އިސްލާމްއާބާދް، ޕާކިސްތާން (މޭ 23) - ޕާކިސްތާނުގެ ކުރީގެ ބޮޑު ވަޒީރު އިމްރާން ހާންގެ ޕާޓީގެ ތަރުޖަމާނު ތަކުރާރުކޮށް ހައްޔަރުކޮށް ދޫކުރަމުން ދާތީ އިސްތިއުފާ ދެއްވައިފި އެވެ.
މީގެ ދެ ހަފުތާ ކުރިން ކޮރަޕްޝަންގެ ތުހުމަތުގައި އިމްރާން ހައްޔަރުކޮށް، ސުޕްރީމް ކޯޓުގެ އަމުރުގެ ދަށުން ދޫކުރަން މަޖުބޫރުވުމުން، ޕާކިސްތާން އޮތީ ވަރަށް ބޮޑަށް ހަލަބޮލިވެފަ އެވެ.
އޭގެ ފަހުން ޕާކިސްތާން ތެހްރީކޭ އިންސާފް (ޕީޓީއައި) އާ ދެކޮޅަށް ގިނަ ފިޔަވަޅުތަކެއް އަޅަމުންދާ ކަމަށް ރިޕޯޓުތައް ބުނެ އެވެ. އެގޮތުން, އިސް މެމްބަރުން ހައްޔަރު ކުރުން ދަނީ ކުރިއަށެވެ.
ޕާޓީގެ ނައިބު ރައީސް ޝީރީން މަޒަރީ ވިދާޅުވީ "12 ދުވަހުގެ ތެރޭގައި ތަކުރާރުކޮށް ހައްޔަރުކޮށް، ދޫކޮށްލާ، ރަހީނުކޮށް، ދޫކޮށްލާ" ފުރައްސާރަ ކުރުމުގެ އެތައް އަމަލެއް ހިންގަމުންދާ ކަމަށެވެ.
"ސިޔާސީ މައިދާނުން ވަކިވާން ނިންމައިފިން. މިއަދުން ފެށިގެން އަޅުގަނޑަކީ ޕީޓީއައި އަދި އެހެން ސިޔާސީ ޕާޓީއެއްގެ ވެސް މީހެއް ނޫން،" އޭނާ ނޫސްވެރިންނަށް ވިދާޅުވި އެވެ.
ސިއްހީ ހާލު ރަނގަޅު ނޫން ކަމަށް ފާހަގަކޮށް ޝީރީން ވިދާޅުވީ އިސްތިއުފާ ދެއްވަނީ ސިއްހީ ސަބަބުތަކާއި އާއިލީ ސަބަބުތަކާ ހެދި ކަމަށެވެ.
ސިފައިންގެ ތާއީދު އޮންނަ ސަރުކާރެއް ގާއިމްކުރުމާ ދެކޮޅަށް އެންމެ ބާރަށް އަޑު އުފުލި އެކަކަކީ ޝީރީން އެވެ. ޕީޓީއައިއިން ބުނީ ދެ ހަފުތާ ތެރޭގައި ފަސް ފަހަރެއްގެ މަތިން އޭނާ ހައްޔަރު ކުރި ކަމަށެވެ.
އެ ޕާޓީގެ އިތުރު މީހުން ވެސް ހައްޔަރުކޮށްފައިވާ އިރު، އަށް މީހަކު އަދިވެސް ހުރީ ބަންދުގަ އެވެ. އެނެލިސްޓުން ދެކޭ ގޮތުގައި ފިއްތުންތަކާ ހެދި އިތުރު މީހުން އިސްތިއުފާ ދޭނެ އެވެ.
