ޗައިނާގައި ޔުނިވާސިޓީއަށް ވަނުމުގެ ގޮތުން ހަދަން ޖެހޭ އެންޓްރެންސް އިމްތިހާނުން 27 ވަނަ ފަހަރަށް ފެއިލްވެފައިވާ ކަމަށް އެ ގައުމުގެ މިލިއަނަރަކު ބުނެފި އެވެ.
އެ އިމްތިހާނުން 750 ޕޮއިންޓު ލިބޭ އިރު، އުމުރުން 56 އަހަރުގެ ލިއާންގް ޝީ ބުނީ އޭނާ އެންމެ ފަހުން އިމްތިހާން ހަދައިގެން ވެސް ލިބުނީ އެންމެ 424 ޕޮއިންޓް ކަމަށެވެ.
އެއީ ޗައިނާގެ ޔުނިވާސިޓީއަކަށް ވަންނަން ބޭނުން ނަމަ ހޯދަން ޖެހޭ ޕޮއިންޓަށް ވުރެ 34 ޕޮއިންޓު މަދެވެ.
މި އަހަރު ގާތްގަނޑަކަށް 13 މިލިއަން ދަރިވަރުން އެ އިމްތިހާނު ހެދި އެވެ. ޔުނިވާސިޓީއިން ފުރުސަތު ހޯދަން ލިއާންގް ކުރާ މަސައްކަތަށް ވަނީ ބޮޑު ސަމާލުކަމެއް ލިބިފަ އެވެ.
އޭނާ ވަނީ 1983 ވަނަ އަހަރުން ފެށިގެން އެތައް ފަހަރަކު އެ ޓެސްޓު ހަދައިފަ އެވެ. ޗައިނާގެ ނޫސްތަކަށް ލިއާންގް ބުނީ އޭނާގެ ހުވަފެން ހަގީގަތަކަށް ހެދޭނެ ކަމާ މެދު މިހާރު ޝައްކު އުފެދޭ ކަމަށެވެ.
ޔުނިވާސިޓީއިން ފުރުސަތު ހޯދަން ބޭނުން ކޮންމެ ދަރިވަރަކު ވެސް ހަދަން ޖެހޭ ޓެސްޓުގައި ހިމެނެނީ ޗައިނާ ބަހާއި، ހިސާބު، އިނގިރޭސި އަދި ސައިންސް ނުވަތަ ހިޔުމެނިޓީޒް ދާއިރާގެ މާއްދާއެއްގެ ސުވާލުތަކެވެ.
ޗައިނާ ސަރުކާރުގެ ތަފާސްހިސާބުން ދައްކާ ގޮތުގައި 2021 ވަނަ އަހަރު އެ އިމްތިހާނުން ފާސްވެ ޔުނިވާސިޓީއަށް ވަނުމުގެ ފުރުސަތު ލިބުނީ 41.6 ޕަސެންޓު ދަރިވަރުންނަށެވެ.
