އިންޑިއާގެ ވެރިރަށް ނިއު ދިއްލީގެ މަގުމަތީގައި 16 އަހަރުގެ އަންހެން ކުއްޖަކަށް ވަޅިން ހަމަލާދީ އަނިޔާވެރި ގޮތަކަށް މަރާލި މައްސަލައިގައި އުމުރުން 20 އަހަރުގެ ފިރިހެނަކު ހައްޔަރުކޮށްފި އެވެ.
އެ ހާދިސާގެ ވީޑިއޯއިން ފެންނަނީ ފިރިހެން މީހާ ތަކުރާރުކޮށް ވަޅި ހަރާ މަންޒަރާއި އޭގެ ފަހުން ބޮޑު ގާގަނޑަކުން އަންހެން ކުއްޖާގެ ބޯ ޗިސްކުރާ މަންޒަރެވެ.
ސީސީޓީވީ މެދުވެރިކޮށް ރިކޯޑުވެފައިވާ އެ ވީޑިއޯ ސޯޝަލް މީޑިއާގައި ވަނީ ވައިރަލްވެފަ އެވެ. ހަމަލާ ކުރިއަށްދާ އިރު، ގިނަ ބަޔަކު އަޅާލުމެއް ނެތި ކައިރިން ހިނގާފައި ދާ މަންޒަރާއި އަނިޔާވެރި އަމަލު ބަލަން ހުއްޓިގެން ތިބޭ މަންޒަރު ވީޑިއޯއިން ފެނެ އެވެ.
ފުލުހުން ބުނީ އެ އަންހެން ކުއްޖާ އާއި ފިރިހެން މީހާ އުޅުނީ ލޯބީގެ ގޮތުން ގުޅިގެން ކަމަށާއި އާދީއްތަ ދުވަހު ހާދިސާ ހިނގުމުގެ ކުރިން ދެ މީހުން ޒުވާބު ކުރި ކަމަށެވެ.
ފުލުހުން ބުނީ ސާހިލް ނަމަކަށް ކިޔާ ޒުވާން ފިރިހެން މީހާ ހައްޔަރު ކުރީ އުއްތަރް ޕްރަދޭޝް ސްޓޭޓުން ކަމަށެވެ. ތަހުގީގު ކުރިއަށް ދާތީ އިތުރު މައުލޫމާތު ހިއްސާ ކުރެވެން ނެތް ކަމަށް ފުލުހުން ބުންޏެވެ.
އެ ހާދިސާއާ ގުޅިގެން ގިނަ ބަޔަކު ދަނީ ސޯޝަލް މީޑިއާގައި ކަންބޮޑުވުން ފާޅުކުރަމުންނެވެ.
ދިއްލީގެ ޗީފް މިނިސްޓަރު އަރްވިންދް ކެޖްރިވާލް ކުރެއްވި ޓްވީޓެއްގައި ވިދާޅުވީ އެއީ ވަރަށް ހިތާމަވެރި އަދި ހިނގައިގެން ނުވާނެ ހާދިސާއެއް ކަމަށާއި މުޖުރިމުން ބިރު ކެނޑި، ފުލުހުންނާ މެދު ފަސްޖެހުން ގެއްލިފައިވާ ކަމަށެވެ.
މީގެ ކުރިން ވެސް އިންޑިއާގެ އާއްމު ތަންތަނުގައި އަނިޔާވެރި އަމަލުތައް ހިންގާ އިރު، މީހުން އަޅާ ނުލި މައްސަލަތައް ފެންމަތިވެފައިވެ އެވެ. އަދި އަނިޔާ ލިބޭ މީހާއަށް އެހީވުމުގެ ބަދަލުގައި ވީޑިއޯ ނަގާ މައްސަލަ ވެސް ފެންމަތިވެފައިވެ އެވެ.
