އަސްކަރީ ގުޅުން ހަރުދަނާ ކުރުމަށްޓަކައި އެމެރިކާގެ ޑިފެންސް ސެކްރެޓަރީ ލޮއިޑް އޮސްޓިން ދެ ދުވަހުގެ ދަތުރުފުޅެއްގައި އާދީއްތަ ދުވަހު އިންޑިއާއަށް ވަޑައިގެންފި އެވެ.
އިންޑިއާގެ ޑިފެންސް މިނިސްޓަރު ރާޖްނާތު ސިންގް އާއި އޮސްޓިން މިއަދު ބާއްވާ ބައްދަލުވުމުގައި އެމެރިކާގެ ޖެނެރަލް އިލެކްޓްރިކް ކުންފުނިން ޖެޓްގެ އިންޖީނުގެ ޓެކްނޮލޮޖީ ހިއްސާ ކުރަން ހުށަހަޅާފައިވާ ހުށަހެޅުމާ ގުޅޭ ގޮތުންނާއި ތިން ބިލިއަން ޑޮލަރުގެ އަސްކަރީ ޑްރޯން އިންޑިއާއަށް ހޯދުމަށް ރާއްވާފައިވާ މަޝްރޫއާ ގުޅޭ ގޮތުން މަޝްވަރާކުރައްވާނެ އެވެ.
އިންޑިއާގައި ޗެޓް އިންޖީނު އުފެއްދުމަށް އެ ގައުމުން އަންނަނީ މަސައްކަތް ކުރަމުންނެވެ. އެމެރިކާއިން 2016 ވަނަ އަހަރު ވަނީ، އެ ގައުމުގެ އަސްކަރީ ޓެކްނޮލޮޖީ އިންޑިއާއަށް ހިއްސާކުރުމަށް އެއްބަސްވެފަ އެވެ.
ސެކްރެޓަރީ އޮސްޓިން އިންޑިއާއަށް މިވަޑައިގަތީ ބޮޑުވަޒީރު ނަރެންދްރަ މޯދީ ވޮޝިންޓަނަށް ވަޑައިގަތުމަށް ރޭވިފައިވާ ދަތުރުފުޅު ގާތްވެފައި ވަނިކޮށެވެ. މޯދީގެ އެ ދަތުރުފުޅުގައި އިންޑިއާ އާއި އެމެރިކާގެ ސްޓްރެޓެޖިކް ޕާޓްނަޝިޕް ފުޅާކުރުމާ ގުޅޭ ކަންކަން ހާމަކުރާނެ ކަމަށް މީޑިއާ ރިޕޯޓުތަކުގައި ބުނެފައިވެ އެވެ.
މިއީ އޮސްޓިން އިންޑިއާއަށް ކުރައްވާ ދެވަނަ ދަތުރުފުޅެވެ. މީގެ ކުރިން އޭނާ އިންޑިއާއަށް ވަޑައިގަތީ 2021 ވަނަ އަހަރުގެ މާޗް މަހު އެވެ.
