ބެއިޖިން، ޗައިނާ (ޖޫން 19) - ރަޝިއާއަށް ހަތިޔާރު ފޯރުކޮށްނުދޭނެ ކަމަށް ބުނެ ޗައިނާއިން ވައުދުވި ކަމަށް އެމެރިކާގެ ސެކެޓްރީ އޮފް ސްޓޭޓް އެންޓޮނީ ބްލިންކެން ވިދާޅުވެއްޖެ އެވެ.
"ޔޫކްރެއިން ހަނގުރާމައިގައި ބޭނުންކުރަން ޗައިނާގެ އެއްވެސް އަސްކަރީ އެހީއެއް ރަޝިއާއަށް ނުލިބޭނެ ކަމަށް ބުނެ ޗައިނާއިން ވަނީ އަޅުގަނޑުމެންނާއި އެހެން ގައުމުތަކަށް ވެސް ޔަގީންކަން ދީފައި،" ޗައިނާއަށް ކުރެއްވި ދެ ދުވަހުގެ ދަތުރާ ގުޅޭ ގޮތުން ބްލިންކެން ނޫސްވެރިންނަށް ވިދާޅުވި އެވެ.
"އެ ވާހަކައާ ހިލާފަަށް ޗައިނާއިން އަމަލުކުރާ ކަމުގެ އެއްވެސް ހެއްކެއް ނެތް. އެކަމަކު ޗައިނާގެ ކުންފުނިތަކުން އަމަލުކޮށްފާނެ ގޮތަކާ މެދު ކަންބޮޑުވޭ. ކުންފުނިތަކުން ރަޝިއާއަށް އަސްކަރީ ޓެކްނޮލޮޖީ ފޯރުކޮށްދެމުން ދިޔުމަކީ އެކަށީގެންވާ ކަމެއް،" ބްލިންކެން ވިދާޅުވި އެވެ.
"އެކަމާ މެދު ސަމާލުވުމަށް އަޅުގަނޑުމެން ވާނީ ޗައިނާ ސަރުކާރުގައި އެދިފައި."
މީގެ ކުރިން އެމެރިކާއިން ތަަކުރާރުކޮށް ތުހުމަތު ކުރީ ޗައިނާއިން ރަޝިއާއަށް އަސްކަރީ އެހީ ފޯރުކޮށްދޭން އުޅޭ ކަމަށެވެ. އިރާނާއި އުތުރު ކޮރެއާއިން މިހާރު ވެސް ރަޝިއާއަށް އެހީވާ ކަމަށް އެމެރިކާ އާއި ހުޅަނގުން ތުހުމަތު ކުރެ އެވެ.
އެހެން ނަމަވެސް ޗައިނާއަށް ކުރާ ތުހުމަތު އެ ގައުމުން ދޮގުކުރެ އެވެ. ޗައިނާއިން ބުނީ ޔޫކްރެއިން ހަނގުރާމައަށް ސުލްހަވެރި ހައްލެއް ހޯދަން މެދުވެރިއެއްގެ ދައުރު އަދާކުރަން ބޭނުންވާ ކަމަށެވެ.
