ނިއުކާސަލް (މެއި 23) - އިނގިރޭސި ޕްރިމިއާ ލީގުގައި ރޭ ލެސްޓާ ސިޓީއާ ލަނޑެއް ނުޖެހި 0-0 އިން އެއްވަރުވި މެޗުން ލިބުނު ޕޮއިންޓާ އެކު، ނިއުކާސަލް ޔުނައިޓެޑުން 20 އަހަރަށް ފަހު ޗެމްޕިއަންސް ލީގުގައި ކުޅުމުގެ ފުރުސަތު ހޯދައިފި އެވެ.
ބާކީ މެޗެއް އޮއްވައި، ނިއުކާސަލް އިން ޔޫރަޕްގެ އެންމެ ބޮޑު ކްލަބް ފުޓްބޯޅަ މުބާރާތް، ޗެމްޕިއަންސް ލީގުގެ ޖާގަ ޔަގީންކުރީ 37 މެޗުން 70 ޕޮއިންޓް ހޯދައިގެންނެވެ. މިއާ އެކު، ނިއުކާސަލް އިން މި ވަނީ 2003 ވަނަ އަހަރުގެ ފަހުން ފުރަތަމަ ފަހަރަށް ޗެމްޕިއަންސް ލީގުން ޖާގަ ޔަގީންކޮށްފަ އެވެ.
ނިއުކާސަލް ދަނޑުގައި ރޭ ކުުޅުނު މެޗުގައި އެ ޓީމުން ފޮނުވާލި ތިން ހަމަލާއެއް ވަނީ ގޯލުގެ ދަނޑިއަށް އަމާޒުވެފަ އެވެ. އެގޮތުން، ކަލުމް ވިލްސަން އާއި މިގޭލް އަލްމިރޯން އަދި ބްރޫނޯ ގިމަރޭޒް ފޮނުވާލި ބޯޅަތައް ދަނޑިއަށް އަމާޒުވިއިރު، ލެސްޓާގެ ކީޕަރު ޑެނިއަލް އައިވާސަން ވަނީ ނިއުކާސަލްގެ އަލެކްސަންޑަ އައިސާކް ޖެހި ބޯޅައެއް މަތަކޮށްފަ އެވެ.
ރެލިގޭޝަނުން ސަލާމަތްވާން މަސައްކަތް ކުރަމުން އަންނަ ލެސްޓާ އިން ރޭގެ މެޗުގައި ވަނީ ގޯލެއް ޖަހަން ވެސް ރަނގަޅު ހަމަލާތަކެއް ފޮނުވާލައިފަ އެވެ. އެ ގޮތުން، ލެސްޓާ އަށް ކުޅޭ ބެލްޖިއަމްގެ ފުލްބެކް، ޓިމޮތީ ކަސްޓާނިއޭ އެކްރަބެޓިކް ކިކަކުން ފޮނުވާލި ހަމަލާ ނިއުކާސަލްގެ ކީޕަރު ނިކް ޕޯޕް ވަނީ މަތަކޮށްފަ އެވެ.
ޗެމްޕިއަންސް ލީގަށް ކޮލިފައިވުމަކީ ނިއުކާސަލް އިން ކުރިއަށްދާން ބޭނުންވާ މިސްރާބަށް ދާން ބަލާއިރު، ހާސިލްކުރެވުނު ވަރަށް ބޮޑު ކަމެއް ކަމަށް ނިއުކާސަލްގެ ކޯޗު އެޑީ ހޯވް ވަނީ ބުނެފަ އެވެ.
ނިއުކާސަލް އިން އެންމެ ފަހުން ޗެމްޕިއަންސް ލީގު ކުޅުނީ 2002-2003 ވަނަ އަހަރުގެ ސީޒަނުގައި، އެ ޓީމުގެ ކޯޗަކަށް ބޮބީ ރޮބްސަން ހުރިއިރު އެވެ.
