އިންޑިއާގެ އިރުއުތުރު މަނީޕޫރް ސްޓޭޓުގައި ހަމަނުޖެހުން އުފައްދާ ގްރޫޕްތަކާ ދެކޮޅަށް ސިފައިންނާއި ފުލުހުން ގުޅިގެން ފާއިތުވި ތިން ދުވަހު ހިންގި އޮޕަރޭޝަނެއްގައި 40 މީހުން މަރުވެއްޖެ އެވެ.
ސްޓޭޓްގެ ޗީފް މިނިސްޓަރު އެން ބިރެން ސިންގް ވިދާޅުވީ މަރުވީ ކޫކީ ގްރޫޕްގެ ހަނގުރާމަވެރިން ކަމަށެވެ. ހަމަނުޖެހުން ހުއްޓުވަން ފެށި އޮޕަރޭޝަން އަދިވެސް ދަނީ ކުރިއަށެވެ.
އެ ސްޓޭޓްގައި ހިންގަމުންދާ ހަމަނުޖެހުމުގައި ބަޑި ޖަހައި ތަންތަނުގައި ހުޅުޖަހަމުންދާ އިރު، އާއްމުންގެ ހަތަރު މީހުންނާއި ސިފައިންގެ އެކަކު ވަނީ މި ހަފުތާ ބަންދުގައި މަރުވެފަ އެވެ.
ސިންގް ވިދާޅުވީ މިހާރު ހަމަނުޖެހުން ހިނގަނީ ދެ ގަބީލާއެއްގެ މެދުގައި ނޫން ކަމަށާއި ކުރިމަތިލުންތައް ކުރިއަށް ދަނީ ޓެރަރިސްޓުންނާއި ސަލާމަތީ ފައުޖުތަކާ ދެމެދު ކަމަށެވެ.
މަނީޕޫރްގައި ހަމަނުޖެހުން ފެށުނީ ކޫކީ ގްރޫޕްގެ ސަބަބުން ކަމަށް ވެރިކަމުގައި އޮތް ބަރަތިޔަ ޖަނަތަ ޕާޓީ (ބީޖޭޕީ) އިން ތުހުމަތު ކުރެ އެވެ.
އެކަމަކު އެ ގްރޫޕުން އެކަން ދޮގުކޮށް ބުނީ ހަމަނުޖެހުން ހިންގަނީ އަރަމްބައި ޓެންގޯލް އަދި މެއިޓެއި ލީޕުން ކޮމިއުނިޓީގެ މެދުގައި ކަމަށެވެ.
އިންޑިއާގެ ނޫސްތަކުން ބުނާ ގޮތުގައި ކޫކީ އާއި މެއިޓެއިއާ ދެމެދު މޭ ތިން ވަނަ ދުވަހު ހަމަނުޖެހުން ހިނގަން ފެށީ މެއިޓެއިއަށް ގަބީލާއެއްގެ ލަގަބު ރަސްމީކޮށް ދޭން އުޅުމުންނެވެ.
މިހާތަނަށް ޖުމްލަ 74 މީހުން މަރުވެފައިވާ އިރު، 30،000 އަށް ވުރެ ގިނަ މީހުން ގެތައް ދޫކޮށް އެހެން ހިސާބުތަކަށް ހިޖުރަކޮށްފައިވެ އެވެ.
