އެމެރިކާއާ ދެކޮޅަށް ހަނގުރާމަ ފެށުން ވާނީ މުޅި ދުނިޔެއަށް ބޮޑު ކާރިސާއަކަށް ކަމަށް ޗައިނާގެ ޑިފެންސް މިނިސްޓަރު ވިދާޅުވެއްޖެ އެވެ.
ސެކިއުރިޓީ ސަމިޓެއްގައި ޖެނެރަލް ލީ ޝަންގްފޫ ވިދާޅުވީ ބައެއް ގައުމުތަކުން އޭޝިއާގައި ހަތިޔާރު އެއްކުރުމުގެ ރޭހެއްގައި އުޅެމުންދާ ކަމަށެވެ.
އެހެން ނަމަވެސް މި ދުނިޔެއަކީ އެމެރިކާ އާއި ޗައިނާއަށް ވެސް އުޅެވޭ ވަރުގެ ބޮޑު ދުނިޔެއެއް ކަމަށާއި ދެ ގަދަ ބާރުން ބަލަންވީ އެއް ގަލަކަށް އާދެވޭނެ ފަދަ ކަންކަން ހޯދަން ކަމަށް އޭނާ ވިދާޅުވި އެވެ.
މި ހަފުތާ ބަންދުގައި ޓައިވާން ކައިރިން ޗައިނާގެ އަސްކަރީ ބޯޓެއް ދަތުރު ކުރުމުން އެމެރިކާއިން އެކަން ކުށްވެރި ކުރި އެވެ. އެ ބޯޓު ދަތުރު ކުރީ އެމެރިކާގެ ހަނގުރާމަ މަތީ މަނަވަރެއް ކައިރިންނެވެ.
އެމެރިކާއާ އެކު ކެނެޑާގެ ބޯޓުތައް ވެސް އެ ސަރަހައްދުން ދަތުރު ކުރަމުން ދިޔަ އެވެ. ޗައިނާއިން ބުނީ ޓައިވާން ކައިރީގައި ހަމަނުޖެހުން އުފައްދަން އެމެރިކާ އާއި ކެނެޑާއިން ގަސްދުގައި މަސައްކަތް ކުރި ކަމަށެވެ.
އެކަމަކު އެ ދެ ގައުމުން ބުނީ ބޯޓުތައް ދަތުރު ކުރީ ބައިނަލްއަގްވާމީ ކަނޑުގެ ސަރަހައްދުން ކަމަށެވެ.
މިދިޔަ މާޗް މަހު ޑިފެންސް މިނިސްޓަރު ކަމަށް ވަޑައިގެންނެވި ޖެނެރަލް ލީ ވިދާޅުވީ އެމެރިކާއިން އަދިވެސް ގެންގުޅެނީ ފިނި ހަނގުރާމައިގެ ވިސްނުން ކަމަށެވެ.
ޗައިނާއިން ދެކޭ ގޮތުގައި ޓައިވާނަކީ އެ ގައުމުގެ ޕްރޮވިންސެކެވެ. ލީ ވިދާޅުވީ ޓައިވާން މައްސަލަ ހޫނު ކުރަން އުޅެނީ އެ ސަރަހައްދަށް ނިސްބަތް ނުވާ ގައުމުތަކުން ކަމަށެވެ.
އެމެރިކާއިން ރަސްމީކޮށް ގުޅުން ބާއްވަނީ ޗައިނާއާ އެކު ނަމަވެސް، ޗައިނާއާ ވަކި ދައުލަތެއް ކަމަށް ވަކާލާތު ކުރާ ޓައިވާން ސަރުކާރަށް ހަތިޔާރު ފޯރުކޮށްދެ އެވެ.
