ޗައިނާގެ އެސްޓްރޮނޯޓުން 2030 ގެ ކުރިން ހަނދަށް ފޮނުވަން ރާވާފައިވާ ކަން އިއުލާންކޮށް، ޖައްވީ ދިރާސާތަކުގެ ދާއިރާއިން އެމެރިކާއާވާ ވާދަވެރިކަން އިތުރަށް ވަރުގަދަކޮށްފި އެވެ.
މިކަން އިއުލާން ކޮށްފައި ވަނީ ޗައިނާގެ ފުރަތަމަ އާންމު ރައްޔިތެއް ހިމެނޭ ގޮތަށް ތިން އެސްޓްރޮނޯޓުން ކާމިޔާބުކަމާއެކު ޖައްވަށް ފޮނުވާލާފައިވާ ދަނޑިވަޅެއްގަ އެވެ.
ނާސާއިން 2025 ގެ ކުރިން އެމެރިކާގެ އެސްޓްރޮނޯޓުން އަލުން ހަނދަށް ފޮނުވުމަށް އަމާޒު ހިފާފައިވާއިރު، ޗައިނާ މޭންޑް ސްޕޭސް އެޖެންސީގެ ޑެޕިއުޓީ ޑިރެކްޓަރު ލިން ޝިކިއަންގް ވަނީ މިއިއުލާންކޮށް ހަނދުގެ ސަރަހައްދުން ހޯދަން ރާވާފައިވާ ސައިންޓިފިކް އަދި ޓެކްނޮލޮޖިކަލް ދިރާސާތައް ވެސް ހާމަކޮށްފަ އެވެ.
ޖިއުކުއަން ސެޓެލައިޓް ލޯންޗް ސެންޓަރުގައި ބޭއްވި ނޫސްވެރިންގެ ބައްދަލުވުމެއްގައި ލިން ވިދާޅުވީ "އަމާޒަކީ 2030 ވަނަ އަހަރުގެ ކުރިން އިންސާނުންނާ އެކު ޗައިނާގެ ޖައްވީ އުޅަނދެއް ހަނދަށް ޖެއްސުން ހަގީގަތަކަށް ހެދުމާއި، ހަނދުގެ ބިމުގައި ސައިންޓިފިކް ދިރާސާތަކާއި އެއާ ގުޅުންހުރި ޓެކްނޮލޮޖީގެ ޑެމޮންސްޓްރޭޝަންތައް ކުރިއަށް ގެންދިއުމާއި، ދަތުރުފަތުރުގެ ނިޒާމެއް ތަރައްގީކުރުމާއި ހަނދުގައި މަޑުކުރެވޭނެ ނިޒާމެއް ގާއިމުކުރުން," ކަމަށެވެ.
ޗައިނާގެ އެސްޓްރޮނޯޓުން ހަނދުގައި ތަފާތު ހަރަކާތްތައް ހިންގާއިރު، ސާމްޕަލް އެއްކުރުމާއި، ދިރާސާތައް ކުރުމާއި، ހަނދުގެ އަސްލާއި އިރުގެ ނިޒާމުގެ ތަރައްގީއާ ބެހޭ ގޮތުން މައުލޫމާތު ހޯދުމުގެ މަސައްކަތް ކުރާނެ އެވެ. މި މިޝަނަކީ ޗައިނާގެ ޖައްވީ މިޝަންތައް ދުނިޔޭގެ ލޯ އޯބިޓުން ބޭރަށް ފުޅާވެ، ފުން ޖައްވަށް ވަދެވޭނެ މިޝަންތަކެކެވެ.
ޗައިނާގެ އެންމެ ފަހުގެ ޖައްވީ މިޝަން ކަމަށްވާ ޝެންޒޯ-16 ޖައްވީ އުޅަނދު ގޯބީ ސަހަރާގެ ޖިއުކުއަން ސެންޓަރުން ފޮނުވާލީ އަންގާރަ ދުވަހުގެ ހެނދުނު 9:31 ހާއިރު އެވެ.
ފަސް މަސް ދުވަހުގެ މި މިޝަނަކީ ޗައިނާގެ ޖައްވީ ޕްރޮގްރާމަށާއި އެގައުމުގެ ޓިއަންގޮންގް ސްޕޭސް ސްޓޭޝަން އަށް ލިބުނު މުހިންމު ކުރިއެރުމެކެވެ. ޓިއަންގޮންގް ފުރިހަމައަށް އޮޕަރޭޝަން ކުރަން ފެށީ 2022 ވަނަ އަހަރުގެ ފަހުކޮޅު އެވެ. ޓިއަންގޮންގް އޯބިޓްގައި 15 އަހަރު ވަންދެން އޮންނާނެ ކަމަށް ބެލެވެ އެވެ.
އަޒުމް ވަރުގަދަ އުންމީދުތަކާއެކު ޗައިނާއިން ދަނީ ޖައްވީ ހޯދުމުގެ ދާއިރާގައި ބޮޑު ދައުރެއް އަދާކުރަމުންނެވެ. ޖައްވުގައި ޗައިނާއިން ހޯދާފައިވާ ކާމިޔާބީތަކަށް ބަލާ އިރު މާސްއަށް ރޯވަރެއް ފޮނުވުމާއި، ހަނދުގެ ދުރު ފަރާތުގައި ރޮބޮޓިކް ޖައްވީ އުޅަނދެއް ކާމިޔާބުކަމާއެކު ޖެއްސުމާއި، ދުނިޔޭގެ ލޯ އޯބިޓްގައި ސްޕޭސް ސްޓޭޝަނެއް ގާއިމުކުރުން ހިމެނެ އެވެ.
