މިހާރު ކުރިއަށްދާ ކްލަބް މޯލްޑިވްސް ކަޕް ފުޓްސަލް މުބާރާތުގައި ކުޅުނު ދެ ވަނަ މެޗުތަކުން މޮޅުވެ، ކްލަބް އާބަންކޯ އާއި މޯލްޑިވްސް ޕޯޓްސް ލިމިޓެޑް (އެމްޕީއެލް) މުބާރާތުގެ ގަދަ 16 ބުރާ ގާތަށް ޖެހިލައިފި އެވެ.
ގްރޫޕް ސީގައި ރޭ އެމްޕީއެލް އިން ވަނީ 10-2 ކްލަބް ޓީޓީއެސް ބަލިކޮށްފަ އެވެ. އެމްޕީއެލް، އެ ގްރޫޕްގެ އެއް ވަނައިގައި އޮތީ ދެ މެޗުން ހަ ޕޮއިންޓާ އެކު އެވެ. ގްރޫޕް ޑީގައި ކްލަބް އިމިގްރޭޝަން އަތުން 4-0 އިން މޮޅުވެ، އާބަންކޯ ވަނީ އެ ގްރޫޕްގެ އެއް ވަނަ އަށް ޖެހިލައިފަ އެވެ. ދެ ވަނައިގައި އޮތީ ތިން ޕޮއިންޓާ އެކު ޓީމު އެފްއެސްއެމް އެވެ.
އެމްޕީއެލް ޓީމަށް ރޭގެ މެޗުގައި ލަނޑުތައް ޖަހައިދިނީ އެ ޓީމުގެ އަހުމަދު ބައްސާމް މުހައްމަދާއި އީރާންގެ ކުޅުންތެރިޔާ، މަހުދީ ބަހްމާނީ ކޮންމެ ކުޅުންތެރިއަކު ދެ ގޯލާއި، އަހުމަދު ހުސެއިން (އައްމަޑޭ)، މުހައްމަދު ވިޝާހު އިބްރާހިމް، އިބްރާހިމް އަތީގް ހަސަން (އިއްބެ)، މުހައްމަދު ސާދު ނިޒާރު އަދި މުހައްމަދު ޔަފާއު (ޔާ) އެވެ. ޓީޓީއެސްގެ ލަނޑުތައް ޖެހީ މުހައްމަދު ނާފިއު އާއި އަހުމަދު ރިޒްވާން އިސްމާއިލް އެވެ.
ލަނޑު ޖެހުމަށް ފަހު އެމްޕީއެލް ޓީމުގެ ބަހްމާނީ (ވ) އުފާފާޅުކުރަނީ.--- ފޮޓޯ: އަބްދުﷲ އިޔާން/ އަދަދު
އާބަންކޯގެ ކެޕްޓަން، އަބްދުﷲ ޝާފިއު (ޝާއްޕެ) ސަސްޕެންޝަނަށް ފަހު އެނބުރި އައިސް ރޭގެ މެޗުގައި އިމިގްރޭޝަން ކޮޅަށް ވަނީ ގޯލު ޖަހައި، މޮޅު ކުޅުންތެރިއަކަށް ހޮވިފަ އެވެ. އެ ޓީމުގެ އަނެއް ލަނޑުތައް ޖެހީ ހުސެއިން ސުހެއިލް، ޔާމިން މުހައްމަދު އަދި މުހައްމަދު ސާމިން ނަސީރު އެވެ.
މީރާ އާއި ވެމްކޯ މޮޅުވިއިރު، ޕްރިޒަން އާއި ޔޫތު މިނިސްޓްރީ އެއްވަރު
ކްލަބް މޯލްޑިވްސް، އެއިޓީން ތާޓީ ކްލަސިކް މުބާރާތުގައި އިއްޔެ ތިން މެޗެއް ކުޅުނެވެ. އެ ގޮތުން، ގްރޫޕް އޭގައި ވެމްކޯ އިން ވަނީ 11-0 އިން އައިޖީއެމްއެޗް ކްލަބް ބަލިކޮށްފަ އެވެ. ވެމްކޯގެ ފަޒްލާ އިބްރާހިމް ފަސް ގޯލު ޖެހިއިރު، އެ ޓީމުގެ އަނެއް ގޯލުތައް ޖެހީ ފާތިމަތު ލީސާ ދެ ގޯލާއި މަރިޔަމް ލަމީސް، އައިމިނަތު ޝިޔާނާ މުހައްމަދު، އައިމިނަތު ޝުދާ އަދި އައިމިނަތު ރިސްމާ އެވެ.
އެއިޓީން ތާޓީ ކްލަސިކް މުބާރާތުގައި ވެމްކޯ އާއި އައިޖީއެމްއެޗް ކުޅުނު މެޗުގެ ތެރެއިން.--- ފޮޓޯ: އަބްދުﷲ އިޔާން/ އަދަދު
ގްރޫޕް ބީގައި މީރާ އިން ސަލީމާ ސަމީރުގެ ގޯލުން ހުޅުމާލެ ހޮސްޕިޓަލް ބަލިކުރިއިރު، އެ ގްރޫޕްގައި ޕްރިޒަން ކްލަބާއި ޔޫތު މިނިސްޓްރީ ކުޅުނު މެޗު ނިމުނީ 1-1 އިން އެއްވަރުގެންނެވެ. މިނިސްޓްރީ ޓީމުގެ ސަދާ އެ ޓީމަށް ލީޑުނަގައިދިން ފަހުން، ޕްރިޒަންގެ ޝިބާހަތު ވަނީ އެއްވަރުކޮށްފަ އެވެ.
މުބާރާތުގައި މިރޭ ވެސް ހަ މެޗެއް ކުޅޭނެ އެވެ. އެ ގޮތުން، މިއަދު ހަވީރު ކުޅޭނީ ކްލަބް މޯލްޑިވްސް ކަޕްގެ ގްރޫޕް ސީ އާއި ޑީގެ މެޗުތަކެވެ. އެލައިޑުން ކުޅޭނީ ގޭސް ކްލަބާ އެވެ. އަދި އެމްއޭސީއެލް ބައްދަލުކުރަނީ ޕޮލިހާ އެވެ. މިރޭ، 20:05 ގައި ކުޅޭނީ ކްލަބް މޯލްޑިވްސް ކްލަސިކްގެ ގްރޫޕް އޭގައި ޓްރޭޑް ކްލަބާއި ޔޫތު މިނިސްޓްރީ ކުޅޭ މެޗާއި ގްރޫޕް ބީގައި ހުޅުމާލެ ހޮސްޕިޓަލާއި ޕީއެސްއެމް ބައްދަލުކުރާ މެޗެވެ. އަދި މިރޭ ފަހު ދެ މެޗަށް ބަލާއިރު، ކްލަބް މޯލްޑިވްސް ކަޕްގައި އެސްޓީއޯ ރެކްރިއޭޝަން ކްލަބުން ޔުނައިޓެޑް ބީއެމްއެލްއާ ބައްދަލުކުރާއިރު، ދިވެހި ސިފައިންގެ ކްލަބާއި ކްލަބް އާސަންދަ އެވެ.
