ކުރީގެ ޓުއަރިޒަމް މިނިސްޓަރު އަލީ ވަހީދު މިއަދު ރާއްޖެ ވަޑައިގަންނަވާއިރު އޭނާގެ މައްޗަށް ތަންފީޒުކުރަން ޖެހޭ ހުކުމެއް ނެތް ކަން ހާމަވެއްޖެ އެވެ.
މީގެ ކުރިން އަލީ ވަހީދު މައްޗަށް ސްޕްރީމް ކޯޓުގައި ހިނގި މައްސަލައެއްގެ ޗިޓު ފޮނުވުމުންވެސް ޖަވާބެއް ދީފައި ނުވާތީ ކޯޓުގެ ހުރުމަތްތެރިކަން ކަނޑާލުމުގެ މައްސަލައެއްގައި އަލީ ވަހީދުގެ މައްޗަށް ދެ މަހާއި 12 ދުވަހުގެ ޖަލު ހުކުމެއް އިއްވި އެވެ.
ނަމަވެސް, އަލީ ވަހީދު މާފަށް އެދި ދެ ފަހަރެއްގެ މަތިން ސިޓީއެއް ފޮނުވުމުން، ކޯޓުގެ ހުރުމަތް ރައްކާތެރިކުރުމާ ބެހޭ ގަވާއިދުގެ ދަށުން ސްޕްރީމް ކޯޓުން މާފުކޮށްދީފައިވާކަން އެ ކޯޓުން ވަނީ "އަދަދު" އަށް ކަށަވަރު ކޮށްދީފަ އެވެ.
އެ ގަވާއިދު ބުނާ ގޮތުން ކޯޓުގެ ހުރުމަތް ކެނޑިކަން ސާބިތުވެފައިވާ މީހަކު، އެ ކުށަށް ހިތާމަކުރާކަން ލިޔުމަކުން ކޯޓަށް އެންގުމާއެކު ތެދު ނިޔަތުގައި މާފަށް އެދިއްޖެ ހާލަތެއްގައި، އަދަބެއް ކަނޑަނާޅާ އެ ފަރާތެއް ދޫކޮށްލުމުގެ އިހުތިޔާރު ކޯޓަށް ލިބިގެންވެ އެވެ.
އަލީ ވަހީދުގެ މައްޗަށް ތަންފީޒުކުރަންޖެހޭ ހުކުމެއް ނެތްކަން ކޮމިޝަނާ އޮފް ޕްރިޒަންސް އަހުމަދު މުހައްމަދު ފުޅު ވެސް ވަނީ "އަދަދު" އަށް ކަށަވަރު ކޮށްދީފަ އެވެ. އެހެންކަމުން, މިއަދު އަލީ ވަހީދު ރާއްޖެ ވަޑައިގަންނަވާނީ މިނިވަނެއްގެ ގޮތުގަ އެވެ.
އަލީ ވަހީދު ރާއްޖެއަށް އެނބުރި ވަޑައިގަންނަވަނީ ދައުލަތުން އޭނާގެ މައްޗަށް އުފުލާފައިވާ ޖިންސީ ގޯނާގެ ދައުވާތައް ކުރިއަށް ނުގެންދިއުމަށް ނިންމި ފަހުންނެވެ. ދައުވާތައް ކުރިއަށް ނުގެންދިއުމަށް ދައުލަތުން ނިންމީ މިދިޔަ ޖޫން މަހު 14ގަ އެވެ.
އަލީ ވަހީދުގެ މައްސަލަ ކްރިމިނަލް ކޯޓުގައި ހިނގަމުންދަނިކޮށް، އޭނާ ރާއްޖެއިން ބޭރަށް ފުރި ގޮތަށް އަނބުރާ އައިސްފައި ނުވާތީ، މައްސަލަ ކުރިއަށްނުގެންދެވިގެން، ކޯޓުން ވަނީ ސެޕްޓެމްބަރު 22، 2022 ގައި މައްސަލަ އަނބުރާ ޕީޖީ އޮފީހަށް ފޮނުވާލައިފަ އެވެ. އަދި, ޕީޖީ އޮފީހުން ވަނީ އޮކްޓޯބަރު 6، 2022 ގައި އެ މައްސަލަ އަނބުރާ ފުލުހުންނަށް ފޮނުވާލައިފަ އެވެ.
ޕީޖީ އޮފީހުން ބުނީ، މައްސަލަ އަނބުރާ ފުލުހުންނަށް ފޮނުވައިލީ ، އަނިޔާ ލިބުނު ކަމަށް ބުނާ މީހުންނާއި ހެކީންގެ ގޮތުގައި ބަޔާން ދިން މީހުން މައްސަލަ ކުރިއަށްގެންދަން ބޭނުން ނުވާ ކަމަށް ބަޔާންކޮށް، އެ އޮފީހަށާއި ފުލުހުންނަށް ސިޓީއެއް ފޮނުވުމުން ކަމަށެވެ.
