ޖާކްހައު، އިންޑިއާ (ޖޫން 14) - އިންޑިއާ އާއި ޕާކިސްތާނަށް ބާރުގަދަ ތޫފާނެއް ދަތުރު ކުރަމުން ދާތީ، އެ ދެ ގައުމުން އެއް ލައްކައަށް ވުރެ ގިނަ މީހުން ރައްކާތެރި ހިސާބުތަކަށް ބަދަލުކޮށްފި އެވެ.
ބުރާސްފަތި ދުވަހުގެ ހަވީރު އެ ދެ ގައުމާ ހަމައަށް ފޯރާނެ ކަމަށް ބެލެވޭ ތޫފާން ބިޕަރްޖޯއީ އުފެދުނީ އަރަބި ކަނޑުގަ އެވެ. ބިޕަރްޖޯއީގެ މާނައަކީ ބަންގާޅު ބަހުން "ކާރިސާ" އެވެ.
ލަފާކުރެވޭ ގޮތުގައި ގަދަވަޔާއި ބިޔަ ރާޅުތަކާ އެކު ބޯކޮށް ވާރޭވެހޭނެ އެވެ. ތޫފާނުގެ އަސަރު ކުރާނީ އިންޑިއާގެ ގުޖަރާތު ސްޓޭޓުގެ މަންދްވީއިން ފެށިގެން ގޮސް ޕާކިސްތާނުގެ ކަރާޗީއާ ހަމައަށް 325 ކިލޯމީޓަރުގެ ދިގު އައްސޭރިފަަށުގެ ސަރަހައްދަކަށެވެ.
އިންޑިއާގެ މޫސުމާ ބެހޭ އިދާރާއިން ބުނީ ތޫފާނުގެ އަސަރު އެންމެ ފުރަތަމަ ކުރާނީ ޖާކްހައު ބަނދަރު ކައިރިން ކަމަށެވެ. އެ ސަރަހައްދުގައި މީހުން ދިރިއުޅޭ ޗަކައިގެ ގެތަކާއި ފަން ޖިފުޓިތައް އެއްކޮށް ބިމާ ހަމަވާނެ ކަމަށް އިދާރާތަކުން ލަފާކުރެ އެވެ.
ތޫފާނުގައި ގަޑިއަކު 150 ކިލޯމީޓަރަށް ވަައިޖެހޭނެ ކަމަށް ބެލެވެ އެވެ. އެހެންވެ، ގެތަކަށް ގެއްލުން ލިބުމުގެ އިތުރުން، ދަނޑުބިންތައް ސުންނާފަތިވެ، ކަރަންޓު ހޮޅިތައް ވެއްޓި، މުއާސަލާތީ ގުޅުމަށް ވެސް ހުރަސް އެޅޭނެ ކަމަށް އިންޑިއާގެ އިފާރާތަކުން ލަފާކުރެ އެވެ.
