ސެޕްޓެމްބަރު 9، ގައި އޮންނަ ރިޔާސީ އިންތިހާބުގައި ވާދަކުރާނެ ދަ ޑިމޮކްރެޓްސްގެ ކެންޑިޑޭޓަކު ކަނޑައެޅުމަށް ބާއްވާ ޕްރައިމަރީއަށް ކުރިމަތިލާން ހުޅުވާލައި ފޯމު ހުށަހަޅަން ދެ ދުވަހުގެ މުއްދަތެއް ދީފި އެވެ.
ޑިމޮކްރެޓްސް އިން ދެންމެ ކުރި ޓްވީޓެއްގައިވާ ގޮތުން، އެ ޕާޓީގެ އެތެރޭގެ ޕްރައިމަރީއަށް ކުރިމަތިލާން ހުޅުވާލާފައިވަނީ އަންނަ ހޮނިހިރު ދުވަހުގެ ހަވީރު 4:00 ޖަހާއިރުގެ ނިޔަލަށެވެ.
އޮންލައިންކޮށް އަދި ޕާޓީގެ އިދާރާއަށް ވެސް ގޮސް ފޯމު ހުށަހެޅޭނެ ކަމަށް އޭގައިވެ އެވެ. އަދި ޕާޓީގެ މައި އިދާރާ ހުޅުވާފައި ހުންނާނީ ހެނދުނު 10:00 އިން ހަވީރު 4:00 އަކަށް ކަމަށް ބުނެފައިވެ އެވެ.
ދަ ޑިމޮކްރެޓްސްއަކީ، އެމްޑީޕީގެ ރިޔާސީ ޕްރައިމަރީން ލިބުނު ނާކާމިޔާބީއަށް ފަހު އެ ޕާޓީގެ ރައީސް ކަމުގައި ހުންނެވި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އުފެއްދެވި "ފިކުރެއްގެ ދިރުން" ފެކްޝަނުން ހެދި ޕާޓީއެކެވެ.
އެ ޕާޓީ އުފެއްދުމުގެ މަސައްކަތް ފެށިގެން އައީ "ފިކުރެއްގެ ދިރުން" ނަމުގައި ވަކި ފެކްޝަނެއް ހަދައިގެން އެމްޑީޕީގެ އެތެރެއިން ސަރުކާރާ ދެކޮޅަށް މަސައްކަތް ކުރަމުން ދިޔުމުން ބައެއް މީހުން ސަރުކާރު މަގާމުތަކުން ދުރުކޮށް އަދި ޕާޓީން ވަކިކުރަން ފެށުމުންނެވެ.
ޑިމޮކްރެޓްސްގެ ރިޔާސީ ޕްރައިމަރީއަށް އެއްވެސް ޝައުގެއް ހުރިތޯ ނޫސްވެރިޔަކު ސުވާލު ކުރުމުން ނަޝީދު ވިދާޅުވީ އެމަނިކުފާނުގެ އެއްވެސް ޝައުގެއް އެ ކަމަށް ނެތް ކަމަށެވެ. ނަޝީދު ވަނީ އިދިކޮޅު ސިޔާސީ ހުރިހާ ޕާޓީއަކުން ގުޅިގެން އެއް ކެންޑިޑޭޓަކު ނެރުމުގެ ހިޔާލު ވެސް ކުރިއަށް ނެރުއްވައިފަ އެވެ.
ނަޝީދަކީ މީގެ ކުރިން 2008، 2013، އަދި 2018 ގައި ވެސް އެމްޑީޕީގެ ޕްރައިމަރީން ކަނޑައެޅި އެ ޕާޓީގެ ރިޔާސީ ކެންޑިޑޭޓެވެ. ނަމަވެސް 2018 ގައި އެމަނިކުފާނުގެ މައްޗަށް ޖަލު ހުކުމެއް އިއްވާފައި އޮތުމުން، އެމްޑީޕީގެ ކޮންގްރެސް މެދުވެރިކޮށް އޭރުގެ އެމްޑީޕީގެ ޕާލިމެންޓްރީ ގްރޫޕްގެ ލީޑަރު އިބްރާހިމް މުހައްމަދު ސޯލިހަށް ޓިކެޓު ދިނުމަށް ނިންމީ އެވެ.
ރައީސް ސޯލިހު ވެރިކަމާ ހަވާލުވެވަޑައިގެންނެވި ފަހުން އެމްޑީޕީގެ އެތެރޭގެ ގުނަންތައް އޮތީ އެމަނިކުފާނުގެ ބާރުގެ ދަށުގަ އެވެ. އަދި އެމްޑީޕީގެ އެތެރޭގައި ބޭއްވި ބޮޑެތި އިންތިހާބުތައް ވެސް ކާމިޔާބު ކުރެއްވީ އެމަނިކުފާނެވެ. އަދި ރިޔާސީ ޕްރައިމަރީ ކާމިޔާބު ކުރައްވައި، މި ފަހަރުގެ ރިޔާސީ އިންތިހާބުގައި ވާދަކުރައްވާ އެމްޑީޕީގެ ރިޔާސީ ކެންޑިޑޭޓް ރައީސް ސޯލިހެވެ.
