސް އަލީ ދެ ގޯލާއި އަބްދުﷲ ޒުފަަރު މުހައްމަދު އަދި އަލީ އަމްޖަދު އެވެ. ގޭސް ކްލަބްގެ ނާއިފް ޝަފީގު (ސީއާރް3) ދެ ގޯލު ޖެހިއިރު، އެ ޓީމުގެ އަނެއް ގޯލުތައް ޖެހީ ހަސަން ސުފިއާން އަދި އަބްދުﷲ ހިޝާން އެވެ.
ސިފައިންގެ ކްލަބާއި އާސަންދަ ބައްދަލުކުރި މެޗުގެ ތެރެއިން.--- ފޮޓޯ: މުހައްމަދު ޝާބިން/ އަދަދު
ގްރޫޕް އެފްގައި ރޭ ކްލަބް އާސަންދަ އަތުން ދިވެހި ސިފައިންގެ ކްލަބް ވަނީ 3-1 އިން މޮޅުވެފަ އެވެ. ސިފައިން ޓީމުގެ އަހުމަދު ހާމީ ނަޖާހު ދެ ގޯލު ޖެހިއިރު، އަނެއް ލަނޑު ޖެހީ އިބްރާހިމް ފާރިޝް އަހުމަދު އެވެ. އާސަންދަ ޓީމުގެ ލަނޑު ޖެހީ މުހައްމަދު އަނާން އެވެ.
ކްލަބް މޯލްޑިވްސް ކްލަސިކް މުބާރާތުގައި ރޭ ދެ މެޗެއް ކުޅުނެވެ. ޓީމު އެމްވައިއެސް (ޔޫތު މިނިސްޓްރީ) އާއި ޓްރޭޑް ކްލަބްގެ މެޗު 2-2 އިން އެއްވަރުވިއިރު، ހުޅުމާލެ ހޮސްޕިޓަލް އަތުން ޕީއެސްއެމް ބަލިވީ 4-2 އިންނެވެ. ޔޫތު މިނިސްޓްރީގެ ލަނޑުތައް ޖެހީ ފަރުހާން ޔޫސުފް އެވެ. ޓްރޭޑް ކްލަބުން ގޯލު ޖެހީ އަބްދުﷲ އިރުފާން އާއި އާދަމް އާޒިމް އެވެ. ހުޅުމާލެ ހޮސްޕިޓަލްގެ ގޯލުތައް ޖެހީ އަހުމަދު ހުމާމް ދެ ގޯލާއި އަހުމަދު އިލްޔާސް ޝިނާން އަދި މޫސާ ކަލީމް ގާސިމް އެވެ. ޕީއެސްއެމްގެ ދެ ގޯލު ޖެހީ، ހުސެއިން ހަމީދު އާއި ހުސެއިން އަމީން ނަސީރު އެވެ.
ކްލަބް މޯލްޑިވްސްގެ މުބާރާތްތަކުގެ މެޗުތައް ދެން އޮންނާނީ މިރެ އެވެ. އެ ގޮތުން، 20:15 ގައި ފަށާނީ ކްލަބް މޯލްޑިވްސް ކްލަސިކްގައި އެޗްއެސްޕީއެން އާއި ހޯމްއެފެއާޒް ރެކްރިއޭޝަން ކްލަބް ބައްދަލުކުރާ މެޗާއި ކްލަބް މޯލްޑިވްސް ކަޕްގައި ކްލަބް ފެން އާއި ޕްރިޒަން ކްލަބް ބައްދަލުކުރާ މެޗެވެ. އެ އަށް ފަހު، 21:45 ގައި ކުޅޭނީ ޓީމު ފެނަކަ އާއި މީޑިއާނެޓްގެ މެޗާއި އާރްއާރްސީ އަދި ކްލަބް ޓީއެމްއޭ އެވެ.
