އަނިޔާގެ ސަބަބުން ސާފް ޗެމްޕިއަންޝިޕްގައި ކުޅުމުގެ ފުރުސަތު ތަޖުރިބާކާރު ގޯލްކީޕަރު މުހައްމަދު ފައިސަލް އަށް ގެއްލިއްޖެ އެވެ.
ފައިސަލް ޓީމުން ބާކީކޮށް، ސާފަށް ނެގި ސްކޮޑުން ޔުނައިޓަޑް ވިކްޓްރީ (ޔޫވީ)ގެ ގޯލްކީޕަރު ނާޖިހު އަލީ އަށް ވަނީ ފުރުސަތު ދޭން ނިންމައިފި އެވެ.
ގައުމީ ޓީމުގެ މެނޭޖަރު އަބްދުﷲ ޝިބާއު (ޝިބާ) މިއަދު ބުނެފައިވަނީ ޖަޕާންގައި ގައުމީ ޓީމުން ކުރިއަށް ގެންދިޔަ ޓްރެއިނިން ކޭމްޕްގެ ތެރެއިން ފައިސަލްގެ ކަކުލަށް ލިބުނު އަނިޔާއަކާ ގުޅިގެން އޭނާ އަށް ސާފް ޗެމްޕިއަންޝިޕްގައި ކުޅުމުގެ ފުރުސަތު ގެއްލިފައިވާ ކަމަށެވެ.
"ފައިސަލް އަށް ނުކުޅެވޭނެކަން ނިންމާފައިވަނީ ކޮލަމްބޯގައި ޑޮކްޓަރަށް ދެއްކުމަށް ފަހު،" ޝިބާ ބުންޏެވެ.
ސާފް ޗެމްޕިއަންޝިޕް 2018 ގެ މޮޅު ކުޅުންތެރިޔާގެ މަގާމު ފައިސަލް އަށް އަންނަ ހަފުތާގައި އިންޑިއާގައި ފަށާ ސާފް ޗެމްޕިއަންޝިޕްގައި ނުކުޅެވުމަކީ ރާއްޖޭގެ ޓީމަށް ލިބުނު ބޮޑު ގެއްލުމެކެވެ. ބެލެވޭ ގޮތުގައި ސާފް ޗެމްޕިއަންޝިޕްގައި ރާއްޖޭގެ އެއް ވަނަ ގޯލްކީޕަރު ޒިންމާއާ ހަވާލުވާނީ މާޒިޔާގެ ގޯލްކީޕަރު ހުސެއިން ޝަރީފް (ހުސެން) އެވެ. އެންމެ ފަހުން ގައުމީ ޓީމު ކުޅުނު އެކުވެރިކަމުގެ މެޗުތަކުގައި ޓީމުގެ ގޯލު ބެލެހެއްޓީ ކީޕަރު ހުސެން އެވެ.
ޝިބާ ބުނީ ފައިސަލް ސްކޮޑުން ބާކީކޮށް، އޭނާގެ ބަދަލުގައި ޒުވާން ގޯލްކީޕަރު ނާޖިހު އަށް ސްކޮޑުން ޖާގަ ދިނުމަށް ނިންމާފައިވާ ކަމަށެވެ. އެކަމަކު، އެނގިފައިވާ ގޮތުގައި ސްކޮޑުގައި ނުހިމެނުނަސް، ގައުމީ ޓީމާ އެކު ފައިސަލް އިންޑިއާ އަށް ދަތުރުކުރާނެ އެވެ.
ގައުމީ ޓީމުގެ ޕްރެކްޓިހުގެ ތެރެއިން ނާޖިހު (ކ): މީގެ ކުރިން ގައުމީ ޓީމުގެ ގޯލު ބަލަހައްޓާފައިވޭ.--- ފޮޓޯ: މުހައްމަދު ޝާބިން/ އަދަދު
ޔުނައިޓެޑް ވިކްޓަރީ (ޔޫވީ) އަށް ކުޅެމުންދާ ނާޖިހު އެންމެ ފުރަތަމަ ގައުމީ ޓީމުގައި ހިމެނުނީ 2021 ވަނަ އަހަރު އޮތް ވޯލްޑް ކަޕް/ އޭޝިއަން ކަޕް ޖޮއިންޓް ކޮލިފައިން މެޗުތަކަށް ނެގި ސްކޮޑުގަ އެވެ. އަދި އެ އަހަރު ރާއްޖޭގައި އޮތް ސާފް ޗެމްޕިއަންޝިޕަށް ނެގި ފައިނަލް ސްކޮޑުގައި ވެސް ނާޖިހު ހިމެނުނެވެ.
މި ފަަހަރު ސާފަށް ނެގި 30 ކުޅުންތެރިންގެ ޕްރިލިމިނަރީ ސްކޮޑުގައި ނާޖިހު ހިމެނުނެވެ. އޭނާ ބާކީވީ 23 ކުޅުންތެރިންނަށް ސްކޮޑު ފައިނަލް ކުރިއިރު އެވެ.
މީގެ އިތުރުން 2021 ވަނަ އަހަރު ސްރީ ލަންކާގައި އޮތް ފޯ ނޭޝަންސް ކަޕްގައި ނާޖިހު ވަނީ ގައުމީ ޓީމުގެ ގޯލް ބަލަހައްޓައިފަ އެވެ. މިދިޔަ ސީޒަނުގައި ނާޖިހު އަނިޔާއެއް ލިބުމުން، ކުޅުމާ ދުރަށް ދިއުމަށް ފަހު އަލުން މި ސީޒަނުގައި އަންނަނީ ޔުނައިޓެޑް ވިކްޓަރީގެ ގޯލު ބަލަހައްޓަމުންނެވެ.
ޖަޕާންގައި ކުރިއަށް ދިޔަ ޓްރެއިނިން ކޭމްޕް ނިންމާލުމަށް ފަހު، ގައުމީ ޓީމު ސްރީ ލަންކާ އަށް ދިޔައީ އިއްޔެއެވެ. ލަންކާގައި ޓީމު މަޑުކުރަންޖެހުނީ އިންޑިއާގެ ބެންގަލޫރަށް ދާން އޮތް ފްލައިޓް ކެންސަލްވުމުންނެވެ. އެހެންވެ މިއަދާއި މާދަމާ ސްރީލަންކާގައި ޓްރެއިން ކުރުމަށް ފަހު، ގައުމީ ޓީމު އިންޑިއާ އަށް ފުރާނީ މާދަމާ އެވެ.
