އިދިކޮޅު ޕީޕީއެމް/ޕީއެންސީއާއި އަލަށް އުފައްދާ ދަ ޑިމޮކްރެޓްސްއާ ދެމެދު އެންމެ ބޮޑު ހިޔާލުތަފާތުވުމެއް މީގހެ ކުރިން އޮތް ކަންތައް ކަމަށްވާ "އިންޑިއާ އައުޓް" ހަރަކާތް މުޅިން ހުއްޓައި ނުލިޔަސް ދެބައިމީހުން ގުޅިގެން މަަސައްކަތް ކުރެެވޭނެ ކަމަށް ޑިމޮކްރެޓުން މިއަދު ބުނެފި އެވެ.
ޕީޕީއެމްގެ އޮފީހުގައި މިއަދު ކުރިއަށް ގެންދިޔަ މަޝްވަރާތަކަށް ފަހު ބޭއްވި ޖޮއިންޓް ޕްރެސް ބްރީފިންގައި ނޫސްވެރިއަކު ކުރި ސުވާލަކަށް، ޑިމޮކްރެޓްސްގެ ފަރާތުން ޖަވާބުދެއްވަމުން ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވީ ކަންކަމުގައި ދޫދޭން ދެޕާޓީން ވެސް އެއްބަސްވާ ކަމަށެވެ.
"ސަރުކާރު ބަދަލުކުރަން ކުރަން ޖެހުނު ހުރިހާ ކަމެއް އަޅުގަނޑުމެން ކުރާނެ ހަމަ އެކުއެކީގައި. އެހެންވީމާ ކޮންމެ ކަމެއް ވެސް އެއީ ހަމަ ޕޮސިބަލް ކަންކަން އިނގޭތޯ،" އާޒިމް ވިދާޅުވި އެވެ.
އޭނާ މި ޖަވާބުދެއްވީ "ޕީޕީއެމުން ހިންގާ އިންޑިއާ އައުޓް ހަރަކާތް ފަދަ އެއްވެސް ހަރަކާތެއްގައި ޑިމޮކްރެެޓްސް ބައިވެރިވާތަން ފެނިގެން ހިނގައިދާނެތޯ؟" ނޫސްވެރިއަކު ސުވާލުކުރުމުންނެވެ.
އާޒިމް ވިދާޅުވީ ޑިމޮކްރެޓްސްގެ ފިކުރާ އެއްގޮތަށް ޕީޕީއެމް/ޕީއެންސީ، އެއް ދުވަހުގެ ތެރޭގައި މުޅިން ބަދަލުވެގެން ނުދާނެ ކަމަށާއި އެކަންތަައްްތަކަށް ވަގުތު ނަގާނެ ކަމަށެވެ.
"އެހެންވީމާ އެކަންކަމާ ގަބޫލުވެސް ވާން ޖެހޭނެ،" އޭނާ ވިދާޅުވި އެވެ.
ޔާމީނު މިނިވަންކުރަން ގޮވާލައި ޕީޕީއެމް/ޕީއެންސީން ކުރާ މަސައްކަތުގައި ޑިމޮކްރެޓްސް ބައިވެރިވާނެތޯ ނޫސްވެރިއަކު ސުވާލުކުރުމުން އާޒިމް ވިދާޅުވީ އިންސާފުވެރި ޝަރީއަތެއް އޮތުމަކީ އަބަދުވެސް އެދޭކަމެއް ކަމަށް ޑިމޮކްރެޓްސް އަބަދުވެސް ބުނަމުން އަންނަ ކަމަށެވެ. އެހެން ނަމަވެސް އޭނާ ވިދާޅުވި ގޮތުގައި ކަންބޮޑުވާ ކަމަކީ އެމްއެމްޕީއާރުސީގެ ހިޔާނާތުގެ ތުހުމަތު, އެތައް ބަޔަކަށް އޮތް އިރު ޔާމީން ގިނިކަންޏާ ޖަލަށް ލާފައި ވުމެވެ.
"ހަމަ އެކަނި އެއް ބޭފުޅަކަށް ހުކުމްކޮށް، ޖަލަށް ލާފައި އިންނަ އިނުން، އެއީ އަޅުގަނޑު ހަމަ އަބަދުވެސް ކަންބޮޑުވާކަމެއް،" އާޒިމް ވިދާޅުވި އެވެ.
ޔާމީން މިނިވަން ކުރަން ގޮވާލައި ކުރާ މަސައްކަތުގައި ދަ ޑިމޮކްރެޓްސްގެ ބޭފުޅުން ބައިވެރިވެވަޑައިގަންނަވާތަން ފެނިގެން ދާނެތޯ ކުރި ސުވާލަށް އާޒިމް ސީދާ ޖަވާބެއް ނުދެއްވާތީ ނޫސްވެރިޔާ ސުވާލު ތަކުރާރުކުރުމުން އޭނާ ވިދާޅުވީ އެ ޕާޓީގެ ބައިވެރިވުން "ބޮޑުކޮށް ފެނިގެންދާނެ" ކަމަށެވެ.
މިއަދުގެ ބްރީފިން ގައި ޕީޕީއެމްގެ ނައިބުރައީސް އަދި ރައްޔިތުންގެ މަޖިިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވީ ޕީޕީއެމުން ޑިމޮކްރެޓުންނާ އެކު މަސައްކަތް ކުރަނީ ރައީސް ޔާމީނުގެ އިރުޝާދާ އެކުގައި ކަމަށެވެ.
