ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲގެ އިތުބާރު ނެތް ކަމަށް ކަނޑައަޅަން ރައްޔިތުންގެ މަޖިލީހަށް ހުށަހެޅުމުން، ހުޅުމާލެ ދާއިރާގެ މެމްބަރު އަލީ ނިޔާޒަށް ފާޑުވިދާޅުވެ، އީވާ ދެއްކެވި ވާހަކައަށް އޭނާ މިއަދު ރައްދު ދެއްވައިފި އެވެ.
މެމްބަރު އަލީ ނިޔާޒަކީ ރައީސް އިބްރާހީމް މުހައްމަދު ސޯލިހުގެ ކޮއްކޯފުޅެކެވެ. އީވާގެ އިތުބާރު ނެތްކަމަށް ކަނޑައަޅަން 50 މެމްބަރުންގެ ސޮޔާއެކު ރައްޔިތުންގެ މަޖިލީހަށް މައްސަލަ ވެއްދުމުން އީވާގެ އިތުރުން ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ނުރުހުން ވެސް އެންމެ ބޮޑަށް އަމާޒުވީ އޭނާއަށެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި އީވާ ވިދާޅުވީ އިތުބާރު ނެތްކަމަށް ހުށަހެޅި މައްސަލައަަށް ސޮއިދެއްވީ މެޖޯރިޓީއަށް ތަބާވުމުގެ ގޮތުން ކަމަށް ވިދާޅުވީ އަލީ ނިޔާޒަށް "ޑިމޮކްރަސީ ނޭނގޭތީ" ކަމަށެވެ.
"ހުޅުމާލޭ ދާއިރާގެ އިއްޒަތްތެރި މެމްބަރު އަލީ ނިޔާޒު ކޮންމެވެސް ވަޓްސްއެޕް ގްރޫޕެއްގައި ލިއުއްވާފައި އޮއްވާ އަޅުގަނޑުމެން ދުށިން އަގުލަބިއްތަށޭ ތިމަންނަ ތަބާވާނީ. އަގުލަބިއްޔަތަށް ތަބާ ވުމަކީ އަދި ޑިމޮކްރަސީއެއް [ނޫން] ޑިމޮކްރަސީގެ ތިއަރީ އަދި އެނގިވަޑައި ނުގަންނަވަނީ ކަންނޭންގެ،" އީވާ ވިދާޅުވި އެވެ.
އެވާހަކައަށް ރައްދު ދެއްވައި މިއަދު ކުރެއްވި ޓްވީޓެއްގައި އަލީ ނިޔާޒު ވިދާޅުވީ މަޖިލީހުގެ ނައިބު ރައީސް ކަމަށް އީވާ ގެންނަން ކުރިން ވެސް އެދިވަޑައިނުގަންނަވަން ކަމަށާއި އެދިވަޑަައިގެންނެވީ މަޖިލީހުގެ ރައިސް ކަމަށް އީވާ ވަޑައިގަންނަވަން ކަމަށެވެ.
"އަޅުގަނޑަކީ އެއްވެސް އިރެއްގައި އިވާ މަޖްލިސް ނައިބް ރައީސް ކަމަށް ގެންނަން ބޭނުންވި މީހެއް ނޫން. އަޅުގަނޑު އީވާގެ ކިބައިން އެދުނީ މަޖްލިސް ރައީސް ކަމަށް އައުމަށް. ވަރަށް ގިނަ ސަބަބުތައް އޮތީމަ. އެކަން އިވާ އަށް ކިޔާދިނިން. އޭރުވެސް ތަބާވީ ޕާޓީގެ މެޖޯރިޓީ އަށް. މި ފަހަރުވެސް އެގޮތައް،" އަލީ ނިޔާޒު ވިދާޅުވި އެވެ.
ރައްޔިތުންގެ މަޖިލީހުގެ ނައިބު ރައީސްކަމުން އީވާ ވަކިކުރަން އެމްޑީޕީން މަސައްކަތް ފެށީ އޭނާ އެޕާޓީން ވަކިވެވަޑައިގެން، ދަ ޑިމޮކްރެޓްސްގެ ނަމުގައި އާ ޕާޓީއެއް އުފެއްދުމުގެ ހަރަކާތާ ގުޅިވަޑައިގެންނެވުމުންނެވެ. މަޖިލީހުގެ ނައިބު ރައީސް ކަަމަށް އީވާ އަދި ރައީސްކަމަށް ނަޝީދު އައްޔަންކުރީ މަޖިލީހުގެ ސުޕަމެޖޯރިޓީ އެމްޑީޕީއަށް ލިބުމާ އެކު 2019 ވަނަ އަހަރު އެވެ.
