ފަނޑިޔާރުންގެ ޖަމިއްޔާގެ ރައީސް ކަމަށް ސުޕްރީމް ކޯޓުގެ ފަނޑިޔާރު ހުސްނުއްސުއޫދު އަނެއްކާ ވެސް އިންތިހާބުވެއްޖެ އެވެ.
ޖަމިއްޔާގެ އިސް މަގާމުތަކަށް މީހުން ހޮވުމަށް ބާއްވާ އިންތިހާބު އަންނަ މަހުގެ 10 ވަނަ ދުވަހު ބާއްވާ ގޮތަށް އެ މަގާމުތަކަށް ކުރިމަތިލާން މިދިޔަ ބުރާސްފަތި ދުވަހު އިއުލާންކުރި އެވެ.
ފަނޑިޔާރުންގެ ޖަމިއްޔާއިން މިއަދު ނެރުނު އިއުލާނުގައި ބުނެފައިވާ ގޮތުން ކޮންމެ މަގާމަކަށް ވެސް އެންމެ ފަނޑިޔާރަކު ކުރިމަތިލާފައިވުމުން އިތުރު ވޯޓަކަށް ނުގޮސް އެ މަގާމުތަކަށް ކުރިމަތިލި ފަނޑިޔާރުން ވަނީ އިންތިހާބު ވެފަ އެވެ.
ބަޔާނުގައިވާ ގޮތުން ޖަމިއްޔާގެ ރައީސްގެ މަގާމަށް އިންތިހާބުވެފައިވަނީ ފަނޑިޔާރު ސުއޫދެވެ. ސުއޫދަކީ މިދިޔަ އަހަރުގެ ޖޫން މަހުން ފެށިގެން އެ މަގާމުގައި ހުންނެވި ބޭފުޅެކެވެ.
މިދިޔަ އަހަރު ޖޫން މަހު ސުއޫދު އެ މަގާމަށް، ޖަމިއްޔާގެ ހިންގާ ކޮމިޓިން އައްޔަންކުރީ އޭރު އެ މަގާމުގައި ހުންނެވި އަބްދުއްރައޫފް އިބްރާހީމް ހައި ކޯޓުގެ ފަނޑިޔާރު ކަމުން އިސްތިއުފާ ދެއްވުމުން، ޖަމިއްޔާގެ ރައީސްގެ މަގާމު ވެސް ހުސްވުމުންނެވެ.
ޖަމިއްޔާގެ އިސް މާގަމުތަކަށް އިންތިހާބުވި ފަނޑިޔާރުން؛
- ރައީސް؛ ސުޕްރީމް ކޯޓުގެ ފަނޑިޔާރު ހުސްނުއްސުއޫދު
- ނައިބު ރައީސް؛ ޖުވެނައިލް ކޯޓުގެ ގާޒީ މުހައްމަދު އީސާފުޅު
- ސެކްރެޓަރީ ޖެނެރަލް؛ ރ. ދުވާފަރު މެޖިސްޓްރޭޓް ކޯޓުގެ މުހައްމަދު ސޯދިގު
- އިންތިޒާމު ސެކްރެޓަރީ؛ ށ. މިލަންދޫ މެޖިސްޓްރޭޓް ކޯޓުގެ ހަސަން ޝިޔާމް
- ޚަޒާންދާރު؛ ސިވިލް ކޯޓުގެެ ގާޒީ އަހުމަދު ރަޝީދު
- ޚަޒާންދާރުގެ އެހީތެރިޔާ؛ ގއ. ވިލިނގިލި މެޖިސްޓްރޭޓް ކޯޓުގެ އާޒިމް ހަސަން
- ތަރުޖަމާނު؛ ސިވިލް ކޯޓުގެ ގާޒީ ފަރުހާދު ރަޝީދު
ފަނޑިޔާރުން އިސް ނަގައިގެން މި ޖަމިއްޔާ އެންމެ ފުރަތަމަ އުފެއްދީ 2008 ގަ އެވެ. ނަމަވެސް ގިނަ ދުވަހެއް ނުވެ ޖަމިއްޔާގެ މަސައްކަތް ހުއްޓުނެވެ. އޭގެ ފަހުން ވުޖޫދު ކުރެވުނު ފަނޑިޔާރުންގެ ގާނޫނުގައި ވެސް ފަނޑިޔާރުންގެ ޖަމިއްޔާއެއް ހެދުމުގެ ހައްގު ދީފައިވެ އެވެ. އެކަމަކު އެއް ވަގުތަކަށް ހިންގޭނީ އޭގެ އެންމެ ޖަމިއްޔާ ކަމަށް ބުނެފައިވެ އެވެ.
މިހާރު ހިންގަމުންދާ ފަނޑިޔާރުންގެ ޖަމިއްޔާއަށް ހިންގުމުގެ ހުއްދަ ޔޫތު މިނިސްޓްރީން ދީފައި ވަނީ 2019 ގަ އެވެ.
