ރައްޔިތުންގެ މަޖިލީހުގެ ނައިބުރައީސް އީވާ އަބްދުﷲ އެ މަގާމުން ވަކިކުރަން އެމްޑީޕީން ހުށަހަޅާފައިވާ މައްސަލަ އެޖެންޑާނުކޮށް މަޖިލީހުގެ މިއަދުގެ ޖަލްސާ ފަށައިފި އެވެ.
މަޖިލީހުގެ މިއަދުގެ ޖަލްސާގެ އެޖެންޑާގައި ފުރަތަމަ އޮތީ މަޖިލީހުގެ ދާއިމީ ކޮމިޓީތުގައި ހިމެނިވަޑައިގަންނަވާ ސިޔާސީ ޕާޓީތަކުގެ މެމްބަރުންނާއި ޕާޓީއަކަށް ނިސްބަތްވެވަޑަައިނުގަންނަވާ މެމްބަރުން ތަމްސީލުކުރާނެ ގޮތުގެ މައްސަލަަ އެވެ. އީވާގެ އިތުބާރުނެތްކަމަށް ހުށަހެޅި މައްސަލަަ ކުރިއަށް ގެންދަން އޮތް ހުރަހެއް ކަމަށް މަޖިލީހުގެ ރިޔާސަތުން ކުރިން ބުނެފައި އޮތީ ކޮމިޓީތަކުގެ މައްސަލާގައި ގޮތެއް ނުނިމި އޮތުމެވެ.
އީވާގެ އިތުބާރު ނެތްކަމުގެ މައްސަލަ ކުރިއަށް ގެންދެވެނީ އެ މައްސަލާގައި ޖަވާބުދާރީވެވަޑައިގަންނަވަން ފުރުސަތު ދޭނެ ގޮތާއި މެމްބަރުންނަށް ވަގުތު ދޭނެ ގޮތް ކަނޑައަޅަން ޖެހޭނީ މަޖިލީހުގެ އާންމު ކޮމިޓީންނެވެ.
ރައްޔިތުންގެ މަޖިލީހުގެ ގަވާއިދުގެ 205 ވަނަ މާއްދާގެ ނ. ގައި ބުނެފައި އޮންނަ ގޮތުން މަޖިލީހުގެ ރައީސް ނުވަތަ ނައިބު ރައީސްގެ ވަކި ކުރަން ހުށަހެޅުމުން އެކަން އަމީން އާންމު ރައީސްއަށާއި މެމްބަރުންނަށް ރަސްމީ ތިން ދުވަހުގެ ތެރޭގައި އަންގައި ނޯޓިހެއް ފޮނުވަންޖެހެ އެވެ. އަދި, އެ ނޯޓިހުގެ ތާރީހުން ފެށިގެން 14 ދުވަސް ދިނުމަށްފަހު ދެން އެންމެ އަވަހަށްޖެހޭ ރަސްމީ ބަންދު ނޫން ދުވަހެއްގައި ރައީސް މަގާމުން ވަކި ކުރުމުގެ ޖަލްސާ ބާއްވަންޖެހެ އެވެ.
އިވާގެ މައްސަލައިގައި ނޯޓިސް ހަމަވެ، ޖަލްސާ ބާއްވަންޖެހޭ ތާރީހަކީ މިދިޔަ ހޯމަ ދުވަހެވެ.
މަޖިލީހުގެ މިއަދުގެ ޖަލްސާއަށް އީވާގެ މައްސަލަ އެޖެންޑާކޮށްފައި ނުވާ އިރު މަޖިލީހުގެ ރައީސް މުހައްމަދު ނަަޝީދަށް އަމީންއާންމު ފާތިމަތު ނިއުޝާ މިދިޔަ ހޯމަ ދުވަހު ފޮނުއްވި ސިޓީގައި ވިދާޅުވެފައި އޮތީ ކޮމިޓީތަކުގެ މައްސަލަ ކުރިއަށް ނުގެންދެވި އޮތުމަކީ މަޖިލީހުގެ ނައިބު ރައީސް އީވާ މަގާމުން ވަކިކުރުމުގެ ގަރާރުގެ މައްސަލަ ކުރިއަށް ނުގެންގޮސް މަޑުޖެއްސިދާނެ ސަބަބެއް ކަމަށް ދެެކެވަޑައިނުގަންނަވާ ކަމަށެވެ.
އެ މައްސަލައިގެ ނޯޓިސް އަށެއް ޖޫންގައި ހަމަވެފައި ވާތީ މިދިޔަ އާދީއްތަ ދުވަހަކީ ޖަލްސާއެއް ބާއްވައި އެ މައްސަލައިގެ ގަރާރު ހުށަހަޅަން ޖެހޭ ދުވަސްކަމަށް ވެސް ނަޝީދަށް ފޮނުއްވި ސިޓީގައި ނިއުޝާ ވިދާޅުވެފައި ވެ އެވެ.
އެހެން އެކަން އޮއްވައި މިއަދުގެ ޖަލްސާއަށް އެ މައްސަލަ އެޖެންޑާނުކުރީ ކީއްވެކަމެއް އަދި ނޭނގެ އެވެ.
