ބެއިޖިން، ޗައިނާ (ޖޫން 24) - ޗައިނާގެ ރެސްޓޯރެންޓެއްގައި އެއްޗެއް ގޮވައި ގިނަ ބަޔަކު މަރުވި ހާދިސާއާ ގުޅިގެން ހަތަރު މީހަކު ހައްޔަރުކޮށްފި އެވެ.
މިދިޔަ ބުދަ ދުވަހު ހުޅަނގު އުތުރު ޔިންޗުއާން ސިޓީގެ ބާބަކިއު ރެސްޓޯރެންޓެއްގައި ހިނގި ގޮވުމުގައި 31 މީހުން މަރުވެ ހަތް މީހުންނަށް އަނިޔާވި އެވެ.
އެއީ ގޭސް ލީކުވެގެން ހިނގި ހާދިސާއެއް ކަމަށް ބެލެވެ އެވެ. ހޮނިހިރު ދުވަހު ހައްޔަރު ކުރީ ރެސްޓޯރެންޓުގެ ވެރިޔާ އާއި ދެ ޝެއާހޯލްޑަރުންނާއި މެނޭޖަރެވެ.
ޝިންހުއާ ނިއުސް އެޖެންސީން ބުނީ ޖިނާއީ ތަހުގީގެއް ފަށާފައިވާ އިރު އިހުމާލުވުމުގެ ތުހުމަތު އެ މީހުންގެ މައްޗަށް ކުރެވޭ ކަމަށެވެ.
ހައްޔަރު ކުރި ހަތަރު މީހުންނާއި އިތުރު ފަސް މީހުން މުދާތައް ވެސް އިދާރާތަކުން ވަނީ ހިފަހައްޓައިފަ އެވެ.
ރައްކާތެރިކަމުގެ ފިޔަވަޅުތަކަށް ސަމާލުކަން ނުދޭތީ ޗައިނާގައި ގޮވުންތައް ގޮވައި އެކި ކަހަލަ އަލިފާނުގެ ހާދިސާތައް ވަރަށް ގިނައިން ހިނގަ އެވެ.
މިދިޔަ އަހަރުގެ ސެޕްޓެމްބަރު މަހު ރެސްޓޯރެންޓެއްގައި ރޯވެ 17 މީހުން މަރުވި އެވެ. ހަމަ އެ އަހަރުގެ ޖެނުއަރީ މަހު ހިނގި ގޮވުމެއްގައި 12 މީހުން މަރުވި އެވެ.
