ޔަމޫނާ ކޯރު ފުރިގެން ބަންޑުންވުމުގެ ސަބަބުން އިންޑިއާގެ ވެރިރަށް ނިއު ދިއްލީގެ މުހިއްމު ގިނަ މަގުތަކެއްގައި ފެންބޮޑުވެއްޖެ އެވެ.
މިދިޔަ ބުދަ ދުވަހުން ފެށިގެން ކޯރުގެ ފެންގަނޑު ދަނީ އުފުލެމުންނެވެ. އެގޮތުން 45 އަހަރުގެ ތެރޭގައި ނުއުފުލޭހާ ބޮޑަށް ފެންގަނޑު މިހާރު ވަނީ އުފުލިފަ އެވެ.
ކޯރު ކައިރީގައި ބިންތިރި ހިސާބުތަކުގައި އުޅޭ އެތައް ހާސް ބަޔަކު އިވެކުއޭޓްކޮށްފައިވާ އިރު، ޓްރެފިކަށް ވެސް ބޮޑެތި ބަދަލުތަކެއް ގެނެސްފައިވެ އެވެ.
މި އަހަރުގެ ޖޫން މަހު ފެށި ވިއްސާރަ މޫސުމުގައި އުތުރު އިންޑިއާއަށް ވަނީ ރިކޯޑް މިންވަރަށް ވާރޭ ވެހިފަ އެވެ. ހިމާޗަލް ޕްރަދޭޝް ސްޓޭޓުން 88 މީހުން މަރުވެފައިވާ އިރު، ޕަންޖާބާއި ހަރްޔާނާ ފަދަ ސްޓޭޓްތަކުގައި ވެސް ދަނީ ފެންބޮޑުވަމުންނެވެ.
ފެންބޮޑުވެފައި ވާތީ ދިއްލީގެ ސްކޫލްތަކާއި ކޮލެޖުތަކާއި ޔުނިވާސިޓީތަައް އާދީއްތަ ދުވަހާ ހަމައަށް ބަންދުވާނެ ކަމަށް ދިއްލީގެ ޗީފް މިނިސްޓަރު އަރްވިންދް ކެޖްރިވާލް ނޫސްވެރިންނަށް ވިދާޅުވި އެވެ.
ސަރުކާރުގެ ގިނަ މުވައްޒަފުން ވެސް ގޭގައި ތިބެގެން މަސައްކަތް ކުރެވޭނެ ކަމަށް ވަނީ އަންގައިފަ އެވެ. ޕްރައިވެޓް އޮފީސްތަކަށް ވެސް ލަފާދިނީ އެގޮތަށް އަމަލު ކުރުމަށެވެ.
ފެން ސާފުކުރާ ތިން ޕްލާންޓެއް ބަންދު ކުރަން ޖެހިފައި ވާތީ، ދުވަސްކޮޅެއް ވަންދެން ފެން ރޭޝަންކޮށް، ފެނުގެ ދަތިކަން ކުރިމަތިވެދާނެ ކަމަށް ކެޖްރިވާލް ވިދާޅުވި އެވެ.
