ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲ ވަކި ކުރަން ހުށަހަޅާފައިވާ ގަރާރު އިއްވުމަށް ބާއްވާ ޖަލްސާ މާދަމާއަށް އެޖެންޑާކޮށްފި އެވެ.
ރައްޔިތުންގެ މަޖިލީހުގެ ނައިބު ރައީސް މަގާމުން ވަކި ކުރަން ހުށަހެޅި މައްސަަލައިގެ ޖަލްސާ މިއަދު ބާއްވަން އެ މަޖިލީހުގެ ގަވާއިދު ލާޒިމް ކުރި ނަމަވެސް މިއަދަށް މައްސަލަ އެޖެންޑާ ނުކުރެއްވީ ޖަލްސާގެ އިންތިޒާމްތައް ހަމަޖައްސަންޖެހޭ އާންމު ކޮމެޓީ ފުރިހަމަނުވެ އޮތުމުން ކަމަށް ކުރިން މަޖިލީހުގެ އަމީން އާންމު ފާތިމަތު ނިޔުޝާ އޮތީ ވިދާޅުވެފަ އެވެ.
ރައްޔިތުންގެ މަޖިލީހުގެ މެމްބަރަކަށް ނިޔުޝާ މިއަދު ފޮނުއްވި ސިޓީއެއްގައި ބުނެފައި ވަނީ ނައިބު ރައީސް ވަކި ކުރުމުގެ ގަރާރު އިއްވާ ޖަލްސާގެ އިންތިޒާމް ގަވާއިދުގެ ދަށުން އާންމު ކޮމެޓީން މިހާތަނަށް ހަމަޖައްސާފައި ނުވި ނަމަވެސް، އީވާގެ މައްސަލަ އެޖެންޑާ ކުރަން ގަވާއިދު ލާޒިމް ކުރާ ކަމަށެވެ.
"... ގަރާރުގެ ބަހުސްގެ ވަގުތު ރައްޔިތުންގެ މަޖިލީހުގެ ގަވާއިދުގެ 206 ވަނަ މާއްދާއަށް ރިއާޔަތްކޮށް އެ ގަވާއިދުގެ 205 ވަނަ މާއްދާގެ ކ. ގެ ދަށުން ކަނޑައަޅާފައިނުވި ނަމަވެސް، އެ މާއްދާގެ ނ. ގައި އެ ގަރާރުގެ ނޯޓިހުގެ ތާރީހުން ފެށިގެން 14 ދުވަހުގެ މުއްދަތެއް ދިނުމަށްފަހު އެންމެ އަވަހަށް އަންނަ ރަސްމީ ބަންދު ނޫން ދުވަހަކު ބާއްވާ ޖަލްސާއަށް އެ ގަރާރު ހުށަހަޅަންވާނެ ކަމަށް ބަޔާންކޮށްފައިވާތީ، މާދަމާ ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ ޖަލްސާއަށް އެ ގަރާރު އެޖެންޑާ ކުރެވޭނެ ވާހަކަ ދަންނަވަން،" ނިޔުޝާ ވިދާޅުވެފައިވެ އެވެ.
އީވާ ވަކި ކުރުމުގެ މައްސަލަ 5.1 ނަމްބަރުގެ ގޮތުގައި ހިމަނާފައި އޮތީ އެންމެ ފުރަތަމަ ކުރާ މަސައްކަތެއްގެ ގޮތުގަ އެވެ. ދެން އޮތް ކަމަކީ ވޯޓަށް އަހަންޖެހޭ ކަންކަމަށް ވޯޓަށް އެހުމެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި އީވާގެ މައްސަލަ އެޖެންޑާނުކޮށް ކުރިއަށްދާން މަސައްކަތް ކުރުމުން ސަރުކާރަށް ތާއީދު ކުރާ މެމްބަރުން ވަނީ މަޖިލީހުގެ މަސައްކަތް ހުއްޓުވައި ހަޅުތާލުކޮށްފަ އެވެ. އެހެންވެ، މަޖިލީހުގެ ނިޒާމު ނެތް ކަމަށް ވިދާޅުވެ ރިޔާސަތުން ވަނީ ޖަލްސާ ނިންމާލައްވައިފަ އެވެ. ރިޔާސަތު ބެލެހެއްޓެވުމަށް މަޖިލީހުގެ ރައީސް މުހައްމަދު ނަޝީދު އުޒުރުވެރިވެވަޑައިގަތުމުން މިއަދުގެ ޖަލްސާގެ ރިޔާސަތު ބެލެހެއްޓެވީ ވިލުފުށީ ދާއިރާގެ މެމްބަރު ހަސަން އަފީފެވެ.
އެމަނިކުފާނުގެ އިތުބާރު ނެތްކަމުގެ މައްސަލައެއް ހުށަހަޅުއްވާފައިވާތީ ރިޔާސަތުގައި އިންނެވުމަށް އުޒުރުވެރިވާ ކަމަށް ނަޝީދު އަންގަވާފައިވާއިރު، ރައްޔިތުންގެ މަޖިލީހުގެ ނައިބު ރައީސް ވަކި ކުރަން އެޖެންޑާ ކުރާ ޖަލްސާގެ ރިޔާސަތު ބަލަހައްޓަންޖެހޭނީ މަޖިލީހުގެ ރައީސް ކަމަށް ގަވާއިދުގައި ބުނެފައިވެ އެވެ.
އާންމު ކޮމެޓީ ފުރިހަމަ ނުވެ އޮއްވައި އީވާގެ މައްސަލަ މާދަމާއަށް އެޖެންޑާ ކުރުމަށް ނިންމިއިރު، އެ ޖަލްސާގައި ވާހަކަ ދައްކާނެ މެމްބަރުންގެ އަދަދާއި ވާހަކަ ދައްކަން ލިބޭނެ ވަގުތު ކަނޑައަޅަންޖެހެނީ އާންމު ކޮމެޓީންނެވެ. ނަމަވެސް އެމްޑީޕީގެ މެމްބަރުންތަކެއް އެ ޕާޓީން ވަކިވި ފަހުން ކޮމެޓީ އޮތީ ފުރިހަމަނުވެ އެވެ. އަދި ޕާޓީތަކުން އެއްގޮތަކަށް އެއްބަސްނުވެވިގެން ކޮމެޓީއަށް އަލުން މެމްބަރުން އައްޔަން ކުރެވޭ ގޮތް އަދިވެސް ނުވެ އެވެ.
