ދި ޑިމޮކްރެޓްސް އުފެއްދުމުގެ ހުއްދަ އިލެކްޝަންސް ކޮމިޝަން (އީސީ) އިން ހިފެހެއްޓި ކަމަށް ބުނެ އެ ޕާޓީން މައްސަލަ ސިވިލް ކޯޓަށް ހުށަހަޅައިފި އެވެ.
އިލެކްޝަންސް ކޮމިޝަނާމެދު އޮތް އިތުބާރު ގެއްލިފައިވާ ކަމަށް ބުނެ ރާއްޖޭގެ ބައެއް ސިޔާސީ ޕާޓީތަކުން ގުޅިގެން ބޭއްވި ނޫސްވެރިންގެ ބައްދަލުވުމުގައި ޑިމޮކްރެޓްސްގެ މުއައްސިސް ހަސަން ލަތީފް ވިދާޅުވީ އެ ޕާޓީ އުފެއްދުމުގެ ހުއްދަ ނުދީ, އީސީން ހިފަހައްޓާފައިވާ ކަމަށެވެ.
ހަސަން ލަތީފް ވިދާޅުވީ ޑިމޮކްރެޓްސް އުފައްދަން ބޭނުންވާ 3000 މެންބަރުންގެ ފޯމު ޖޫން 1، ވަނަ ދުވަހު އީސީއަށް ހުށަހެޅުމަށްފަހު އެ ފޯމުތައް ވެރިފައި ކުރުމުގެ ކަންކަން އީސީން ދެ ހަފްތާ ތެރޭގައި ނިންމާފައިވާ ކަމަށެވެ. ނަމަވެސް އުފެއްދުމުގެ ހުއްދަ ނުދީ ހިފަހައްޓާފައިވާ ކަމަށެވެ.
އޭނާ ވިދާޅުވީ, އުފެއްދުމުގެ ހުއްދަ ދިނުމަށް ގާނޫނުން އީސީއަށް ދޭ ތިން މަހަކީ އެއީ ފޯމުތައް ވެރިފައި ކުރުމަށް ދޭ މުއްދަތެއް ކަމަށެވެ. އެހެންކަމުން, އެ މަސައްކަތް ނިމުމުން, އިތުރަށް ޕާޓީ އުފެއްދުމުގެ ހުއްދަ ނުދީ ހިފެހެއްޓޭނެ ގާނޫނީ ހަމައެއް ނެތް ކަމަށެވެ. އަދި އެ މައްސަލަ މިހާރު ސިވިލް ކޯޓަށް ހުށަހަޅާފައިވާ ކަމަށް ވެސް އޭނާ ވިދާޅުވި އެވެ.
ހަސަން ލަތީފް މިހެން ވިދާޅުވިއިރު, އީސީން ވަނީ ޑިމޮކްރެޓްސް އުފެއްދުމުގެ ހުއްދަ އަންނަ އާދިއްތަ ދުވަހު ދިނުމަށް ނިންމާފަ އެވެ. އެކަމާ ގުޅިގެން ހަސަން ލަތީފް ވިދާޅުވީ, ފޯނުން ގުޅާފައި, ޕާޓީ އުފެއްދުމުގެ ހުއްދަ ދޭނެ ކަން އެންގި ނަމަވެސް އީސީއަށް އިތުބާރު ނުކުރެވޭ ކަމަށެވެ. ސަބަބަކީ ބައްދަލުވުންތަކުގައި ދައްކާ ވާހަކަ އާއި ފޯނުން ގުޅައިގެން ދައްކާ ވާހަކަ ދިމާނުވާތީ ކަމަށް ވެސް އޭނާ ވިދާޅުވި އެވެ.
ދި ޑިމޮކްރެޓްސް އުފެއްދުމުގެ ހުއްދަ ހިފެހެއްޓި ކަމަށް ބުނެ ސިވިލް ކޯޓަށް ހުށަހެޅި ދައުވާ ފޯމުގައި ވަނީ, އެ ޕާޓީ އުފެއްދުމުގެ ހުއްދަ ލަސްނުކޮށް ދޭނެ ކަމަށް އީސީން އެންގުމަށްފަހު, އިތުރު ސަބަބަކާ ނުލާ ހުއްދަ ދިނުން ލަސްކުރަމުންދާ ކަމަށެވެ. އަދި އެއީ ޕާޓީ ރަޖިސްޓްރީވެގެން ދިއުން ލަސް ކުރުމުގެ ނިޔަތުގައި ކަމަށް ވެސް ޑިމޮކްރެޓްސް އިން ބުނެ އެވެ.
އީސީން ބުނާގޮތުން އަންނަ އާދިއްތަ ދުވަހު ހުއްދަ ދޭން ނިންމާފައި ވަނީ, އެއީ އީދު ޗުއްޓީއަށް ފަހު ޖެހޭ ފުރަތަމަ ރަސްމީ ދުވަހަށް ވާތީ އެވެ.
