މިދިޔަ ޖޫން މަހު އިންޑިއާގައި ހިނގި ނުރައްކާތެރި ރޭލު އެކްސިޑެންޓާ ގުޅިގެން ތިން މުވައްޒަފަކު ހައްޔަރުކޮށްފި އެވެ.
އެ އެކްސިޑެންޓުގައި 292 މީހުން މަރުވި އެވެ.
އިންޑިއާގެ އޮފިޝަލަކު ބުނީ ރޭލު ނިޒާމުގެ މުވައްޒަފުންގެ ގޮތުގައި ހިމެނޭ ތިން މީހަކު ހައްޔަރު ކުރީ ޕީނަލް ކޯޑްގައި މީހުން މެރުމާ ގުޅޭ ގޮތުން އޮތް މާއްދާގެ ދަށުން ކަމަށެވެ.
ޖޫން ދެ ވަނަ ދުވަހު އޮޑިއްޝާ ސްޓޭޓުގެ ބަހަންގަ ބާޒާރް ސްޓޭޝަނުގައި ހިނގި ހާދިސާގައި 1000 އަށް ވުރެ ގިނަ މީހުންނަށް އަނިޔާވި އެވެ.
އެ ހާދިސާ ހިނގީ ޕެސެންޖާ ރޭލަކާއި މުދާ އުފުލާ ރޭލެއް ޖެހި، ރޭލު ދަގަނޑުން ކައްސާލައި އިތުރު ޕެސެންޖާ ރޭލެއްގައި ޖެހިގެންނެވެ.
އިހުމާލު ހިމެނޭތޯ ބެލުމަށް ސެންޓްރަލް ބިޔުރޯ އޮފް އިންވެސްޓިގޭޝަން (ސީބީއައި) އިން ވަނީ ޖިނާއީ ތަހުގީގެއް ފަށައިފަ އެވެ.
އިންޑިއަން ރެއިލްވޭޒްއަަކީ ދުނިޔޭގެ ހަތަރު ވަނައަށް އެންމެ ބޮޑު ރޭލު ނެޓްވޯކެވެ. އެ ކުންފުނި ހިންގަނީ ދައުލަތުގެ ރެއިލްވޭ ބޯޑުންނެވެ. އެ ބޯޑު އޮންނަނީ ރެއިލްވޭ މިނިސްޓްރީގެ ދަށުގަ އެވެ.
