"އަދަދު" ނޫހުން ގެނެސްދިނުމަށް ހަމަޖެހިފައިވާ މިފަހަރުގެ ސާފް ޗެމްޕިއަންޝިޕުގެ ކަވަރޭޖު ޕާޓްނަރުންގެ ގޮތުގައި އޭސް ޓްރެވެލްސް އާއި ޗޮކުލެޓާއެކު މިއަދު އެއްބަސްވުމެއްގައި ސޮއިކޮށްފި އެވެ.
މި ހިނގާ ޖޫން 21، ގައި އިންޑިއާގެ ބެންގަލޫރުގައި ފަށާ ސާފް ޗެމްޕިއަންޝިޕުގެ ކަވަރޭޖު ވަރަށް ތަފާތުކޮށް މި ނޫހުން ގެނެސްދޭނެ އެވެ. އެގޮތުން ޓީމުތަކާ ބެހޭ މައުލޫމާތުގެ އިތުރުން ސަޕޯޓަރުންގެ ފޯރި އާއި ޖޯޝު ވެސް ނޫހުގެ ކިޔުންތެރިންނަށާއި ބެލުންތެރިންނަށް ގެނެސްދިނުމަށް ވަނީ ހަމަޖެހިފަ އެވެ.
މި ސަރަހައްދުގައި ބާއްވާ އެންމެ ފޯރިގަދަ ފުޓުބޯޅަ މުބާރާތް، ސާފް ޗެމްޕިއަންޝިޕުގެ ކަވަރޭޖު ޕާޓުނަރުންގެ ގޮތުގައި އޭސް ޓްރެވެލްސް އާއި ޗޮކްލެޓުގެ އިތުރުން މޯލްޑިވްސް ޕޯސްޓް ލިމިޓެޑުން ވެސް ވަނީ ސޮއިކޮށްފަ އެވެ.
ސާފް ޗެމްޕިއަންޝިޕެއްގެ މީޑިއާ ޕާޓުނަރުކަން މީގެ ކުރިން ކޮށްފައިވާ ހަމައެކަނި ދިވެހި އޮންލައިން މީޑިއާ، އަދަދު ނޫހުން މިފަހަރު ގެނެސްދޭ ސާފް ޗެމްޕިއަންޝިޕުގެ ކަވަރޭޖް، ޕާޓްނަރުންގެ އެއްބަރުލުމާ އެކު ވަރަށް ފުރިހަމައަށް ގެނެސްދިނުމަށް ނިންމާފައިވާ ކަމަށް އަދަދުގެ ސީއީއޯ، ހުސެއިން ފިޔާޒް މޫސާ ވިދާޅުވި އެވެ.
"މިފަހަރުގެ [ސާފް ޗެމްޕިއަންޝިޕުގެ] ކަވަރޭޖު ޕާޓުނަރުންގެ އެއްބާރުލުމާ އެކު އަދަދުން ވަރަށް ފުރިހަމައަށް ގެނެސްދޭނެ، ފުރިހަމަ ކަވަރޭޖެއް މިފަހަރުވެސް އަދަދުން ގެނެސްދޭނެ،" އޭނާ ވިދާޅުވި އެވެ.
ސާފް ޗެމްޕިއަންޝިޕުގެ ކަވަރޭޖަށް އަދަދުގެ ޓީމު އިންޑިއާއަށް ދިޔުމަށް ތައްޔާރުވަމުން ވެފައިވާއިރު، މީގެ ކުރިން 2021 ވަނަ އަހަރު ރާއްޖޭގައި ބޭއްވި މުބާރާތުގައި ވެސް ގެނެސްދިން ފަދަ ކޮންޓެންޓުތައް މިފަހަރުގެ މުބާރާތުގެ ކަވަރޭޖުގައި ވެސް އެއަށްވުރެ ފުރިހަމައަށް ގެނެސްދޭނެ ކަމުގެ ޔަގީންކަން ކިޔުންތެރިންނަށާއި ބެލުންތެރިންނަށް ފިޔާޒު ދެއްވި އެވެ.
"ކަވަރޭޖުގެ އިތުރު ޕާޓުނަރުންނާ އެކު ކުރިއަށް އޮތް ދުވަސްތަކުގައި ސޮއި ކުރާނަން،" ކަވަރޭޖު ޕާޓުނަރުންގެ ގޮތުގައި ބައިވެރިވާން ބޭނުންވާ ފަރާތްތަކަށް އެ ފުރުސަތު އަދިވެސް އޮތްކަން ފާހަގަ ކުރައްވައި އޭނާ ވިދާޅުވި އެވެ.
ސާފް ކަވަރޭޖު ކުރިއަށް ގެންދާނީ އަދަދުގެ ސްޕޯޓްސް އެޑިޓަރު އައްޒާމް އަލިފުޅާއި ސްޕޯޓްސް ޖާނަލިސްޓު އިސްމާއީލް އަޒްމީން އަދި ކްރިއޭޓިވް ޓީމުންނެވެ.
ސާފް ޗެމްޕިއަންޝިޕުގެ އެންމެ ފަހުގެ ހަބަރުތައް ކިޔުންތެރިންނާ ހަމައަށް އަދަދުން ގެނެސްދޭނީ އެކަމަށް ހާއްސަކޮށް ލޯންޗު ކުރާ ވެބްސައިޓު ޕޭޖުންނާއި ސޯޝަލް މީޑިއާ މަންސަތައް ބޭނުން ކޮށްގެންނެވެ. އެގޮތުން އަދަދުގެ ފޭސްބުކް، ޓުވިޓާ، ޓިކްޓޮކް އަދި ޓެލެގުރާމް ޗެނެލް މެދުވެރިކޮށް ސާފް ޗެމްޕިއަންޝިޕުގެ އެންމެ ތާޒާ ހަބަރުތައް ގެނެސްދެމުން ދާނެ އެވެ.
