ނިއު ދިއްލީ، އިންޑިއާ (މޭ 28) - އިންޑިއާގެ ކުޅިވަރު ފެޑެރޭޝަނެއްގެ ވެރިޔަކާ ދެކޮޅަށް ކުރެވޭ ޖިންސީ ފުރައްސާރައިގެ ތުހުމަތާ ގުޅިގެން ރެސްލިން ކުޅުންތެރިން ކުރަަމުންދާ މުޒާހަރާގެ ތެރެއިން ޕާލަމެންޓް ކައިރިއަށް ހިނގާފައި ދާން މަސައްކަތް ކުރުމުން ގިނަ ބަޔަކު ހައްޔަރުކޮށްފި އެވެ.
އެ މީހުން ޑިމާންޑް ކުރަނީ ރެސްލިން ފެޑެރޭޝަން އޮފް އިންޑިއާ (ޑަބްލިއުއެފްއައި) ގެ ރައީސް ބްރިޖް ބުޝަން ޝަރަން ސިންގް ހައްޔަރު ކުރުމަަށެވެ. އޭނާއަކީ ވެރިކަން ކުރާ ބީޖޭޕީގެ ޕާލަމެންޓު މެމްބަރެކެވެ. މުޒާހަރާ ކުރާތާ މިހާރު މަހެއްހާ ދުވަސް ވެއްޖެ އެވެ.
މުޒާހަރާގެ ބައިވެރިން ހައްޔަރު ކުރުމުގެ އިތުރުން، އެ މީހުން އެއްވެ ތިބި ސަރަހައްދު ވެސް ފުލުހުން ވަނީ ސާފުކޮށް، ކައިރި ނުވެވޭ ގޮތް ހަދައިފަ އެވެ. އާދީއްތަ ދުވަހު މުޒާހަރާގެ ބައިވެރިން މަސައްކަތް ކުރީ އަލަށް ހުޅުވި ޕާލަމެންޓް އިމާރާތް ކައިރިއަށް ދިޔުމަށެވެ.
އެ ތަން ހުޅުވައިދިނީ އާދީއްތަ ދުވަހު ބޮޑު ވަޒީރު ނަރެންދްރަ މޯދީ އެވެ. އެ ތަނާ ދިމާލަށް ހިނގަމުން ދަނިކޮށް އެތައް ސަތޭކަ ސިފައިން ޖަމާވެ މުޒާހަރާގެ ބައިވެރިން ހައްޔަރު ކުރަން ފެށި އެވެ.
ހައްޔަރު ކުރި މީހުންގެ ތެރޭގައި އޮލިމްޕިކްގެ ބްރޮންޒް މެޑަލް ހޯދާފައިވާ އެތުލީޓުން ކަމުގައިވާ ސަކްޝީ މާލިކް އާއި ބަޖްރަންޖް ޕޫނިއާ ހިމެނެ އެވެ. ފުލުހުން ބުނީ މުޒާހަރާގެ ބައިވެރިން ހައްޔަރު ކުރީ އާއްމު ސުލްހައަށް ހުރަސް އަޅައި ގާނޫނާ ހިލާފުވުމުން ކަމަށެވެ.
ސިންގްއާ ގުޅޭ ދެ ޝަކުވާ ދިއްލީގެ ފުލުހުންނަށް ހުށަހެޅީ މިދިޔަ މަހު އެވެ. އޭނާ ތުހުމަތުތައް ދޮގުކުރެ އެވެ. އެހެން ނަމަވެސް، އިންޑިއާގެ އެންމެ ނަން މަޝްހޫރު އެތުލީޓުން ވަނީ ރެސްލިން ތެޅުންތެރިންގެ ދިފާއުގައި ތެދުވެފަ އެވެ.
