އާބަންކޯއިން ކުރިއަށް ގެންދާ "ބިޔޯންޑު ހުޅުމާލެ ޕްލޭން" ގެ ދަށުން ގދ. ތިނަދޫގައި ޑީކޯ ޗެމްބަރެއް ގާއިމްކުރުމުގެ މަސައްކަތް ފަށައިފި އެވެ.
ތިނަދޫގައި ގާއިމްކުރަމުންދާ ޑީކޯ ޗެމްބަރުގެ މަސައްކަތް ނިމޭނެ ކަމަށް ލަފާކޮށްފައި ވަނީ މިމަހުގެ 15 ގަ އެވެ. އެ ޑީކޯ ޗެމްބަރަކީ އާބަންކޯގެ ސީއެސްއާރްގެ ދަށުން ކުރިއަށްގެންދާ މަސައްކަތެއް ކަަމަށް އެ ކުންފުނިން ބުނެ އެވެ.
ރާއްޖޭގައި މިވަގުތު ހުރީ ޖުމްލަ ހަތަރު ޑީކޯ ޗެމްބަރެވެ. އޭގެތެރެއިން މީހުން ދިރިއުޅޭ ރަށެއްގައި ހުންނަ ހަމައެކަނި ޑީކޯ ޗެމްބަރަކީ މާލޭ އޭޑީކޭ ހޮސްޕިޓަލުގައި ހުންނަ ޗެމްބަރެވެ. އޭގެ އިތުރުން ކުރެއްދޫ އައިލެންޑު ރިސޯޓާއި ބަނޑޮސް އަދި ކަނޑިމާ ރިސޯޓުގައި ޑީކޯ ޗެމްބަރު ހުރެ އެވެ.
ހުވަދު އަތޮޅުގައި ޑީކޯ ޗެމްބަރު ގާއިމްކުރުމުގެ މަސައްކަތް ނިމުމަކާ ގާތްވެފައި ވާއިރު، އެ އަތޮޅަކީ އެންމެ ފުޅާކޮށް މަސްވެރިކަން ކުރާ އަތޮޅެވެ. ޒަމާނީ މަސްވެރިކަމުގައި ޑައިވްކުރުމުގެ ދައުރު ބޮޑު އިރު، ޑައިވްކުރުމުގެ ތެރޭގައި ޑީކޯވެގެން ފަރުވާދޭން ޖެހޭ ހާލަތްތައް ވެސް އަންނަނީ އިތުރުވަމުންނެވެ.
އާބަންކޯއިން ބުނީ ރާއްޖޭގެ އެހެން ސަރަހައްދުތަކުގައި ވެސް އާންްމުންނަށް ބޭނުންވާ މިފަދަ މަޝްރުއޫތައް ކުރިއަށް ގެންދިއުމަކީ އެކުންފުނީގެ އަމާޒެއް ކަމަށެވެ.
