އާމްދަނީގެ ގޮތުގައި މިދިޔަ މަހު 1.71 ބިލިއަން ރުފިޔާ ބަލައިގަތް ކަމަށާއި އެއީ އަންދާޒާކުރި ވަރަށްވުރެ 1.8 އިންސައްތަ އިތުރު އަދަދެއް ކަމަށް މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން ބުނެފި އެވެ.
މިއީ މިދިޔަ އަހަރުގެ މި މުއްދަތުގައި މީރާއިން ބަލައިގަތް އާމްދަނީއަށް ވުރެ 30.4 އިންސައްތަ އިތުރު އަދަދެއް ކަމަށް އެ އިދާރާއިން ހާމަކުރެ އެވެ.
އެގޮތުން, މެއި، 2022، ގައި ލިބުނު އާމްދަނީއާ އަޅައިބަލާއިރު މެއި، 2023، ގައި ލިބުނު އާމްދަނީ އިތުރުވީ ޖީއެސްޓީ، ކުންފުނިތަކާއި ފަރުދުން-ނޫން ފަރާތްތަކުގެ އާމްދަނީން ނަގާ ޓެކްސް، އެއާޕޯޓު ޑިވެލޮޕްމަންޓު ފީ އަދި ޑިޕާޗާ ޓެކްސްގެ ގޮތުގައި ލިބިފައިވާ އާމްދަނީ އިތުރުވުމުންނެވެ.
އަދި، އެޕްރީލް 2022 އާއި އަޅައިބަލާއިރު، އެޕްރީލް 2023 ގައި ރާއްޖެއަށް ޒިޔާރަތްކޮށްފައިވާ ފަތުރުވެރިންގެ އަދަދު 13.1 އިންސައްތަ އިތުރުވެފައިވާތީ، ޓީޖީއެސްޓީ އަދި އެއާޕޯޓު ޓެކުހާއި ފީގެ ގޮތުގައި ލިބިފައިވާ އާމްދަނީ އިތުރުވެފައިވާތީ ކަމަށް މީރާއިން ބުނެ އެވެ.
މިދިޔަ މަހު މީރާއަށް ލިބުނު އާމްދަނީގެ ތަފުސީލު:
- ޖީއެސްޓީގެ ގޮތުގައި 1.09 ބިލިއަން ރުފިޔާ (63.59 އިންސައްތަ)
- އާމްދަނީން ނަގާ ޓެކުހުގެ ގޮތުގައި 212.43 މިލިއަން ރުފިޔާ (12.41 އިންސައްތަ)
- އެއާޕޯޓް ޑެވެލޮޕްމެންޓު ފީގެ ގޮތުގައި 114.34 މިލިއަން ރުފިޔާ (6.68 އިންސައްތަ)
- ޑިޕާޗާ ޓެކްސްގެ ގޮތުގައި 101.20 މިލިއަން ރުފިޔާ (5.91 އިންސައްތަ)
- ގްރީން ޓެކުހުގެ ގޮތުގައި 83.10 މިލިއަން ރުފިޔާ (4.85 އިންސައްތަ)
- އެހެނިހެން ޓެކުހާއި ފީގެ ގޮތުގައި 112.17 މިިލިއަން ރުފިިޔާ (6.55 އިންސައްތަ)
އޭގެތެރޭގައި އާމްދަނީގެ ގޮތުގައި 72.78 މިލިއަން އެމެރިކާ ޑޮލަރު މީރާއިން ބަލައިގެންފައިވެ އެވެ.
