އިލެކްޝަންސް ކޮމިޝަންގެ މެންބަރުކަމަށް އައްޔަނުކުރުމަށް ވެރިކަން ކުރާ ޕީއެންސީގެ ރެޖިސްޓްރާގެ މަގާމުގައި ހުންނެވި މުހައްމަދު ޝަކީލްގެ ނަން މަޖިލީހަށް ފޮނުވައިފި އެވެ.
އިލެކްޝަންސް ކޮމިޝަންގެ މެންބަރުކަމަށް އައްޔަނުކުރަން ފެންނަ ކަމަށް ރައީސުލްޖުމްހޫރިއްޔާ މުހައްމަދު މުއިއްޒު މަޖިލީހަށް ފޮނުއްވީ މުހައްމަދު ޝަކީލްއަކީ ހައްޖު ކޯޕަރޭޝަންގެ މެނޭޖިން ޑިރެކްޓަރުގެ މަގާމުގައި ވެސް ހުންނެވި ބޭފުޅާ އެވެ. ޕީއެންސީގެ ރެޖިސްޓްރާގެ މަގާމަށް އޭނާ އައްޔަނުކުރީ މިދިޔަ ޖެނުއަރީ 28 ގަ އެވެ.
އިލެކްޝަންސް ކޮމިޝަނުގެ މެންބަރުކަމުގެ ގޮނޑިއެއް ހުސްވީ އެ ކޮމިޝަނުގެ ރައީސްގެ މަގާމުގައި ހުންނެވި މުހައްމަދު ޒާހިދު އިސްތިއުފާ ދެއްވުމުންނެވެ. ސަރުކާރުގެ ފަރާތުން އިންތިހާއަށް ނުފޫޒު ފޯރުވަމުން ދިޔުމުގެ ސަބަބުން ޒާހިދު އެ މަގާމުން އިސްތިއުފާދެއްވީ މެއި 1، ގަ އެވެ.
މި ނޫހާ ވާހަކަ ދެއްކި މަސްދަރަކުން ބުނީ ޒާހިދު އިސްތިއުފާ ދެއްވިއިރު، އިލެކްޝަންސް ކޮމިޝަނަށް ސަރުކާރުގެ ފަރާތުން ވަރަށް ބޮޑެތި ނުފޫޒު ފޯރުވަމުންދިޔަ ކަމަށެވެ.
"އެހާ ބޮޑު ޕްރެޝަރެއް ސަރުކާރުން ކުރިމަތިވަމުންދާ ދަނޑިވަޅެއްގައި ޒާހިދު ކޮމިޝަނުގައި މަސައްކަތް ކުރަން ބޭނުން ނުވީ،" އަދާ ކުރާ ވަޒީފާގެ ސަބަބުން ނަން ހާމަ ކުރަން ޝަރުތުކޮށް މި ނޫހާ ވާހަކަ ދެއްކި މަސްދަރުން ބުންޏެވެ.
