ގާހިރާ، މިސްރު (ޖޫން 25) - އިންޑިއާގެ ބޮޑު ވަޒީރު ނަރެންދްރަ މޯދީ މިސްރަށް ވަޑައިގެން އެ ގައުމުގެ ރައީސް އަބްދެލް ފައްތާހް އަލް ސިސީއާ ބައްދަލުކުރައްވައިފި އެވެ.
ދެ ލީޑަރުންގެ މަޝްވަރާގައި އެއްބަސްވީ މިސްރުގައި އިންޑިއާގެ އިންވެސްޓްމަންޓު އިތުރު ކުރުމަށެވެ. މިސްރަކީ އަރަބި ގައުމުތަކުގެ ތެރެއިން އެންމެ އާބާދީ ބޮޑު ގައުމެވެ.
މިއީ 2014 ވަނަ އަހަރު ވެރިކަމަށް ވަޑައިގެންނެވި ފަހުން މޯދީ މިސްރަށް ކުރެއްވި ފުރަތަމަ ދަތުރެވެ. މިސްރަށް ވަޑައިގެންނެވީ އެމެރިކާއަށް ކުރެއްވީ ދަތުރަަށް ފަހު އެވެ.
މިދިޔަ ޖެނުއަރީ މަހު ސިސީ އިންޑިއާއަށް ކުރެއްވި ދަތުރުގައި ވަނީ ދެ ގައުމުގެ ސްޓްރެޓެޖިކް ގުޅުމާ ބެހޭ މަޝްވަރާ ކުރައްވައިފަ އެވެ. މޯދީގެ މި ދަތުރުގެ ތެރެއިން އޭގެ އެއްބަސްވުމުގައި ސޮއިކުރެއްވި އެވެ.
އިއާދަކުރަނިވި ހަކަތައިގެ ދާއިރާއިން މިސްރުގައި އިންޑިއާގެ އިންވެސްޓްމަންޓް އިތުރު ކުރަން ނިންމި އިރު، ވިޔަފާރީގެ ގުޅުން އެތައް ބިލިއަން ޑޮލަރަަކުން ވަރުގަދަ ކުރަން ވެސް ނިންމި އެވެ.
މިސްރުގެ އެންމެ ޝަރަފުވެރި ލަގަބު "އޯޑާ އޮފް ދަ ނައިލް" މޯދީއަށް އެރުއްވި އިރު، ދެ ގައުމުގެ މެދުގައި ސީދާ ވައިގެ ދަތުރުތައް އިތުރު ކުރަން ވެސް އެއްބަސްވި އެވެ.
މިސްރާއި އިންޑިއާއާ ދެމެދު މިދިޔަ އަހަރު ހަތް ބިލިއަން ޑޮލަރުގެ ވިޔަފާރި ކުރި އެވެ. މި ދަތުރަށް ފަހު އެ އަދަދު އެތައް ގުނައަކަން އިތުރުވާން މަގުފަހިވާނެ އެވެ.
