މެންޗެސްޓާ (ޖޫން 17) - ޖަރުމަނުގެ އާރްބީ ލައިޕްޒިގަށް ކުޅެމުން އަންނަ ކްރޮއޭޝިއާގެ ޑިފެންޑަރު، ޖޮސްކޯ ގްވާޑިއޯލް ވިއްކާލަން އެ ޓީމުން ކިޔާ އަގު ދޭން މެންޗެސްޓާ ސިޓީން ވެސް ދެކޮޅު ހަދަމުން އަންނަ ކަމަށް މީޑިއާ ރިޕޯޓްތައް ބުނެފި އެވެ.
ޔޫރަޕްގައި މި ވަގުތު އެންމެ ޑިމާންޑް ބޮޑު ޑިފެންޑަރުންގެ ތެރޭގައި ހިމެނޭ ގްވާޑިއޯލް، 21، މި ވަގުތު ލައިޕްޒިގުގެ ކޮންޓްރެކްޓްގައި ހުރީ 2027 ވަނަ އަހަރުގެ ނިޔަލަށެވެ. އޭގެ ކުރިން އެހެން ކްލަބަކުން ގްވާޑިއޯލް ގެންދާނަމަ އޭނާގެ ކޮންޓްރެކްޓްގައިވާ ގޮތުން، 110 މިލިއަން ޑޮލަރު ދޭން ޖެހޭނެ އެވެ. ލައިޕްޒިގުން އަންނަނީ އެ އަގު ނުދޭނަމަ ގްވާޑިއޯލް މި ފަހަރު ދޫކޮށްލަން ދެކޮޅު ހަދަމުންނެވެ.
ނިމުނު ސީޒަނުގެ އިނގިރޭސި ޕްރިމިއާ ލީގާއި އެފްއޭ ކަޕް އަދި ޗެމްޕިއަންސް ލީގު ކާމިޔާބުކުރި ސިޓީން ގްވާޑިއޯލް ގަންނަން އެންމެ ބޮޑު ވެގެން ވެސް ހަރަދުކުރަން ބޭނުންވަނީ 70 މިލިއަން ޑޮލަރު އެވެ. އެހެންވެ، ސިޓީން އަންނަނީ ލައިޕްޒިގާ އެކު ގްވާޑިއޯލްގެ ޑީލް ނިންމަން އަގަކާ މެދު މަޝްވަރާ ކުރަމުންނެވެ.
މީގެ ކުރިން އިނގިރޭސި ޕްރިމިއާ ލީގުގެ މެންޗެސްޓާ ޔުނައިޓެޑާއި ލިވަޕޫލުން ވެސް ގްވާޑިއޯލްގެ ސޮއި ހޯދަން ޝައުގުވެރިކަން ފާޅުކުރި އެވެ. އެކަމަކު، ރަސްމީ ސިފައެއްގައި އޭގެ އެއްވެސް މަސައްކަތެއް ކޮށްފައެއްނުވެ އެވެ.
ކްރޮއޭޝިއާގެ މަޝްހޫރު ގިނަ ކުޅުންތެރިންތަކެކޭ އެއްގޮތަށް ގްވާޑިއޯލް އަކީ ވެސް ޑިނަމޯ ޒަގްރެބް އިން ސީނިއާ ކެރިއަރު ފެށި ކުޅުންތެރިއެކެވެ.
