ސްރީނަގަރް، އިންޑިއާ (މޭ 26) - ކަޝްމީރުގެ މިނިވަން ކަމަށް މަސައްކަތް ކުރާ އިސް ލީޑަރަކަށް މަރުގެ އަދަބު ދޭން އެދިފައިވާނެ ކަމަށް އިންޑިއާގެ ޓެރަރިޒަމާ ދެކޮޅު ތަހުގީގީ އެޖެންސީން ހުކުރު ދުވަހު ބުނެފި އެވެ.
އުމުރުން 57 އަހަރުގެ މުހައްމަދު ޔާސިން މާލިކްގެ މައްޗަށް މީގެ ކުރިން ވަނީ އުމުރު ދުވަހުގެ ޖަލު ހުކުމެއް އިއްވައިފަ އެވެ. އޭނާއަކީ ޖައްމު ކަޝްމީރް ލިބެރޭޝަން ފްރަންޓް (ޖޭކޭއެލްއެފް) ލީޑަރެވެ.
އިންޑިއާއިން މާލިކް ހައްޔަރުކޮށް ޝަރީއަތް ހިންގަން ފެށުމުން، ސަރުކާރުގެ ވަކީލަކު އައްޔަނު ކުރަން އަދި އަމިއްލަ ދިފާއުގައި ވާހަކަދައްކަން އޭނާ ދެކޮޅު ހެދި އެވެ.
އޭނާގެ އުމުރަށް ޖަލަށް ހުކުމް ކުރީ، ޓެރަރިޒަމަށް ފަންޑު ކުރި ކަމަށް އިއުތިފާރުވުމުންނެވެ. އޭރު ވެސް ނޭޝަނަލް އިންވެސްޓިގޭޝަން އެޖެންސީއިން ކޯޓުގައި އެދުނީ މަރުގެ އަދަބެވެ.
އެކަމަކު ކޯޓުން ނިންމީ އުމުރު ދުވަހުގެ ޖަލު ހުކުމެއް އިއްވުމަށެވެ. ހުކުރު ދުވަހު އެ އިދާރާއިން ދެ ވަނަ ފަހަރަށް ނިއު ދިއްލީގެ ހައި ކޯޓުގައި އެދުނީ އޭނާއަށް މަރުގެ އަދަބު ދިނުމަށެވެ.
އެ މައްސަލައިގެ އަޑުއެހުމެއް ހޯމަ ދުވަހު އޮންނާނެ އެވެ.
މާލިކްގެ ޖޭކޭއެލްއެފްއިން ވަނީ 1989 ވަނަ އަހަރު ކަޝްމީރަށް މިނިވަންކަން ހޯދަން ހަނގުރާމަކޮށްފަ އެވެ. އެ ގްރޫޕުން ބޭނުންވަނީ ކަޝްމީރަކީ މުޅިން މިނިވަން ވަކި ދައުލަތަކަށް ހެދުމަށެވެ.
މިހާރު ކަޝްމީރް އޮންނަނީ އިންޑިއާ އާއި ޕާކިސްތާނަށް ދެފަޅިކޮށްފަ އެވެ. ޖޭކޭއެލްއެފްގެ ހަނގުރާމަވެރިން ބަލިކުރަން އިންޑިއާ ސިފައިން ކުރި މަސައްކަތުގައި އެތައް ހާސް އާއްމު ރައްޔިތުން މަރުވި އެވެ.
އޭގެ ފަހުން 1994 ގައި މާލިކް ވަނީ ހަނގުރާމަ ކުރުން ހުއްޓާލައި، ސުލްހަވެރި މަސައްކަތުގެ ތެރެއިން ކަޝްމީރަށް މިނިވަންކަން ހޯދަން ކެމްޕެއިނެއް ފަށައިފަ އެވެ. އޭނާ ވަނީ އެ ކެމްޕެއިންގެ ތެރެއިން އިންޑިއާގެ ދެ ބޮޑު ވަޒީރުންނާ ބައްދަލުކޮށްފަ އެވެ.
އިންޑިއާއިން ތަކުރާރުކޮށް އޭނާ ޖަލުގައި ބަންދުކުރި އެވެ. ޖަލުގައި 14 އަހަރު ހޭދަކުރި އިރު ލާއިންސާނީ އަމަލުތައް ހިންގި ކަމަށް މާލިކް ތުހުމަތުކުރެ އެވެ. އެންމެ ފަހުން އޭނާ ހައްޔަރު ކުރީ 2018 ގަ އެވެ.
