ދަ ޑިމޮކްރެޓްސްގެ ނަމުގައި އަލަށް އުފައްދަން މަސައްކަތްކުރަމުން އަންނަ ޕާޓީއަށް 10،000 މެމްބަރުން ހަމަކުރެވޭނެ ކަމަށް ލަފާކުރެވެނީ ކުރިއަށް އޮތް ރިޔާސީ އިންތިހާބަށް ކުރާ ކެމްޕޭނުގެ ތެރެއިން ކަމަށް އެ ޕާޓީގެ މުއައްސިސު އަދި ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު މިއަދު ވިދާޅުވެއްޖެ އެވެ.
ދަ ޑިމޮކްރެޓްސް އުފައްދަން ހަމަ ކުރަން ޖެހޭ 3،000 މެމްބަރުންގެ ފޯމު ހިމެނޭ ގޮތުން 3,560 ފޯމް މިއަދު އިލެކްޝަންސް ކޮމިޝަން (އީސީ) ހުށަހެޅި އެވެ. ގިނަ އަދަދެއްގެ ހަރަކާތްތެރިންނާ އެކު ބޮޑު ރަސްމިއްޔާތެއް ފަދަ ހަރަކާތެއްގެ ތެރެއިން އެ ފޯމްތައް ހަވާލުކުރެއްވުމަށް ފަހު ދަރުބާރުގޭގެ ބޭރުގައި ބޭއްވި މީޑިއާ ބްރީފިން އެއްގައި ހަސަން ލަތީފު ވިދާޅުވީ ޕާޓީ ރަޖިސްޓްރީ ވުމާ އެކު މެމްބަރުން ހޯދުމުގެ މަސައްކަތް ފަށާނެ ކަމަށެވެ.
"އަޅުގަނޑުމެންނަށް [އިލެކްޝަންސް ކޮމިޝަނުން] ހުއްދަ ދެއްވާ ފުރަތަމަ. އޭގެ ފަހުން އަޅުގަނޑުމެން ދަތުރުކުރާނެ، އަދި ހަމަ އިރާދަކުރެއްވިއްޔާ ރިޔާސީ އިންތިހާބުގެ ކެމްޕޭން އަޅުގަނޑުމެން ފަށާނަން. އެއީ އަޅުގަނޑުމެން ދަތުރުކުރާނެ ކެމްޕޭނެއް، އަޅުގަނޑުމެން ޕާޓީއަށް ތާއީދު ހޯދަން މަސައްކަތްކުރާނެ ކެމްޕޭނެއް. އެ މުއްދަތުގެ ތެރޭގައި އަޅުގަނޑުމެންނަށް އިރާދަކުރެއްވިއްޔާ [ދިހަހާސް މެމްބަރުން] ހަމަކުރެވޭނެ ކަމަށް އަޅުގަނޑަށް ގަބޫލުކުރެވެނީ،" ހަސަން ވިދާޅުވި އެވެ.
ދަ ޑިމޮކްރެޓްސް އުފެއްދުމުގެ މަސައްކަތް ފެށީ އެމްޑީޕީގެ ރިޔާސީ ޕްރައިމަރީ ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ނާކާމިޔާބު ވެވަޑައިގެންނެވުމާ އެކު އެމްޑީޕީގެ އެތެރޭގައި އެމަނިކުފާނު އުފެއްދެވި "ފިކުރެއްގެ ދިރުން" ފެކްޝަނުންނެވެ.
ރިޔާސީ ޕްރައިމަރީގައި އާ މެދު އެ ފެކްޝަނުން އެންމެ ބޮޑަށް މައްސަލަ ޖެއްސި އެއް ކަމަކީ އެމްޑީޕީން 39،000 މެމްބަރުން ކަނޑާލާފައިވާ ކަމަށް ކުރި ތުހުމަތެކެެވެ. ކަނޑައިލި 39،000 މީހުންނާ އެކު ޖުލައި މަހާ ހަމައަށް ދާއިރު ފިކެރެއްގެ ދިރުމަށް 50،000 މެމްބަރުން ހަމަކުރެވިދާނެ ކަމަށް ވެސް އޭރު ބުންޏެވެ. އެވާހަކަތަކާ ގުޅުވައި ނޫސްވެރިއަކު ހަސަން ލަތީފާ މިއަދު ސުވާލުކުރީ ހަފުތާއެއްގެ ތެރޭގައި 3،500 މީހުން ސޮއިކުރުމުން އެއީ "ޖަސްޓިފައިޑް އަދަދެއް"ތޯ އެވެ.
އެ ސުވާލަށް ޖަވާބު ދެއްވަމުން އޭނާ ވިދާޅުވީ މިފަހަރު އަމާޒު ހިފީ 3،500 މެމްބަރުން ހަމަކުރަން ކަމަށާއި ހިންގީ މެމްބަޝިޕް ޑްރައިވެއް ނޫން ކަމަށެވެ.
"މިއީ ޕާޓީ އުފެއްދުމަށް ބައިވެރިވި 3،500. އަަޅުގަނޑުމެން ހިންގީކީ މެމްބަޝިޕް ޑްރައިވެއް ނޫން. އެހެންވީމާ އެއާ ތަފާތު. މުޅިން ތަފާތު ދެކަމެއް މިއީ،" ހަސަން ވިދާޅުވި އެވެ.
އޭނާ ވިދާޅުވި ގޮތުގައި އީސީއަށް މިއަދު ހުށަހެޅި ފޯމްތަކަކީ ޕާޓީ އުފެއްދުމުގެ ހަރަކާތުން އަމިއްލައަށް ސައްހަކަން ކަށަވަރުކޮށްފައިވާ ފޯމްތަކެއް ކަމަށެވެ. މާ ގިނަ އަދަދެއްގެ ފޯމް ހުށަހެނޭޅުނު ސަބަބެއްގެ ގޮތުގައި އެކަން ވެސް އޭނާ ފާހަަގަކުރެއްވި އެވެ.
