ދަ ޑިމޮކްރެޓްސްގެ ނަމުގައި ޕާޓީ އުފެއްދުމުގެ ހުއްދަ އިލެކްޝަންސް ކޮމިޝަނުން ނުދިނަސް ޕާޓީއެއްގެ ގޮތުގައި ވަރަށް އަވަހަށް ކެމްޕޭނު ފަށައި ރާއްޖޭގެ ހުރިހާ ރަށްރަށެއްގައި ސިޔާސީ ހަރަކާތްތައް ކުރިއަށް ގެންދާނެ ކަމަށް އެ ޕާޓީ އުފެއްދެވުމުގައި އިސްކޮށް އުޅުއްވާ ހެންވޭރު ހުޅަނގު ދާއިރާގެ މެންބަރު، ހަސަން ލަތީފު ވިދާޅުވެއްޖެ އެވެ.
ދަ ޑިމޮކްރެޓްސްގެ ނަމުގައި ޕާޓީއެއް އުފެއްދުމުގެ ހުއްދަ ދިނުމަށް އިލެކްޝަންސް ކޮމިޝަނުން މިއަދު ބާއްވަން އުޅުނު ބައްދަލުވުން ކޯރަމް ހަމަނުވުމުގެ ސަބަބުން ބާއްވާފައި ނުވެ އެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އެ ޕާޓީގެ މުއައްސިސް ހަސަން ލަތީފް ވިދާޅުވީ އެއްވެސް ސަބަބަކާ ނުލައި ޕާޓީ އުފެއްދުމުގެ ހުއްދަ ނުދީ އީސީއަށް ހިފެހެއްޓޭނެ ކަމަށް ގަބޫލު ނުކުރައްވާ ކަމަށެވެ. އަދި, އެއީ ގާނޫނު އަސާސީގެ ރޫހާ ވެސް ހިލާފު ކަމެއް ކަމަށާއި ޕާޓީ ރެޖިސްޓާ ވަންދެން ސިޔާސީ ހަރަކާތް ނުހިންގާ މަޑުކޮށްގެން ނުތިބޭނެ ކަމަށް ވެސް އޭނާ ވިދާޅުވި އެވެ.
"ހިޔާލު ފާޅުކުރުމުގެ މިނިވަންކަމާއި އެއްވެ އުޅުމުގެ މިނިވަން ކަމަކީ ވެސް ގާނޫނު އަސާސީން ލިބިދީފައި އޮންނަ ހައްގުތަކެއް، މާނައަކީ އަޅުގަނޑުމެންގެ ހަރުގެތައް ވެސް ހިނގަމުން ދާނެ، އެތަންތަނުގައި ބޭފުޅުން ވާހަކަފުޅު ވެސް ދައްކަވަމުން ގެންދާނެ، އަދި ކެމްޕޭނެއްގައި ކުރާނެ ހުރިހާ މަސައްކަތް، ހަރަކާތްތައް ބާރަށް އަޅުގަނޑުމެން ކުރަމުން ގެންދާނަން،" އޭނާ ވިދާޅުވި އެވެ.
ހަސަން ލަތީފް ވިދާޅުވީ އީސީގެ މަސްއޫލިއްޔަތަކީ ސިޔާސީ ޕާޓީއެއް އުފެއްދުމަށް ރެޖިސްޓަރީ ކުރުމަށް އެދުނީމާ އެ ރެޖިސްޓަރީ ކުރުމާ ގުޅޭގޮތުން ގެންގުޅޭ އިޖުރާއަތުތަކެއް ގެންގުޅުމާއި އެ އިޖުރާތު ހަމަވާ ނަމަ އެކަން ކޮށްދިނުން ކަމަށެވެ. އެހެންކަމުން ސިޔާސީ ޕާޓީއެއްގެ ގޮތުގައި ކެމްޕޭނު ނުކުރުމަށް އިލެކްޝަންސް ކޮމިޝަނުން ނޭންގޭނެ ކަމަށް އޭނާ ވިދާޅުވި އެވެ.
"އަޅުގަނޑުމެންގެ ކުލަޔަކާއި ނިޝާނާއި ލޯގޯއާއި އަޅުގަނޑުމެން ގެންގުޅެން ވެސް ފަށާނަން، އަޅުގަނޑުމެންގެ ނަން، ދަ ޑިމޮކްރެޓްސް، މި ނަން ވެސް އަޅުގަނޑުމެން ހަމަ ހުރިހާ ރަށެއްގައި ކިޔަމުން ވެސް ގެންދާނަން، ދެން މިހާރު ވެސް ލަަވަޔާ އެއްޗެހި އަޅުގަނޑުމެން ހަމަ ހަދަމުން އެބަ ގެންދަން އިނގޭތޯ، އެހެންވީމަ ކެމްޕޭނު އަޅުގަނޑުމެން ކުރަމުން ގެންދާނަން،" ޑިމޮކްރެޓްސްގެ ފަރާތުން ކެންޑިޑޭޓަކު ނެރޭނެ ވާހަކަ ތަކުރާރު ކުރައްވަމުން އޭނާ ވިދާޅުވި އެވެ.
އެ ވާހަކަތަކާ ގުޅިގެން "އަދަދު" އިން ކުރި ސުވާލެއްގެ ޖަވާބުގައި ހަސަން ލަތީފް ވިދާޅުވީ ޕާޓީގެ ކެންޑިޑޭޓެއް ކަނޑައެޅޭނީ ޕާޓީ ރެޖިސްޓަރީވުމުން ކަމަށާއި އެކަން ކުރުމަށް ބޭނުންވާ ޕާޓީގެ އަސާސީ ގަވާއިދު ވެސް އެކުލަވާލުމުގެ މަސައްކަތް ކުރަމުންދާ ކަމަށެވެ. އެހެންކަމުން ކެމްޕެއިން ކުރި ނަމަވެސް ރިޔާސީ އިންތިހާބުގައި ވާދަ ކުރާނީ ވަކި ކެންޑިޑޭޓެކޭ ދަންނަވަން އަދި ނޭނގޭ ކަމަށް އޭނާ ވިދާޅުވި އެވެ.
ޑިމޮކްރެޓްސްގެ ފަރާތުން ރިޔާސީ އިންތިހާބަށް ނުކުންނާނެ ކެންޑިޑޭޓެއް އަދި ކަނޑައަޅާފައި ނެތް ނަމަވެސް އެ ޕާޓީގެ ކެންޑިޑޭޓެއްގެ ގޮތުގައި މަޖިލީހުގެ ރައީސް، މުހައްމަދު ނަޝީދު ނުކުންނަވާނެ ކަމަށް އަޑުތައް ފެތުރިފައިވެ އެވެ. އެމްޑީޕީން ވަކިވެވަޑައިގެންނެވި ނަމަވެސް ވަގުތާ ހަމައަށް ވެސް ޑިމޮކްރެޓްސްއަށް ސޮއި ކުރައްވާނެ ކަމުގެ އެއްވެސް އިޝާރާތެއް އެމަނިކުފާނު ދެއްވާފައި ނުވެ އެވެ.
