ރާއްޖޭގެ އެންމެ ގިނަ ކަސްޓަމަރުންނަށް ހިދުމަތް ފޯރުކޮށްދޭ، ބީއެމްއެލުން ދޭ ހިދުމަތްތަކާ ގުޅޭ މައުލޫމާތުތައް ފަސޭހަކަމާ އެކު، ހޯދާލެވޭނެ ގޮތަށް ފަރުމާކޮށްފައިވާ ޗެޓު ބޮޓެއް އެ ބޭންކުން ތައާރަފުކޮށްފި އެވެ.
އާޔާގެ ނަމުން ނަން ދީފައިވާ އެ ބޮޓުގެ ހިދުމަތް 24 ގަޑިއިރު، މެދުކެނޑުމެއް ނެތި ލިބޭނެ އެވެ. އެ ބޮޓާ ޗެޓު ކުރެވޭނީ ދިވެހި އަދި އިނގިރޭސި ބަހުންނެވެ. ދިވެހިން ޗެޓު ކުރާނަމަ، ލިޔަން ޖެހޭނީ ދިވެހި ފޮންޓުންނެވެ. އެގޮތުން ވައިބާ، ވަޓްސްއެޕް، އިންސްޓަގްރާމް، ފޭސްބުކް އަދި އެ ބޭންކުގެ ވެބްސައިޓުން ވެސް އާޔާ އާ ޗެޓު ކުރެވޭނެ އެވެ.
އެ ބޮޓު ތައާރަފު ކުރުމަށް މިއަދު ބޭއްވި ޕްރެސް ކޮންފަރެއްސެއްގައި ވާހަކަ ދައްކަވަމުން އެ ކުންފުނީގެ ސީއީއޯ، ކާލް ސްޓުމްކަ ވިދާޅުވީ މުޅި ދުނިޔެ ވެސް މިދަނީ ޑިޖިޓަލައިޒް ވަމުން ކަމަށާއި ބޭންކެއްގެ ގޮތުގައި ބީއެމްއެލްގެ މިސްރާބު ވެސް ހުރީ އެ ދިމާލަށް ކަމަށެވެ.
އަދި, މިއީ ބީއެމްއެލް ކުރިއަރައިގެން ދިއުމަށް ކުރާ ދަތުރުގެ ފަހު މަންޒިލް ނޫން ކަމަށާއި ބޭންކުގެ ހިދުމްތަތައް ރަނގަޅު ކުރުމުގެ ދަތުރު އަދިވެސް ބާރަށް ކުރިއަށް ގެންދާނެ ކަމަށް އެނާ ވިދާޅުވި އެވެ.
"ބޭނުމަކީ ހިދުމަތުގެ ފެންވަރު ރަނގަޅު ކުރުން، އަވަހަށް ހިދުމަތް ދިނުން އަދި ވީހާވެސް ފަރުވާތެރިކަމާ އެކު އެކަން ކުރުން،" ކާލް ވިދާޅުވި އެވެ.
ބީއެމްއެލްގެ ސީއީއޯ، ކާލް ސްޓުމްކަ ވާހަކަދައްކަވަނީ -- ފޮޓޯ: އަބްދުﷲ އިޔާން
އޭނާ ވިދާޅުވީ ހިދުމަތުގެ ފެންވަރު ރަނގަޅު ކުރުމަށް ބަލާއިރު، އަހަރުމެންނަކީ އިންސާނުން ކަމަށް ވުމުން ބައެއް ފަހަރު ހިދުމަތް ދިނުމުގައި ވެސް ކުށް ކުރެވޭ ކަމަށާއި ބޭންކު ޑިޖިޓަލައިޒް ކުރުމުން ކަސްޓަމަރުންނަށް ލިބޭ ހިދުމަތުގެ ފެންވަރު ރަނގަޅުވެ ހިދުމަތް ހޯދާ މީހުންގެ ވަގުތު ވެސް އެތައް ގުނަ އަކުން ސަލާމަތްވެގެން ދާނެ ކަމަށެވެ.
އިތުރަށް އޭނާ ވިދާޅުވީ ބީއެމްއެލްއަކީ ކުޑަ ބޭންކެއް ނޫން ކަމަށާއި އެ ބޭންކަށް އަހަރެއްގެ މައްޗަށް 1،000،000 (އެއް މިލިއަން) ކޯލް ލިބޭ ކަމަށެވެ. އެ އަދަދު ކޮންމެ އަހަރަކު އިތުރުވަމުން އައުމަކީ އެއީ ހިދުމަތް ލަސް ކުރުމަށް ދެއްކޭނެ އުޒުރެއް ނޫން ކަމަށެވެ.
"ކޯލް ސެންޓަރުތަކަށް އަންނަ ޕްރެޝަރު ކުޑަ ކުރެވޭނީ ހިދުމަތް ދެވޭނެ އިތުރު ގޮތްތަކެއް ހޯދައިގެން، މިހާރު ހުރިހާ އެންމެންނަކީ ވެސް ކޮންމެވެސް ސިފައެއްގައި ސޯޝަލް މީޑިއާ ބޭނުން ކުރާ މީހުން، އެހެންވީމާ އެ ފަސޭހަ އަޅުގަނޑުމެން މި ހޯދަނީ،" ކާލް ވިދާޅުވި އެވެ.
މިއަދުގެ ނޫސްވެރިންގެ ބައްދަލުވުމުގައި ބީއެމްއެލްގެ ޑިރެކްޓާ އޮފް ކަސްޓަމާ ސާވިސް، ގުލްނާޒް މާހިރު ވެސް ވަނީ އެ ބޭންކުގެ ކޯލް ސެންޓަރުތަކަށް ލިބޭ ފޯނުކޯލުތަކުގެ ބައެއް ތަފާސް ހިސާބުތައް ހިއްސާ ކުރައްވައި، އާޔާ އާ އެކު ހިދުމަތުގެ ފެންވަރު ބޮޑުތަނުން ރަނގަޅުވެގެން ދާނެކަން ފާހަގަކުރައްވާފަ އެވެ.
"މި އަހަރުގެ އޭޕްރިލް މަހާ ހަމައަށް ބަލައިލި ކަމުގައިވިޔަސް 400،000 (ހަތަރުލައްކަ) މުއާމަލާތް ވަނީ ކޯލް، އީމެއިލް، އެސްއެމްއެސް، ޗެޓް މެދުވެރިކޮށް އަޅުގަނޑުމެންނަށް ފޯރުކޮށްދެވިފައި، ބޭންކަށް ލިބޭ ކޯލުގެ ގާތްގަނޑަކަށް 80 ޕަސެންޓަކީ އަޅުގަނޑުމެން ފޯރުކޮށްދޭ ހިދުމަތްތަކާ ގުޅޭގޮތުން މައުލޫމާތު ހޯދުމަށްޓަކައި އަޅުގަނޑުމެންނާއި ކަސްޓަމަރުންނާ ދެމެދު ކުރެވޭ މުއާމަލާތް" އާޔާގެ ހިދުމަތް ތައާރަފު ކުރުމާއެކު ލިބޭނެ ފަސޭހަތައް ފާހަގަކުރައްވައި ގުލްނާޒް ވިދާޅުވި އެވެ.
"މިސާލަކަށް ދަންނަވާ ނަމަ، އަޅުގަނޑުމެން ދޫކުރާ ކާޑުތަކުގެ ބާވަތްތައް، ލިމިޓުތައް، އިންޓަނެޓު ބޭންކިން ނުވަތަ އެޕު މެދުވެރިކޮށް އެހެން ހިދުމަތްތައް ހޯދާނެ ގޮތުގެ މައުލޫމާތު، އާޔާގެ ސާވިސް ލޯންޗު ކުރުމުގެ އެންމެ ބޮޑު ބޭނުމަކީ ކަސްޓަމަރުން އެ ބޭނުންފުޅުވާ މައުލޫމާތުތައް އެ ބޭފުޅުން ބޭނުންފުޅުވާ ގަޑިއެއްގައި ވީހާވެސް އަވަހަކަށް ވީހާވެސް ފަސޭހައިން ފޯރުކޮށްދިނުން،'' އޭނާ ވިދާޅުވި އެވެ.
ބީއެމްއެލްގެ ޑިރެކްޓާ އޮފް ކަސްޓަމާ ސާވިސް، ގުލްނާޒް މާހިރު މިއަދުގެ ނޫސްވެރިންގެ ބައްދަލުވުމުގައި ވާހަކަ ދައްކަވަނީ -- ފޮޓޯ: އަބްދުﷲ އިޔާން / އަދަދު
އޭނާ ވިދާޅުވީ އާޔާ ޑިޒައިންކޮށްފައި ވާނީ ކަސްޓަމަރުން އެންމެ ގިނައިން ހޯދާ މައުލޫމާތުތަކަށް ބަލައިގެން ކަމަށެވެ. ނަމަވެސް ހާއްސަ ހާލަތެއްގައި ނަމަ، ލައިވްކޮށް ވަގުތުން ބޭންކުގެ މުވައްޒަފަކާ ގުޅުވައިދޭނެ ކަމަށް އޭނާ ވިދާޅުވި އެވެ.
"އިނގިރޭސި ބަހާއި ދިވެހި ބަހުން ވެސް މައުލޫމާތު ހޯދޭނެ، އަދި މުހިންމު ހާލަތެއް އައިސްފި ނަމަ، ލައިވް ކަސްޓަމަ އޭޖެންޓަކާ ވެސް [އާޔާ] ކަނެކްޓު ކޮށްދޭނެ،" ގުލްނާޒް ވިދާޅުވި އެވެ.
ކަސްޓަމަރުންގެ ގޮތުގައި 325،000 އަށްވުރެ ގިނަ ކަސްޓަމަރުން ތިބި ބީއެމްއެލުން އަލަށް މިއަދު ތައާރަފު ކުރި ބޮޓާ އެކު އެ ބޭންކުގެ ހިދުމަތެއް ހޯދުމަށް މީގެ ކުރިން ކޯލް ސެންޓަރަށް ގުޅައިގެން އެ ހޭދަ ކުރާ ވަގުތު އިންތިހާއަށް މަދުވެގެންދާނެ ކަމަށް އެ ބޭންކުން ބުނެ އެވެ.
ބީއެމްއެލްގެ ކޯލް ސެންޓަރުން ފޯރުކޮށްދޭ ހިދުމަތުގެ ފެންވަރު ރަނގަޅު ކުރުމަށް މިދިޔަ އަހަރު ވެސް ވަނީ ހުޅުމާލޭގައި އިތުރު ކޮންޓެކްޓު ސެންޓަރެއް ހުޅުވާފަ އެވެ.
