ބިންވެރިޔާ ސްކީމުގެ ވަގުތީ ލިސްޓުގައި ,ޝަރުތުހަމަވާ ކަމަށާއި ޖޮއިންޓްވެގެން ގޯތި ލިބުމުގެ ފުރުސަތު އޮތް ކަމަށް ލިސްޓްކޮށްފައިވާ މީހުން، އެލިސްޓުން ގޯތި ލިބޭ މީހުންނާ ޖޮއިންޓުވުމުގެ ފުުރުސަތު ހުޅުވާލައިފި އެވެ.
މި މަހުގެ 15 ގެ ނިޔަލަށް ހުޅުވާލި މި ފުރުސަތުގެ ތަފުސީލު ޕްލޭނިން މިނިސްޓްރީން މިއަދު ވަނީ ގެޒެޓުކޮށްފަ އެވެ. އެ އިއުލާނުގައި ބުނެފައިވަނީ މިގޮތަށް ޖޮއިންޓް ކުރުމަށް އެދޭ އެޕްލިކޭޝަނެއް ބަލައިގަންނާނީ ޖޮއިންޓްވާންއެދޭ ފަރާތްތަކުން ފޮނުވާ ރިކުއެސްޓު، ގޯތި ލިބޭ ފޯމުގެ ލީޑިން ބަލައިގަތުމުން ކަމަށެވެ.
ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވީ، މި ފުރުސަތުގެ ދަށުން ވަގުތީ ލިސްޓުގައި ހިމެނޭ "ޝަރުތުހަމަވޭ ޖޮއިންޓްވެގެން ގޯތި ލިބުމުގެ ފުރުސަތުއޮތް" ފަރާތްތަކުގެ މެދުގައި ބިންވެރިޔާ އުސޫލާ އެއްގޮތައް ޖޮއިންޓްވުމަށް ހުޅުވާލާފައިވާ ފުރުސަތުގެ އިތުރަށް، ވަގުތީ ލިސްޓްގައި ”ޝަރުތުހަމަވޭ ޖޮއިންޓް ވެގެން ގޯތި ލިބުމުގެ ފުރުސަތު އޮތް“ ސްޓޭޓަސް ގައި ހިމެނޭ ފަރާތްތަކުން ގޯތިލިބޭ ސްޓޭޓަސްގައި ހިމެނޭ ފަރާތްތަކާ ޖޮއިންޓް ވެވޭނެ ކަމަށެވެ.
"މި ގޮތަށް ޝަރުތުހަމަވެ ގޯތި ލިބޭ ސްޓޭޓަސްގައި ނުހިމެނޭ ފަރާތަކުން ”ގޯތި ލިބޭ“ ސްޓޭޓަސްގައި ހިމެނޭ ފޯމުގެ ލީޑިންގ އެޕްލިކަންޓަށް ރިކުއެސްޓް ފޮނުވޭނެ އިންތިޒާމް ޕޯޓަލްގައި މިހާރުވާނީ ހަމަޖެހިފައި ، މިގޮތުން ރިކްއެސްޓް ފޮނުވާ ފަރާތަކީ ގޯތިލިބޭ ފޯމުގެ ލީޑިންގ އެޕްލިކަންޓާ ބިންވެރިޔާ އުސޫލުގެ ޖޮއިންޓް ވުމުގެ ޝަރުތުހަމަވާ ފަރާތަކަށް ވާންޖެހޭނެ" ބިންވެރިޔާ ކޮމިޓީގެ ޗެއާކަންވެސް ކުރައްވާ އަކްރަމް ވިދާޅުވި އެވެ.
ބިންވެރިޔާ ސްކީމްގެ ދަށުން ގޯއްޗަށް އެދި 23،088 މީހުންގެ ފަރާތުން، 15،164 އެޕްލިކޭޝަން ހުށައަޅާފައިވެ އެވެ. ވަކިން ހުށަހެޅި މީހުންނާއި ޖޮއިންޓް ފޯމު ހުށަހެޅި މީހުންނާއެކު ލިސްޓްގައި ގޯތި ލިބޭ މީހުންގެ ތެރޭގައި 10،314 މީހުން ހިމެނެ އެވެ.
ބިންވެރިޔާ ސްކީމްގެ ދަށުން ގޯއްޗަށް ހުށައެޅި ފަރާތްތަކުގެ ތެރެއިން، 19،857 މީހުން ހުށައެޅި، 12،794 ފޯމު ވަނީ ޝަރުތުހަމަވެފަ އެވެ.
ވަގުތީ ލިސްޓަށް ޝަކުވާ ހުށައެޅުމުގެ ފުރުސަތު ޖުލައިމަހުގެ 15 ވަނަ ދުވަހާއި ހަމައަށް ވަނީ ހުޅުވާލާފައިފަ އެވެ. ދާއިމީ ލިސްޓު އިއުލާނު ކުރާނީ ޝަކުވާތައް ބެލުމަށްފަހު އެވެ.
ހުޅުމާލެއިން ދޭ ބިންތައް މިހާރު ސާފުކޮށްފައިވާއިރު، ގޯތި ދިނުމަށް ހަމަޖެހިފައިވާ ގުޅީފަޅު ހިއްކުމުގެ މަޝްރޫއު މިހާރު ދަނީ ކުރިއަށެވެ. އަދި, ގިރާވަރު ފަޅު ހިއްކުމަށް ވަނީ ޕްލޭންކުރެވިފަ އެވެ.
