ރައީސް އިބްރާހިމް މުހައްމަދު ސޯލިހުގެ ސަރުކާރުން ނިމުމަކަށް ގެނައުމަށް ކުރަންޖެހޭ ކަންކަމުގައި އެކުގައި މަސައްކަތް ކުރުމުގެ މަގްސަދުގައި އިދިކޮޅު ޕީޕީއެމް އާއި އުފެއްދުމުގެ މަރުހަލާގައި އޮތް ދި ޑިމޮކްރެޓްސްއިން ސިލްސިލާ މަޝްވަރާ ބައްދަލުވުންތަކެއް ފަށައިފި އެވެ.
ދެ ޕާޓީގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި ޕީޕީއެމްގެ ނައިބު ރައީސް އަހުމަދު ޝިޔާމް ވިދާޅުވީ ރިޔާސީ އިންތިހާބަށް ދެ މަސް ދުވަހަށް ވެފައިވާއިރު, ސަރުކާރު ޖަވާބުދާރީ ކުރުމާއި ސަރުކާރު ނިމުމަކަށް ގެންނަން ދެ ޕާޓީން ގުޅިގެން ކުރަންޖެހޭ މަސައްކަތްތައް ވަރަށް އަވަހަށް ތަރުތީބު ކުރާނެ ކަމަށެވެ.
ސަރުކާރުގެ ވަކިވަކި ކަންކަމަށް އަލިއަޅުއްވާލައްވަމުން މެދު ހެންވެއިރު ދާއިރާގެ މެމްބަރު އަލީ އާޒިމް ވަނީ ރާއްޖޭގެ ދަރަނި ބޮޑުވުމާއި މިނިވަން މުއައްސަސާތައް ސަރުކާރުގައި "ތާށިވެފައި" ހުރި މައްސަލަތަކުގައި ދެ ޕާޓީން އެކުގައި މަސައްކަތް ކުރަން ޖެހޭ ކަމަށް ވިދާޅުވެފަ އެވެ.
އާޒިމް ވިދާޅުވީ ޑިމޮކްރެކްޓްސް އިން ގަބޫލުކުރާ ގޮތުގައި އިންސާފުވެރި އިންތިހާބެއް ބާއްވާ ނަމަ ހުރިހާ ސިޔާސީ ލީޑަރުންނަށް ވެސް އިންތިހާބުގައި ވާދަކުރެވެން ޖެހޭނެ އެވެ. އެމްއެމްޕީއާރްސީ ހިޔާނާތުގެ މައްސަލައެއްގައި ޖަލުގައި ހުންނެވި ރައީސް ޔާމީން ދޫކޮށްލަން ޖެހޭތޯ ސުވާލުކުރުމުން އާޒިމް ވިދާޅުވީ އެ ހިޔާނާތުގެ މައްސަލަތަކަކީ ކޮންބޮޑުވާ މައްސަލަތަކެއް ކަމަށެވެ. ތަކުރާރުކޮށް ސުވާލުކުރުމުން ވެސް އާޒިމް ވަނީ އެ ސުވާލަށް ސީދާ ޖަވާބުދޭން ދެކޮޅު ހައްދަވާފަ އެވެ.
ޕީޕީއެމް އާއި ޑިމޮކްރެޓްސްއިން ގުޅިގެން މަސައްކަތްތަކެއް ފަށާފައިވާއިރު, އެ ދެ ޕާޓީން ވެސް ވަނީ އަންނަ ރިޔާސީ އިންތިހާބުގައި ކެންޑިޑޭޓަކު ނެރެން ނިންމާފަ އެވެ. ނޫސްވެރިންގެ ބައްދަލުވުމުގައި ޝިޔާމް ވިދާޅުވީ އެކުގައި މަސައްކަތް ކުރިއަށް ޕީޕީއެމްގެ މައިގަނޑު އަސާސްތައް ދޫކޮށްނުލައްވާނެ ކަމަށާއި މަސައްކަތް ކުރައްވާނީ އެއްބަސްވެވޭ ކަންކަމުގައި ކަމަށެވެ.
"އެކަކު އަނެކަކާ އިންނައިރު ވެސް ދެމީހުން އެއްބަސްވާން އެބަޖެހޭ ދެއްތޯ. ދެ ފަރާތުން އެއްބަސްވާ ކަންކަމާ އެކީގައި މިއުޅެނީ. އެހެންމަ އަޅުގަނޑުމެންނަށް ވެސް މަސައްކަތް ކުރެވޭ ކޮމަން ގްރައުންޑެއް މިހޯދަނީ," ޝިޔާމް ވިދާޅުވި އެވެ.
އެ ބައްދަލުވުންތަކުގައި ޑިމޮކްރެޓްސްގެ ފަރާތުން ބައިވެރިވެވަޑައިގަންނަވާނީ އާޒިމްގެ އިތުރުން ގަލޮޅު އުތުރު ދާއިރަގެ މެމްބަރު އީވާ އަބްދުالله އާއި ހެންވޭރު ހުޅަނގު ދާއިރާގެ މެމްބަރު ހަސަން ލަތީފް އަދި އެސްޓީއޯގެ ކުރީގެ ސީއީއޯ އަދި އެމްޑީ ހުސެއިން އަމްރެވެ.
އަދި ޕީޕީއެމްގެ ފަރާތުން ނައިފަރު ދާއިރާގެ މެމްބަރު އަހުމަދު ޝިޔާމް, މަހިބަދޫ ދާއިރާގެ މެމްބަރު ހުސެއިން ތޯރިގް (ޓޮމް), ފަރެސްމާތޮޑާ ދާއިރާގެ މެންބަރު ހުސެއިން މުހައްމަދު ލަތީފްގެ އިތުރުން ޕީޕީއެމްގެ ނައިބު ރައީސް މުހައްމަދު ހުސެއިިން ޝަރީފް (މުންދު) އަދި ހުޅުމާލެ ދާއިރާގެ ކައުންސިލަރު އިބްރާހިމް ޝުޖާ އެވެ.
