ޕެޝާވަރް، ޕާކިސްތާން (ޖޫން 11) - ޕާކިސްތާނުގެ ހުޅަނގު އުތުރަށް ބޯކޮށް ވާރޭ ވެހި ވައިގަދަވުމުގެ ސަބަބުން ހިނގި އެކި ހާދިސާތަކުގައި 27 މީހުން މަރުވެއްޖެ އެވެ.
ހޮނިހިރު ދުވަހު މޫސުން ގޯސްވުމުގެ އަސަަރު އެންމެ ބޮޑަށް ކުރީ ހައިބަރް ޕަހްތުންހްވާ ޕްރޮވިންސްގެ ހަތަރު ޑިސްޓްރިކްޓަށެވެ. މަރުވި މީހުންގެ ތެރޭގައި އަށް ކުދިން ހިމެނޭ އިރު، އުމުރުން ދެ އަހަރާއި 11 އަހަރާ ދެމެދު އެއް އާއިލާއެއްގެ ފަސް ކުދިން ވެސް މަރުވި އެވެ.
ގިނަ ބަޔަކު މަރުވީ އެ މީހުންގެ ގެތައް ވެއްޓިގެންނެވެ. މިހާތަނަށް 140 އަށް ވުރެ ގިނަ މީހުންނަށް އަނިޔާވެފައިވާ އިރު، ގިނަ އަދަދެއްގެ ގެރި ބަކަރި ވެސް މަރުވެފައިވެ އެވެ.
އެ ހިސާބުތަކުގައި ކުއްލި ހާލަތު އިއުލާންކޮށްފައިވާ އިރު، އަރަބި ކަނޑުގައި އުފެދިފައި އޮތް ތޫފާނެއްގެ މިސްރާބު މިހާރު ހުރީ ޕާކިސްތާނާއި އިންޑިއާގެ އައްސޭރިފަށާ ދިމާލަށެވެ.
މި ހަފުތާގެ ފަހުކޮޅު ތޫފާން އަރާނެ ކަމަށް ބެލެވޭ އިރު، އައްސޭރިފަށުގައި ދިރިއުޅޭ މީހުން އިވެކުއޭޓް ކުރަމުންދާ ކަމަށް އިދާރާތަކުން ބުނެ އެވެ.
