ޕެޝާވަރް، ޕާކިސްތާން (މޭ 23) - ހަންގޭރީގެ ކުންފުންޏަކުން ތެލާއި ގޭސް ނެގުމުގެ މަސައްކަތް ކުރާ ސައިޓަކަށް ޕާކިސްތާނުގެ ތާލިބާނުން ދިން ހަމަލާއެއްގައި ހަ މީހުން މަރުވެއްޖެ އެވެ.
އެމްއޯއެލް ގްރޫޕްގެ ސައިޓަށް ހަމަލާ ދިނީ 50 މީހުންގެ ގްރޫޕަކުން ދަންވަރުގެ ވަގުތުގަ އެވެ. އެ ސައިޓު ހުންނަނީ ހައިބަރް ޕަހްތުންހްވާ ޕްރޮވިންސްގެ ހަންގު ޑިސްޓްރިކްޓުގަ އެވެ.
އެއީ އަފްގާނިސްތާނާއި ޕާކިސްތާން ގުޅޭ ބޯޑަރު ސަރަހައްދެވެ. އޮފިޝަލުން ބުނީ ހަމަލާގައި މަރުވި ހަ މީހުންނަކީ ސައިޓުގެ މައި ދޮރާށީގެ ސެކިއުރިޓީ ބަލަހައްޓާ މީހުން ކަމަށެވެ.
އޭގެ ތެރޭގައި ހިމެނެނީ ދެ ސެކިއުރިޓީ ގާޑުންނާއި ފުލުހުންނަށް އެހީފޯރުކޮށްދޭ އަމިއްލަ ގްރޫޕް ފްރޮންޓިއާ ކޮންސްޓެބިޔުލަރީގެ ހަތަރު މެމްބަރުންނެވެ.
ޕާކިސްތާނުގެ ތާލިބާނުން ނެރުނު ބަޔާނެއްގައި ހަމަލާގެ ޒިންމާ އުފުލި އެވެ. އެމްއޯއެލް ގްރޫޕުން ބުނީ އެ ކުންފުނީގެ އެއްވެސް މުވައްޒަފަކު މަރުވެފައި ނުވާ ކަމަށެވެ.
އެ ގްރޫޕުން 1999 ވަނަ އަހަރުން ފެށިގެން އަންނަނީ ޕާކިސްތާނުގައި ހަރަކާތްތެރިވަމުންނެވެ. ޕާކިސްތާނުގައި އެ ގްރޫޕުގެ 400 މީހުން އުޅެ އެވެ.
ޕާކިސްތާނުގެ ތާލިބާނުންނަކީ 2007 ގައި އުފެދުނު ޓެރަރިސްޓު ގްރޫޕެކެވެ. އަފްގާނިސްތާނުގެ ވެރިކަމަށް ތާލިބާނުން އައި ފަހުން ޕާކިސްތާނުގެ ތާލިބާނުންގެ ހަރަކާތްތައް ވަނީ ވަރުގަދަކޮށްފަ އެވެ.
