ބެއިޖިން، ޗައިނާ (ޖޫން 18) - ޗައިނާ އާއި އެމެރިކާގެ ގުޅުން އިތުރަށް ގޯސްވިޔަ ނުދީ ހިފެހެއްޓުމަށް މަޝްވަރާ އިތުރު ކުރަން އެއްބަސްވެއްޖެ އެވެ.
އެގޮތަށް އެއްބަސްވީ އެމެރިކާގެ ސެކެޓްރީ އޮފް ސްޓޭޓް އެންޓޮނީ ބްލިންކެން ޗައިނާއަށް ކުރެއްވި ދަތުރުގެ ތެރެއިންނެވެ. ބްލިންކެންއަކީ ފާއިތުވި ފަސް އަހަރުގެ ތެރޭގައި ޗައިނާއަށް ވަޑައިގެންނެވި އެމެރިކާގެ އެންމެ އިސް އޮފިޝަލެވެ.
ބްލިންކެން އާއި ޗައިނާގެ ފޮރިން މިނިސްޓަރުގެ މަޝްވަރާއަށް ގާތްގަނޑަކަށް އަށް ގަޑިއިރު ހޭދަވި އިރު، އެއީ ވަރަށް ހުޅުވާލެވިގެން ދެ ފަރާތުން ވެސް ވާހަކަ ދެއްކި ބައްދަލުވުމެއްގެ ގޮތުގައި ޗައިނާއިން ސިފަކުރި އެވެ.
ފަހުގެ ތާރީހެއްގައި ޗައިނާގެ ފޮރިން މިނިސްޓަރު ޗިން ގާންގް އެމެރިކާއަށް ދަތުރު ކުރައްވަން ނިންމި ކަމަށާއި ދެ ގައުމުގެ މެދުގައި ވައިގެ ދަތުރުތައް ފުޅާކުރަން ނިންމި ކަމަށް ދެ ގައުމުން ވެސް ބުންޏެވެ.
ޗިން ވިދާޅުވީ ދެ ގައުމުގެ ގުޅުން މިހާރު އޮތީ ތާރީހުގައި ގޯސް ނުވާ ވަރަށް ގޯސްވެފައި ކަމަށާއި އެންމެ ބޮޑު މައްސަލައަކީ ޓައިވާންގެ މައްސަލަ ކަމަށެވެ.
ހޯމަ ދުވަހު ވެސް ބްލިންކެންގެ މަޝްވަރާ ބައްދަލުވުންތަކެއް ޗައިނާގައި އޮންނާނެ އެވެ. އޭގެ ފަހުން ފުރާވަޑައިގެންނެވުމުގެ ކުރިން ނޫސްވެރިންނަށް މައުލޫމާތު ދެއްވާނެ އެވެ.
