މި ސީޒަންގެ އިނގިރޭސި ޕްރިމިއާ ލީގުގެ ފަހު މެޗުތައް މިރޭ ކުޅޭނެ އެވެ. ފަހު ދުވަހަށް ލީގު ކުރިމަތިލާއިރު، ޗެމްޕިއަން ޓީމާއި ގަދަ ހަތަރެއްގެ ޖާގަތައް ހޯދި ކަނޑައެޅި ފައެވެ. ފަހު ދުވަހުގެ މެޗުތަކުގައި، ވާދަވެރިކަމާއި ފޯރި ގަދަވެފައިވަނީ ރެލިގޭޝަނުން ސަލާމަތްވުމުގެ ހަނގުރާމައަށެވެ. ފަހު ދުވަހަށް ކުރިމަތިލާއިރު، ރެލިގޭޝަންގެ ބިރު ތިން ކްލަބަކަށް އެބައޮތެވެ. އެއީ ލެސްޓާ ސިޓީ އާއި އެވަޓަން އަދި ލީޑްސް ޔުނައިޓަޑެވެ. އެކަމަކު ލީގުގެ ފަހު މެޗުތައް މިރޭ ކުޅެ ނިމޭއިރު، މި ތިން ޓީމުގެ ތެރެއިން ރެލިގޭޝަނުން ސަލާމަތްވާނީ އެންމެ ޓީމެކެވެ.
ފަހު މެޗަށް ނުކުންނައިރު، ރެލިގޭޝަނުން ސަލާމަތްވުމުގެ އަމިއްލަ ބާރު އޮތީ އެވަޓަން އަށެވެ. ތާވަލްގެ 17 ވަނައިގައި އެ ޓީމު އޮތީ 33 ޕޮއިންޓާ އެކު އެވެ. ލީގުގައި މިރޭ ބޯންމައުތާ ދެކޮޅަށް ކުޅޭ މެޗުން މޮޅުވެއްޖެނަމަ، އެވަޓަން ރެލިގޭޝަނުން ސަލާމަތްވާނެއެވެ. މި މެޗު އެއްވަރުވެ، ނުވަތަ އެވަޓަން ބަލިވެއްޖެނަަމަ، ލެސްޓާ އާއި ލީޑްސް އަށް ރެލިގޭޝަނުން ސަލާމަތްވުމުގެ ފުރުސަތު އެބައޮތެވެ. އެކަމަކު ލީޑްސް އާއި ލެސްޓާ އަށް ވެސް މޮޅުވާން މަޖުބޫރެވެ.
ލެސްޓާ އޮތީ 31 ޕޮއިންޓާ އެކު ތާވަލްގެ 18 ވަނައިގަ އެވެ. ލީޑްސް 19 ވަނައިގައި އޮތީ 31 ޕޮއިންޓާއެކުއެވެ. ތާވަލްގެ ފުލުގައި އޮތް ސައުތުހެމްޓަން ވަނީ ރެލިގޭޓްވެފައެވެ.
ލީގުގައި މިރޭ ޓޮޓެންހަމް ހޮޓްސްޕާއާ ދެކޮޅަށް ލީޑްސް ނުކުންނައިރު، ލެސްޓާއާ ދެކޮޅަށް ނުކުންނާނީ ވެސްޓް ހޭމެވެ.
ރެލިގޭޝަނުން ސަލާމަތްވުމުގެ ފޭވަރިޓަކީ އެވަޓަންއެވެ. އެއީ މޮޅަކާއެކު، އެ ޓީމަށް ރެލިގޭޝަނުން ސަލާމަތްވާނެކަން ކަށަވަރުވާނެތީއެވެ. އެހެން ޓީމެއްގެ ނަތީޖާއަކަށް ވިސްނާކަށް ނުޖެހޭނެއެވެ.
މި ސީޒަން ވެސް ގޯސްކޮށް ފެށި ލެސްޓާ އަށް ދިމާވެފައިވާ އެންމެ ބޮޑު މައްސަލައަކީ ޑިފެންސް ބަލިކަށިވުމެވެ. އެންމެ ފަހުން ކުޅުނު 21 މެޗުގައި ލެސްޓާ ކޮޅަށް ލަނޑެއް ނުވަދެ ނިންމާލީ އެންމެ މެޗެކެވެ.
ލެސްޓާގެ ނަތީޖާތައް ދަށްވުމުގެ ސަަބަބުން ބްރެންޑަން ރޮޖާސް ކޯޗުކަމުން މަގާމުން ވަކިކޮށް، ލެސްޓާގެ ކޯޗުކަމަށް ޖަމަޖެއްސި ޑީން ސުމިތު ބުނީ ރެލިގޭޝާނުން ސަލާމަތްވުގެ އަމިއްލަ ބާރު ނެތަސް ލެސްޓާ އިން ދުލެއް ނުދޭނެކަމަށެވެ.
ލީޑްސް އަށް ވެސް އޮތީ މޮޅުވުން މަޖުބޫރު މެޗެކެވެ. މޮޅުވިޔަސް، އެ ޓީމަށް ރެލިގޭޝާނުން ސަލާމަތްވާން އޮތީ އެވަޓަން އާއި ލެސްޓާ ސިޓީ ބައްދަލުކުރާ މެޗުގެ ނަތީޖާ ނުކުންނަނަ ގޮތަކުންނެވެ.
