ދިވެހިރާއްޖޭގެ ހާރިޖީ ވަޒީރު އަބްދުﷲ ޝާހިދު މިއަދު އެމެރިކާގެ ސެކްރެޓަރީ އޮފް ސްޓޭޓް އެންތޮނީ ބްލިންކެންއާ ބައްދަލު ކުރައްވައިފި އެވެ.
އެމެރިކާގައި ރާއްޖޭގެ އެމްބަސީއެއް ހުޅުވަން ޝާހިދު އެ ގައުމަށް ކުރައްވާ ދަތުރުގެ ތެރެއިން ބްލިންކެންއާ ބައްދަލު ކުރައްވައި ދެ ގައުމުގެ މެދުގައި މިވަގުތު އޮތް ގުޅުން އިތުރަށް ހަރުދަނާ ކުރަން ވާހަކަ ދެއްކެެވި ކަމަށް، އެ ގައުމުގެ ސަރުކާރުން ނެރުނު ބަޔާނެއްގައި ބުނެފައިވެ އެވެ.
"ދެ ގައުމުގެ ގުޅުން ބަދަހިވަމުންދާތީ ސެކްރެޓަރީ ވަނީ އެކަން ފާހަގަ ކުރައްވައި، ރާއްޖެ އާއި އެމެރިކާގައި ދެ ގައުމުގެ އެމްބަސީ ހުޅުވަން ނިންމުމަކީ ބަދަހިވަމުންދާ ގުޅުމުގެ ހެއްކެއް ކަމަށް ވިދާޅުވެފަ،" ބްލިންކެންގެ ތަރުޖަމާނު މެތިއު މިލާ ނެރުނު ބަޔާނެއްގައި ބުނެފައިވެ އެވެ.
ދިވެހި އެމްބަސީ ހުޅުވަނީ އެމެރިކާގެ ވެރި ރަށް ވޮޝިންޓަނުގަ އެވެ. މީގެ ކުރިން ވެސް ދެ ފަހަރެއްގެ މަތިން އެމެރިކާގައި ރާއްޖޭގެ އެމްބަސީއެއް ހުޅުވި އެވެ. އަދި އެމެރިކާގެ އެމްބަސީއެއް ފުރަތަމަ ފަހަރަށް ރާއްޖޭގައި ހުޅުވުމަށް ވެސް އަންނަނީ ތައްޔާރުވަމުންނެވެ.
އެެމެރިކާއިން ދަނީ މިފަހުން ރާއްޖެއަށް ވަރަށް ބޮޑެތި އެހީތަކެއްވަމުންނެވެ. އެގޮތުން 2019 ވަނަ އަހަރު ފެށިގެން މި ހިނގާ ޖޫން މަހާ ހިސާބަށް 36 މިލިއަން ޑޮލަރުގެ އެހީ އެ ގައުމުން ވަނީ ރާއްޖެއަށް ދީފަ އެވެ. އެއީ 554 މިލިއަން ދިވެހި ރުފިޔާ އެވެ.
