އިސްތަންބޫލް، ތުުރުކީ (ޖޫން 11) - ފައިނަލުގައި އިންޓަ މިލާން އަތުން 1-0 އިން މޮޅުވެ، ފުރަތަމަ ފަހަރަށް ޔުއެފާ ޗެމްޕިއަންސް ލީގުގެ ޗެމްޕިއަންކަން ހޯދައި، މެންޗެސްޓާ ސިޓީން ސީޒަނުގެ ތިން މުބާރާތުގެ ތަށި އުފުލާލައި ޓްރެބަލް ފުރިހަމަކޮށްފި އެވެ.
ސިޓީ އަކީ ޓްރެބަލް ފުރިހަމަކުރި އިނގިރޭސި ދެ ވަނަ ޓީމެވެ. މީގެ ކުރިން ސީޒަނުގެ ތިން މުބާރާތް ކާމިޔާބުކޮށް، 1999 ވަނަ އަހަރު އަލެކްސް ފާގަސަންގެ ކޯޗުކަމުގައި މެންޗެސްޓާ ޔުނައިޓެޑުން ވެސް ޓްރެބަލް ހެދި އެވެ. ސިޓީން މި ފަހަރު އެފްއޭ ކަޕް ކާމިޔާބުކުރީ ޔުނައިޓެޑް ބަލިކޮށްފަ އެވެ. ޗެމްޕިއަންސް ލީގުގެ ތަށި، އިންޓަ ބަލިކޮށް ރޭ އުފުލާލިއިރު، މިއީ ސިޓީ ތާރީހުގައި މި މުބާރާތް ކާމިޔާބުކުރި ފުރަަތަމަ ފަހަރެވެ. ސިޓީ ވަނީ 2021 ވަނަ އަހަރުގެ ފައިނަލުގައި ޗެލްސީ އަތުން ބަލިވެފަ އެވެ.
އިސްތަންބޫލް އަޓަޓާކް ސްޓޭޑިއަމްގައި ރޭ ކުޅުނު ފައިނަލް މެޗުގައި ފެނިގެންދިޔަ ހަމައެކަނި ލަނޑު ސިޓީ އަށް ޖަހައިިދިނީ 68 ވަނަ މިނިޓްގައި ރޮޑްރީގޯ (ރޮޑްރީ) އެވެ. އޭރިއާތެރެއިން ދޫވެގެން އައި ބޯޅައެއް ރޮޑްރީ އަށް ލިބުމުން އޭނާ ވަނީ އިންޓަގެ ކީޕަރު އަންދްރޭ އޮނާނާ އަށް ފުރުސަތެއް ނުދީ ގޯލަށް ވައްދާލައިފަ އެވެ.
މި މެޗުގައި އަނިޔާވެގެން ސިޓީގެ ކެވިން ޑި ބްރޭނާ ބަދަލުކުރަން ޖެހުނުއިރު، އޭނާ އަށް 2021 ވަނަ އަހަރުގެ ފައިނަލުގައި ވެސް ލިބުނު އަނިޔާއަކާ ހެދި މެޗުގެ ބޮޑުބައި ނުކުޅެވުނެވެ.
އިންޓަ އަށް އެއްވަރުކޮށްދޭން މި މެޗުގައި އެންމެ ރަނގަޅު ފުރުސަތު ލިބުނީ ބަދަލަކަށް ކުޅެން އެރި ރޮމެލޫ ލުކާކޫ އަށެވެ. މެޗުގެ 89 ވަނަ މިނިޓްގައި ލުކާކޫ ކުޑައޭރިއާ ރޮނގުކައިރިގައި ހުރެފައި ބޮލުން ޖެހި ބޯޅަ ސިޓީގެ ކީޕަރު އެޑަސަން މޮރާއެސް ވަނީ މަތަކޮށްފަ އެވެ. އޭގެ ކުރިން އިންޓަގެ ފެޑެރީކޯ ޑި މާކޯ ބޮލުން ޖެހި ބޯޅައެއް ދަނޑީގައި ޖެހިފައި ނުކުތް ވަގުތު ރީބައުންސް ބޯޅައެއް ފޮނުވާލުމުން ބްލޮކްވީ ލުކާކޫ ގައިގައި ޖެހިފަ އެވެ.
ސިޓީގެ މި ކާމިޔާބީއާ އެކު ގާޑިއޯލާ އަށް މި ވަނީ 2011 ވަނަ އަހަރުގެ ފަހުން ޗެމްޕިއަންސް ލީގު ލިބިފަ އެވެ. އަނެއްކޮޅުން ރޭގެ މެޗަކީ ސިޓީގައި ގާޑިއޯލާގެ 300 ވަނަ މޮޅެވެ. އަދި ގާޑިއޯލާ އަކީ ކޯޗިން ކެރިއަރުގައި ތަފާތު ދެ ޓީމެއްގައި ހުރެ ސީޒަނުގެ ތިން މުބާރާތް ކާމިޔާބުކުރި ފުރަތަމަ ކޯޗެވެ. ގާޑިއޯލާ ވަނީ 2009 ވަނަ އަހަރު ބާސެލޯނާގައި ވެސް އެ ކާމިޔާބީ ހާސިލްކޮށްފަ އެވެ.
